দৌলত ৰহমান /গুৱাহাটী
তেওঁলোকে ইতিমধ্যে পবিত্র কোৰান মুখস্থ কৰিছে। এতিয়া তেওঁলোকক জীৱবিজ্ঞান, ৰসায়ন বিজ্ঞান, পদাৰ্থ বিজ্ঞান, প্ৰাণীবিজ্ঞান, সামাজিক অধ্যয়ন আৰু ইতিহাসৰ শিক্ষা দিয়া হৈছে। তেওঁলোকে গণিত কেনেকৈ সমাধান কৰিব লাগে, ইংৰাজী আৰু হিন্দী লিখা আৰু কোৱাও শিকি আছে। হাফিজৰ (যাৰ সম্পূৰ্ণ কোৰান মুখস্ত থাকে) তাৎপৰ্য আৰু বুদ্ধিমত্তাৰ সুব্যৱহাৰৰ বাবে মধ্য অসমৰ হোজাই জিলাত অৱস্থিত মাৰ্কাজুল মা'আৰিফে (আজমল চি এছ আৰৰ এটা শাখা) হিফজুল কোৰান প্লাছ নামৰ এটা বিশেষ পাঠ্যক্ৰম আৰম্ভ কৰিছে।
আৱাজ দ্যা ভইছৰ সৈতে হোৱা এক সাক্ষাৎকাৰত মাৰ্কাজুল মা'আৰিফৰ অতিৰিক্ত সাধাৰণ সম্পাদক দেৱান আব্দুল অলিম চৌধুৰীয়ে কয়: "হিফজুল কোৰান প্লাছ হৈছে সাধাৰণ বিদ্যালয় পাঠ্যক্ৰমৰ ১৪ বছৰৰ শিক্ষা(নাৰ্ছাৰী/কেজিৰ পৰা দ্বাদশ মানদণ্ডলৈ) পাঁচবছৰলৈ কমাই অনা এক দ্ৰুত আৰু তীব্ৰ পাঠ্যক্ৰম। হাফিজ সকল অতি তীক্ষ্ণ বুদ্ধিমত্তাৰ অধিকাৰী লগতে পৰিশ্ৰমি আৰু সমৰ্পিত। কিন্তু আধুনিক শিক্ষাৰ অভাৱত এনেকুৱা যুৱক-যুৱতীসকলে অৱশেষত মছজিদ আৰু মাদ্ৰাছাসমূহত নামাজ আৰু কোৰান পঢ়াতে ব্যস্ত থাকে। আমি এই যুৱ সকলক পথ প্ৰদৰ্শন কৰিব বিচাৰো যাতে তেওঁলোকে আমাৰ দেশৰ বাবে তেওঁলোকৰ সামৰ্থ্য আৰু স্বাৰ্থ অনুসৰি চিকিৎসক, অভিযন্তা, প্ৰশাসক, উকীল আদি হোৱাৰ সুযোগ পাই।"
এটা শ্ৰেণীকোঠাতৰ দৃশ্য
চৌধুৰীয়ে মাৰ্কাজ ইনষ্টিটিউট অফ মডাৰ্ণ এডুকেশ্বনৰ (এম আই এম ই) নেতৃত্ব দি আহিছে।
"এম এই এম ইৰ অধীনত শিক্ষা গ্ৰহণ কৰি এজন হাফিজে এন ই ই টি, আই আই টি, জে ই ই আদিৰ দৰে সৰ্বভাৰতীয় চিকিৎসা আৰু অভিযান্ত্ৰিক পৰীক্ষাত উত্তীৰ্ণ হ'বলৈ সক্ষম হ'ব। হাফিজসকলে আগ্ৰহ আৰু পছন্দ অনুসৰি চিকিৎসা, কাৰিকৰী আৰু অন্যান্য পেছাদাৰী পাঠ্যক্ৰমত নামভৰ্তি কৰিবলৈ সক্ষম হ'ব। শেহতীয়াকৈ অনুষ্ঠিত কৰা বাচনি পৰীক্ষাত অৱতীৰ্ণ হোৱা ১৫০ জন হাফিজৰ ভিতৰত শীৰ্ষ ২৪ জনক মাৰ্কাজুল মা'ৰিফ বিদ্যালয়ত নামভৰ্তি কৰোৱা হৈছে," চৌধুৰীয়ে কয়।
