"প্ৰতিবছৰৰ দৰে এইবাৰো আমি বৃহত্তৰ টাউন পানিগাঁও অঞ্চলবাসীৰ সহযোগত সৰস্বতী পূজা আয়োজন কৰিবলৈ প্ৰস্তুতি চলাইছো। আমাৰ এই অঞ্চলটোত হিন্দু-মুছলমান-বাঙালী আদি সম্প্ৰদায়ৰ লোক বাস কৰে। সেয়ে, আমাৰ স্কুলত ভিন্ন ধৰ্মৰ ছাত্ৰ-ছাত্ৰী আছে আৰু সকলোৱে একগোট হৈ পূজা আয়োজন কৰো। হিন্দু-মুছলমান সকলো লোকে আমাৰ ইয়াত মা-প্ৰসাদ ধোৱাৰ পৰা আৰম্ভ কৰি পূজাৰ সকলো কাম-কাজত মিলি-জুলি অংশ লয়। বিদ্যালয়ৰ পৰা প্ৰায় ৩-৪ কিলোমিটাৰ আঁতৰৰ গাঁওৰ মুছলমান ল'ৰা-ছোৱালী আৰু তেওঁলোকৰ অভিভাৱকসকলেও সৰস্বতী পূজাত অংশ ল'বলৈ আমাৰ বিদ্যালয়লৈ আহে। আমাৰ বিদ্যালয়ৰ মুছলমান ছাত্ৰীসকলেও মেখেলা চাদৰ পিন্ধি পূজালৈ আহে আৰু চাকি-বন্তি নৈবদ্য আগবঢ়াই বাগ দেৱীৰ চৰণত সেৱা জনায়।"বিদ্যালয়খনৰ প্ৰধান শিক্ষক তৰুণ চন্দ্ৰ বৰাই আৱাজ দ্য ভইচৰ সৈতে হোৱা এক বাৰ্তালাপত কয়।  

টাউন পানিগাওঁ প্ৰাথমিক বিদ্যালয়ত অনুষ্ঠিত ভাওনাৰ দৃশ্য

“আমাৰ ছাত্ৰ-ছাত্ৰীসকলে যাতে পাঠ্যপুথিৰ জ্ঞানৰ সমান্তৰালকৈ আধ্যাত্মিক দিশসমূহতো আগবাঢ়ি যাব পাৰে, আৰু যুৱ-উচ্ছৃখলতাৰ পৰা যাতে আমি তেওঁলোকক আঁতৰাই ৰাখিব পাৰো, তাৰ প্ৰতি লক্ষ্য ৰাখি আমি বিদ্যালয়ত ভাওনা প্ৰদৰ্শনৰ প্ৰয়াস কৰিছো। আধ্যাত্মিক শিক্ষাই তেওঁলোকক একোগৰাকী সু-নাগৰিক হোৱাত সহায় কৰিব আৰু তেওঁলোকৰদ্বাৰা সমাজত এক সুস্থ বাতাৱৰণ সৃষ্টি হ’ব বুলি মই অনুভৱ কৰো। যিহেতু তেওঁলোক আমাৰ ভৱিষ্যত, গতিকে আমি তেওঁলোকক সকলো দিশত আগবঢ়াই নিব লাগিব,” প্ৰধান শিক্ষক বৰাই কয়।