নতুন দিল্লী
উদয়পুৰত দৰ্জী কানহাইয়া লালক শিৰশ্চেদ কৰি হত্যা কৰা ৰিয়াজ আখতাৰি আৰু ঘাউছ মহম্মদক শনিবাৰে ৰাষ্ট্ৰীয় তদন্তকাৰী সংস্থাই জিম্মাত লৈছে। এন আই এয়ে অভিযুক্ত দুজনক জয়পুৰৰ বিশেষ আদালতলৈ লৈ যাব আৰু ১৪ দিনৰ বাবে জিম্মাত বিচৰাৰ সম্ভাৱনা আছে।
অনুমান কৰা হৈছে যে ৰিয়াজ আখতাৰি আৰু ঘাউছ মহম্মদ ইছলামিক ষ্টেট অৱ ইৰাক এণ্ড ছিৰিয়া (আইছিছ)ৰ সৈতে যোগাযোগত আছিল।
উল্লেখ্য যে, ইছলামক অপমান কৰাৰ প্ৰতিশোধ লোৱা বুলি দাবী কৰি অভিযুক্ত যুৱক দুজনে কানহাইয়া লালক শিৰশ্চেদ কৰে আৰু ইয়াৰ ভিডিঅ' প্ৰস্তুত কৰি ছ’চিয়েল মিডিয়াত প্ৰকাশ কৰে। সমগ্ৰ বিশ্বৰ সন্ত্ৰাসবাদী সংগঠনসমূহে এই ভিডিঅ’টো উপভোগ কৰা উচিত বুলি তেওঁলোকে উল্লেখ কৰে।
অভিযোগ উত্থাপন হৈছে যে ঘাউছে সন্ত্ৰাসবাদী পটভূমিৰ ৯ জন পাকিস্তানী নাগৰিকৰ সৈতে যোগাযোগত আছিল। হত্যাকাণ্ডৰ সময়ত পাকিস্তানৰ পৰা তেওঁলৈ কেইবাটাও ফোন আহিছিল। তেওঁৰ পাকিস্তানী হেণ্ডলাৰে তেওঁক আৰু অধিক সন্ত্ৰাসবাদী কাম কৰিবলৈ উৎসাহিত কৰিছিল।
২০১৪ চনত ঘাউছে কৰাচীলৈ গৈছিল য’ত তেওঁ দাৱাট-ই-ইছলামী সংগঠনৰ সংস্পৰ্শলৈ আহিছিল। তেতিয়াৰ পৰাই তেওঁ তেওঁলোকৰ সৈতে যোগাযোগত আছিল। তাত তেওঁ সন্ত্ৰাসবাদৰ প্ৰশিক্ষণ লৈছিল বুলি আৰক্ষীয়ে দাবী কৰিছে।