Story by atv | Posted by Imtiaz Ahmed • 1 Years ago
প্ৰতিভাবান যুৱ খেলুৱৈ চার্জিক আলম
আৰিফুল ইছলাম / গুৱাহাটী
প্ৰতিভা বিকাশৰ ক্ষেত্ৰত দৰিদ্ৰতা কেতিয়াও অন্তৰায় হ'ব নোৱাৰে। চেষ্টা আৰু সাধনা থাকিলে সকলো কামতেই সফল হ'ব পাৰি। এই কথা প্ৰমাণ কৰি দেখুৱাইছে এগৰাকী প্ৰতিভাৱান যুৱকে। ফুটবলেৰে জগত জিনাৰ সপোন দেখা যুৱকজন হ’ল ছার্জিক আলম।
মাত্ৰ ১৪ বছৰ বয়সতে তেওঁ বিশ্বমুখী হোৱাৰ সুযোগ লাভ কৰিছে। অসমৰ প্ৰতিভাৱান ফুটবলাৰজনে পৰ্তুগালত অনুষ্ঠিত হ'বলগীয়া ইণ্টাৰনেচনেল ইউথ কাপ ২০২২ ত খেলিবলৈ সুযোগ পাইছে। ১৪ বছৰ অনুৰ্ধ ভাৰতীয় ফুটবল দলৰ গ'লৰক্ষক হিচাপে খেলিব কামৰূপ জিলাৰ ডেকাৰকুছিৰ চার্জিক আলমে। প্ৰতিভা আৰু দক্ষতাৰ বলত তেওঁ ভাৰতীয় জুনিয়ৰ ফুটবল দলত স্থান দখল কৰিবলৈ সক্ষম হৈছে।
মিনাৰ্ভা পাঞ্জাৱৰ জাৰ্চি পৰিহিত চার্জিক
সৰুৰে পৰা ফুটবলৰ প্ৰতি আগ্ৰহী চার্জিক আলমে গাওঁত ৰবাব টেঙাৰ বলেৰে ফুটবল খেলিবলৈ আৰম্ভ কৰিছিল। কামৰূপ জিলাৰ অন্তৰ্গত ডেকাৰকুছি গাঁওত জন্ম লাভ কৰা ফুটবলাৰজনে বৰ্তমান মাতৃৰ সৈতে গুৱাহাটীৰ হাতীগাঁওৰ এটা ভাড়াঘৰত থাকে। নৱম শ্ৰেণীত পঢ়া চার্জিক আলমে গুৱাহাটীৰ ভাড়াঘৰত থাকিয়েই পঢ়া-শুনা কৰে আৰু ফুটবলৰ অনুশীলন চলাই আছে। ধনৰ অভাৱত তেওঁ হাতীগাঁওৰ ভাড়াঘৰৰ পৰা সৰুসজাই ষ্টেডিয়ামলৈ খোজকাঢ়ি অনুশীলন কৰিবলৈ যায়।