স্বামীহাৰা জায়েদা খাতুনে ছয়টা সন্তানৰ দায়িত্ব পালন কৰাৰ সমান্তৰালকৈ আশাকৰ্মী হিচাপে নিষ্ঠাৰে কৰ্তব্য পালন কৰি শেহতীয়াকৈ ৰাজ্যৰ ভিতৰত অধিক মাননী পোৱা আশাকৰ্মীসকলৰ ভিতৰত চতুৰ্থ স্থান দখল কৰিছে। জায়েদা খাতুনে ২০২১ বিত্তীয় বৰ্ষত মাহে গড় ১৮,১৩৫ টকাকৈ বছৰেকত ২,১৭,৬৩০ টকা উপাৰ্জন কৰি আৰ্থিকভাৱে স্বচ্ছল হোৱাৰ লগতে গ্ৰামাঞ্চল মহিলা সকলৰ বাবে এক আদৰ্শ মহিলা হিচাপে পৰিগণিত হৈছে। 

তদুপৰি, যোৱা মে’-জুনত হোৱা সংহাৰী বানৰ সময়ত আশাকৰ্মী জায়েদা খাতুনে নিজৰ জীৱনক তুচ্ছ জ্ঞান কৰি বান বিধ্বস্ত পশ্চিম পানধোৱা গাঁওৰ তিনি হাজাৰ লোকক প্ৰয়োজনীয় প্ৰাথমিক স্বাস্থ্য সেৱা আগবঢ়াই অঞ্চলবাসীৰ প্রিয়পাত্ৰ হৈ পৰে। লগতে তেওঁ লখিমপুৰ স্বাস্থ্য বিভাগৰ প্ৰশংসা বুটলিবলৈ সক্ষম হয়।