চৌধুৰীয়ে কয় যে পবিত্ৰ কোৰানৰ শব্দবোৰ শাৰী অনুসৰি আৰু পাৰা হিচাপত মনত ৰখাটো এক যথেষ্ট কঠিন কাম। তেওঁ কয়: "কিন্তু হাফিজে এনে কঠিন কামটোক সহজ কৰি তুলিব পাৰে। বৈজ্ঞানিক গৱেষণাই প্ৰমাণ দিছে যে হাফিজৰ আইকিউ বহুত বেছি আৰু তেওঁলোকে সাধাৰণ শিক্ষাৰ যিকোনো শাখাত শৈক্ষিক ভাৱে উৎকৃষ্ট ফলাফল দেখুৱাব পাৰে। দ্বিতীয়তে তেওঁলোকৰ মনোযোগ যথেষ্ট বেছি কিয়নো তেওঁলোকে একেৰাহে ৩ ৰ পৰা ৪ ঘণ্টা কোৰান পাঠ কৰে। গতিকে এনেকুৱা প্ৰতিভাবোৰ যাতে সাধাৰণ শিক্ষাৰ পৰা বঞ্চিত নহয় তাৰ বাবেই মাৰ্কাজুল মা'ৰিফে এনেকুৱা পদক্ষেপ আৰম্ভ কৰিছে।"
এক সমাৱেশৰ সময়ত শিক্ষাৰ্থীসকল
১৯৮২ চনত স্থাপিত এক বেচৰকাৰী সমাজ কল্যান সংগঠন মাৰ্কাজুল মা'ৰিফ সামজ কল্যানৰ কাম কাজত শীৰ্ষ স্থানত আছে। যাৰ ভিতৰত কৃষি, সাহাৰ্য্য আৰু পুনৰসংস্থাপন, পৰিবেশ প্ৰচাৰ, দক্ষতা বিকাশ, জাতি আৰু নিযুক্তি আদি প্ৰধান। সকলো সামাজিক আৰু মানৱীয় কাৰ্যকলাপৰ উপৰিও শিক্ষা সদায়ে আটাইতকৈ গুৰুত্বপূৰ্ণ প্ৰকল্প লগতে মাৰ্কাজুল মা'আৰিফৰ সকলো কাৰ্যসূচীৰ শীৰ্ষত আছে।
সংগঠনটোৱে শিক্ষাৰ ওপৰত বিশেষ গুৰুত্ব আৰোপ কৰাৰ উপৰিও শিক্ষাগতভাৱে পিছপৰা অঞ্চলত শিক্ষানুষ্ঠান স্থাপন কৰি আহিছে। ৰাজ্যখনৰ বেছিভাগ গ্ৰাম্য আৰু পিছপৰা অঞ্চলত ইংৰাজী আৰু অসমীয়া মাধ্যমৰ বিদ্যালয় স্থাপন কৰি পৰ্যাপ্ত আন্তঃগাঁথনি প্ৰদান কৰা লগতে শিক্ষিত আৰু নিষ্ঠৱান কৰ্মচাৰী নিযুক্তি দিয়া হয় যাতে সমাজখনক তেওঁলোকৰ প্ৰয়োজনীয়তাৰ ওপৰত শিক্ষা দিব পাৰে।
বিদ্যালয়ৰ টাইকোৱাণ্ডো খেলুৱৈসকল
১৯৯৪ চনত হোজাইত প্ৰথমখন বিদ্যালয়ৰ সৈতে আৰম্ভণি কৰি এন জি অ' টোৱে এতিয়া 'মাৰ্কাজ একাডেমী'ৰ অধীনত ৪২ খন বিদ্যালয় স্থাপন কৰিছে আৰু অসমৰ সামাজিক আৰু শৈক্ষিকভাৱে পিছপৰা অঞ্চলৰ শিক্ষাৰ্থীসকলক মানদণ্ড থকা শিক্ষা প্ৰদান কৰি আহিছে। মাৰ্কাজ একাডেমী গ্ৰুপ অফ স্কুলত ২০২১ শিক্ষাবৰ্ষত সমগ্ৰ অসমত প্ৰায় ১৪৫০০ ৰো অধিক শিক্ষাৰ্থী আৰু ১০০০ ৰো অধিক শিক্ষক আৰু কৰ্মচাৰী আছে।
