আমিনুল হকে গুৱাহাটী বিশ্ববিদ্যালয়ৰ পৰাই চুটিছবি নিৰ্মাণৰ আৰম্ভণি কৰিছিল। যোগাযোগ আৰু সাংবাদিকতা বিভাগত চুটিছবি পাঠ্যক্ৰমৰ অন্তৰ্গত আছিল। সকলোবোৰ ছাত্ৰ-ছাত্ৰীৰ সৈতে আমিনুলেও চুটিছবি নিৰ্মাণ কৰিছিল। অসমৰ চৰ চাপৰি অঞ্চলৰ ওপৰত আমিনুলে ছাত্ৰ অৱস্থাত প্ৰথম তথ্যচিত্ৰ নিৰ্মান কৰিছিল। আমিনুলৰ প্ৰথম চুটিছবি 'মৰিচিকাৰ ৰং' নিৰ্মান কৰাৰ নামত মাত্ৰ ৫০০ টকা খৰচ কৰিছিল আৰু 'হ'প নটআউট' নামৰ আহিবলগীয়া নতুন ছবিখনৰ বাজেট প্ৰায় ৩০০০০ টকা। 

আমিনুলে কয়; "অনুপ্ৰেৰণা বুলি কলে, মোৰ নিজৰ অনুপ্ৰেৰণা মই নিজেই। নিজকে সমালোচনা কৰোঁ। কেতিয়াবা কান্দো আৰু কেতিয়াবা হাহো। নিজকে বুজিবলৈ চেষ্টা কৰো। মোৰ মা দেউতাই মোক বহুত সমৰ্থন কৰে। এতিয়ালৈ চাকৰিৰ কাৰণে মোক হেঁচা প্ৰয়োগ কৰা নাই। স্বাধীন ভাবে নিজেই কাম কৰিব সুবিধা পাইছোঁ। বিভিন্ন ক্ষেত্ৰত, মোৰ মহাবিদ্যালয় আৰু বিশ্ববিদ্যালয়ৰ শিক্ষাগুৰু সকলে যথেষ্ট সহায় সহযোগিতা আগবঢ়াই। মোৰ গাঁৱৰ মানুহে মোক সহায় কৰে। নিৰ্দিষ্ট সীমাত মই ৰৈ থাকিব নিবিচাৰোঁ। বহুত ডাঙৰ কিবা এটা কৰাৰ হেঁপাহ আছে।"