হিন্দু মুছলমানৰ মিলন ভূমি নগাঁওৰ চলচলি অঞ্চল। এই চলচলিতেই যুগ যুগ ধৰি শান্তি সম্প্ৰীতিৰে বাস কৰি আহিছে হিন্দু-মুছলমান উভয় সম্প্ৰদায়ৰ লোকসকল।
তেওঁলোকে ইয়াত বিভিন্ন সময়ত বিভিন্ন প্ৰকাৰে সম্প্ৰীতিৰ নিদৰ্শন দাঙি ধৰি আহিছে। অঞ্চলটোৰ হিন্দু-মুছলমান ৰাইজে এই নিদৰ্শন পুনৰ এবাৰ প্ৰতিপন্ন কৰিছে। কেইগৰাকীমান মুছলমান লোকৰ বিশেষ উদ্যোগত অলপতে চলচলি মুছলিম গাঁও আহতৰ তলত আৰম্ভ হৈছে এখন সাপ্তাহিক বজাৰ।
সুধাকন্ঠ ড০ ভূপেন হাজৰিকাৰ উপজা দিনটোত চলচলিত স্থাপন হোৱা এই সাপ্তাহিক বজাৰখনে বৃহত্তৰ চলচলি অঞ্চলকে ধৰি ওচৰৰ প্ৰায় ২৫খন গাঁৱৰ ক্ৰেতা বিক্ৰেতাক উপকৃত কৰিব। প্ৰতি বৃহস্পতিবাৰে হ'ব লগা এই বজাৰখন বৃহত্তৰ চলচলি অঞ্চলৰ ৰাইজৰ কাৰণে অতি প্ৰয়োজনীয় আছিল।
এই অঞ্চলটোত এখন বজাৰৰ প্ৰয়োজন বহু দিনৰ পৰা ৰাইজে অনুভৱ কৰি আহিছিল, যদিও এয়া হৈ উঠা নাছিল। এইক্ষেত্ৰত চলচলি অঞ্চলৰ অভিযন্ত্ৰা হাফিজুৰ ৰহমান,তজমুদ্দিন আহমেদ,আব্দুৰ ৰৌফ, জিলা পৰিষদ প্ৰাক্তন সদস্য কুতুবুদ্দিন বখতিয়াৰে বিশেষ উদ্যোগ গ্ৰহন কৰি স্থাপন কৰিলে এখন সাপ্তাহিক বজাৰ।
চলচলি মুছলিম গাঁও আহতৰ তলৰ সাপ্তাহিক বজাৰৰ এক দৃশ্য
বৃহত্তৰ চলচলি অঞ্চলৰ লগতে নিকটৱৰ্তী অঞ্চলৰ ব্যৱসায়ীসকলে নিজৰ ঘৰত উৎপাদন হোৱা সামগ্ৰীসমূহ ঘৰৰ ওচৰতে বিক্ৰী কৰিব পৰাকৈ মুকলি হোৱা এই বজাৰখনৰ শুভ উদ্বোধনে স্থানীয় বাসিন্দাসকলক উৎফুল্লিত কৰি তুলিছে। যোৱা ৮ ছেপ্তেম্বৰত বজাৰ উদ্বোধন উপলক্ষে এক বিশেষ কাৰ্যসূচী গ্ৰহন কৰে উদ্যোক্তাসকলে।