এই সন্দৰ্ভত নাজনীনে কয়, "২০০০ চনত মই চিগনেটশ্বাৰৰ সৌন্দৰ্যচৰ্চাৰ প্ৰশিক্ষণ লৈছিলোঁ। তৰ পিছত মই নগাঁৱত মোৰ বাসগৃহৰ এটা সৰু কোঠাত সৰুকৈ এখন পাৰ্লাৰ খুলিছিলো। তাত মোৰ ট্ৰেইনিং চেণ্টাৰ নাছিল। মই তাত মাত্ৰ যুৱতী তথা মহিলাসকলৰ সৌন্দৰ্যচৰ্চাৰ কাম কৰিছিলো। সেই সময়ত মই এনেকুৱা বহু ছোৱালী লগ পাইছিলো, যিসকল উচ্চ শিক্ষিত হয়, কিন্তু আৰ্থিকভাৱে দৈন্য। মই সদায় ভাবিছিলো মই এই যুৱতীসকলৰ বাবে যদি কিবা এটা কৰিব পাৰিলো হয়। পিছত কলিয়াবৰত যেতিয়া মই মোৰ পাৰ্লাৰ খুলিলো তাত মই অৰ্থিকভাৱে দৈন্য উচ্চ শিক্ষিত যুৱতীসকলক প্ৰশিক্ষণ দিয়া আৰম্ভ কৰিছিলো। বৰ্তমানলৈ প্ৰায় হাজাৰৰোধিক যুৱতীয়ে মোৰ পৰা প্ৰশিক্ষণ গ্ৰহন কৰিছে আৰু নিজে স্বাৱলম্বী হবলৈ সক্ষম হৈছে। যিটো মোৰ বাবে এক বৃহৎ সফলতা বুলি মই ভাবো। এতিয়াও মই যুৱতীসকলক ছয়মহীয়া ডিপ্লমা/এবছৰীয়া এডভান্স ডিপ্লমা আৰু এমহীয়া/১৫ দিনীয়া মেকআপ আৰ্টিষ্টৰ প্ৰশিক্ষণ দি আহিছো।"