ছাইল্ড ফ্রেণ্ডলী গুৱাহাটীৰ উদ্ধাৰ সমন্বয়ক ঝৰ্ণা চক্ৰৱৰ্তীয়ে কয়; "স্নেহালয়াৰ অধীনত চাইল্ড ফ্রেণ্ডলী গুৱাহাটীৰ এই প্ৰকল্পটোত আমি শিশু শ্ৰমিক, বাল্য বিবাহ আৰু মাদক দ্ৰব্য সেৱনৰ বিৰুদ্ধে সজাগতা সৃষ্টি কৰি আছোঁ। ছাইল্ড ফ্রেণ্ডলী গুৱাহাটী প্ৰকল্পটোৰ উদ্যোগত আজি আমি ৱাল পেইণ্টিং কৰিছোঁ। সিজুবাৰী, নটবমা আৰু মাজাৰৰ ওচৰত আজি ৱাল পেইণ্টিংৰ জৰিয়তে সজাগতা সৃষ্টি কৰা হ'ব। ৱাল পেইণ্টিং সজাগতাৰ আহিলা হিচাপে বাচি লোৱাৰ কাৰণ হ'ল সৰু লৰা-ছোৱালীয়ে ৰং ভাল পায় আৰু ৰং-বিৰঙী চিত্ৰই নিশ্চয় শিশুসকলক আকৰ্ষিত কৰিব। ৱাল পেইণ্টিংৰ উপৰিও আমি বিভিন্ন মাধ্যমেৰে আমি সজাগতাৰ সৃষ্টি কৰোঁ।"
শিশু সুৰক্ষা বিষয়া মোছাব্বিৰ হুছেইনে কয়; "এই প্ৰকল্পটোৰ অধীনত শিশুৰ ওপৰত বিভিন্ন কাম-কাজ কৰি আছোঁ। ২০১৩ চনৰ পৰাই চাইল্ড ফ্রেণ্ডলী গুৱাহাটীয়ে সমগ্ৰ গুৱাহাটীত ৪০ টাৰো অধিক কেন্দ্ৰত আমি বিনামূলীয়া শিক্ষা প্ৰদান কৰি আছোঁ। তাৰোপৰি শিশু শ্ৰমিক, বাল্য বিবাহ আদিৰ বিৰুদ্ধে বিভিন্ন প্ৰকাৰে সজাগতাৰ সৃষ্টি কৰি আছোঁ। যিসকল শিশু আমাৰ প্রকল্পৰ সুবিধা লাভ কৰাৰ যোগ্য, তেওঁলোক আমি চিনাক্ত কৰোঁ আৰু উদ্ধাৰ কৰোঁ। লগতে তেওঁলোকক আমাৰ প্ৰকল্পৰ অধীনত সুবিধা প্ৰদান কৰোঁ। আমাৰ সৈতে আন বহু কেইটা সংগঠন জড়িত।"
চাইল্ড ফ্রেণ্ডলী গুৱাহাটীয়ে ১৮ ৰ পৰা২৭ বছৰ যিসকল যুৱক-যুৱতীয়ে অভাবৰ বা অন্য বিভিন্ন কাৰণত স্কুলীয়া বা কলেজীয়া শিক্ষা আধাতেই সমাপ্ত কৰিবলগীয়া হয়, তেওঁলোকৰ বাবে কাৰিকৰী শিক্ষা প্রদানৰ আৰু সংস্থাপনৰ ক্ষেত্ৰতো সহযোগিতা আগবঢ়ায়। চি এফ জিৰ নিজাববীয়া ৩ টা কাৰিকৰী শিক্ষা প্ৰদান কেন্দ্ৰ থকাৰ ওপৰিও ৰাজ্য চৰকাৰৰ অধীনত বিভিন্ন আঁচনিৰ জৰিয়তে কাৰিকৰী শিক্ষা প্ৰদান আৰু সংস্থাপনৰ ব্যৱস্থা কৰা প্ৰতিস্থানসমূহৰ লগতো চি এফ জিয়ে সম্পর্ক স্থাপন কৰিছে।