অনুষ্ঠানত অংশ গ্ৰহণ কৰি প্ৰাইড ইষ্ট এণ্টাৰটেইণ্টমেণ্ট প্ৰাইভেট লিমিটেডৰ মুখ্য পৰিচালন সঞ্চালিকা তথা সমাজকৰ্মী ৰিণিকি ভূঞা শৰ্মাই ভাষণত ঝিক বেদৰ কথা উল্লেখ কৰি কয়, "ঝিক বেদত নাৰীৰ স্থান খুব উচ্চ। নাৰী সকলক শাৰীৰিকভাৱে, অৰ্থনৈতিকভাৱে, প্ৰশাসনিকভাৱে সকলো দিশতে উচ্চ স্থানত পোৱা গৈছিল। কিন্তু বৰ্তমান আমি লাহে লাহে নিজৰ মৰ্য্যদা উচ্চৰ নিম্নলৈ নমাই আহিছোঁ আৰু এনেকুৱা এটা স্থানত উপনীত হৈছোঁ যে আমি নাৰীহে ঘৰত থাকি স্বামী, লৰা ছোৱালী তথা পৰিয়ালক ভালদৰে যতন লোৱাটোৱে আমাৰ একমাত্ৰ কাম। কিন্তু সেইটো নহয়, মই ভাবোঁ প্ৰকৃতিয়ে নাৰীক  পুৰুষতকৈ পৃথককৈ সৃষ্টি কৰিছে। সেয়ে নাৰীসকল  শাৰীৰিকভাৱে পুৰুষতকৈ  দুৰ্বল হয়। কিন্তু নাৰীসকল মানসিকভাৱে পুৰুষৰ সমানে শক্তিশালী। কিয়নো মহিলাসকলে নিজে নিজকে আগুৱাই লৈ যাব লাগে, নিজে নিজৰ পথ প্ৰদৰ্শক হব লাগে। সেয়েহে এগৰাকী মহিলাই কৰা ত্যাগ, কৰ্মৰাজি আদি সকলোবোৰ  এখন সমাজৰ বাবে আগবঢ়োৱা উৎকৃষ্ট অৱদান।"

বিশিষ্ট উপন্যাসিকা মনিকুন্তলা ভট্টাচাৰ্যই কয়, "পৃথিৱীত এসময়ত নাৰীৰ অধিকাৰ বিচাৰি যি আলোড়নৰ সৃষ্টি হৈছিল সেয়াই আজি সফল হৈছে। কিয়নো আজি নাৰী বহুত দূৰ আগবাঢ়ি গৈছে। নাৰী শিক্ষিত হ'লেহে লৰা ছোৱালী শিক্ষিত হব আৰু তেতিয়াহে এখন সমাজ শিক্ষিত হব।"