লেহ
কেন্দ্ৰীয়শাসিত অঞ্চল লাডাখৰ ন্যায়িক ব্যৱস্থাৰ ক্ষেত্ৰত এক গুৰুত্বপূৰ্ণ পদক্ষেপ হিচাপে দেওবাৰে লেহত জম্মু-কাশ্মীৰ আৰু লাডাখ উচ্চ ন্যায়ালয়ৰ স্থায়ী বিচাৰপীঠ উদ্বোধন কৰিব ভাৰতৰ মুখ্য ন্যায়াধীশ ন্যায়াধীশ সূৰ্য কান্তই। এই অনুষ্ঠানত লাডাখৰ উপ-ৰাজ্যপাল বিনয় কুমাৰ ছাক্সেনাও উপস্থিত থাকিব।
লাডাখৰ মুখ্য সচিব আশীষ কুন্দ্ৰাই এই পদক্ষেপক অঞ্চলটোৰ জনসাধাৰণৰ বাবে এক উল্লেখযোগ্য সাফল্য হিচাপে অভিহিত কৰিছে। তেওঁৰ মতে, নতুন বিচাৰপীঠ স্থাপনৰ ফলত লাডাখৰ বাসিন্দাসকলে এতিয়াৰে পৰা নিজৰ অঞ্চলতে উচ্চ ন্যায়ালয়ৰ ন্যায়িক সেৱা লাভ কৰাৰ সুযোগ পাব।
শনিবাৰে এই সন্দৰ্ভত মন্তব্য কৰি কুন্দ্ৰাই কয় যে লাডাখৰ দৰে দুৰ্গম ভৌগোলিক পৰিৱেশৰ অঞ্চলত উচ্চ ন্যায়ালয়ৰ স্থায়ী বিচাৰপীঠ স্থাপন কৰাটো অত্যন্ত গুৰুত্বপূৰ্ণ। বিশেষকৈ অঞ্চলটোৰ দূৰৱৰ্তী আৰু দুৰ্গম এলেকাত বসবাস কৰা লোকসকলে দীৰ্ঘদিন ধৰি উচ্চ ন্যায়িক প্ৰতিষ্ঠানৰ কাষ চাপিবলৈ বিভিন্ন সমস্যাৰ সন্মুখীন হৈ আহিছিল।
প্ৰতিকূল বতৰ, দুৰ্গম পাহাৰীয়া পথ আৰু দীঘলীয়া যাত্ৰাৰ বাবে লাডাখৰ সাধাৰণ নাগৰিকসকলৰ বাবে উচ্চ ন্যায়ালয়ত উপস্থিত হৈ ন্যায় বিচৰাটো সহজ নাছিল। নতুন বিচাৰপীঠ স্থাপনে এই সমস্যাসমূহ বহু পৰিমাণে লাঘৱ কৰিব বুলি আশা প্ৰকাশ কৰিছে মুখ্য সচিবগৰাকীয়ে।
কুন্দ্ৰাই কয়, “এয়া এক অত্যন্ত গুৰুত্বপূৰ্ণ পদক্ষেপ। বিগত ৪০ বছৰত ভাৰতৰ উচ্চ ন্যায়ালয়সমূহৰ ইতিহাসলৈ লক্ষ্য কৰিলে এনেদৰে আন কোনো উচ্চ ন্যায়ালয়ৰ স্থায়ী বিচাৰপীঠ স্থাপন কৰা হৈছে বুলি মোৰ মনত নপৰে।”
এই প্ৰসংগত তেওঁ অৰুণাচল প্ৰদেশত গুৱাহাটী উচ্চ ন্যায়ালয়ৰ বিচাৰপীঠ স্থাপনৰ উদাহৰণ দাঙি ধৰে। লগতে পূৰ্বতে গোৱালিয়ৰতো অনুৰূপ বিচাৰপীঠ স্থাপন কৰা হৈছিল বুলি তেওঁ উল্লেখ কৰে।
লাডাখবাসীৰ বাবে নতুন ব্যৱস্থাটোৰ ব্যৱহাৰিক সুবিধাৰ কথা উল্লেখ কৰি মুখ্য সচিবগৰাকীয়ে কয় যে এতিয়াৰে পৰা ন্যায় বিচাৰি আবেদন কৰিব বিচৰা লোকসকলে শ্ৰীনগৰ অথবা জম্মুলৈ যাত্ৰা কৰাৰ প্ৰয়োজন নহ’ব। বিশেষকৈ উচ্চ ন্যায়ালয়ত ৰিট আবেদন দাখিল কৰিব বিচৰা নাগৰিকসকলৰ বাবে এই ব্যৱস্থা যথেষ্ট সহায়ক হ’ব।
তেওঁ কয়, “জনসাধাৰণৰ ওচৰলৈ ন্যায়িক সেৱা আগবঢ়াই নিয়াটো এক বৃহৎ সাফল্য। ইয়াৰ পূৰ্বে কোনো ব্যক্তিয়ে অন্যায়ৰ সন্মুখীন হৈ ৰিট আবেদন দাখিল কৰিব বিচাৰিলে শ্ৰীনগৰ অথবা জম্মুলৈ যাবলগীয়া হৈছিল। কিন্তু এতিয়াৰে পৰা লেহতেই সেই সুবিধা উপলব্ধ হ’ব। নিঃসন্দেহে এয়া এক অত্যন্ত ইতিবাচক পৰিৱৰ্তন।”
মুখ্য সচিবগৰাকীয়ে লগতে উল্লেখ কৰে যে মাত্ৰ দুমাহৰ ভিতৰতে এই গুৰুত্বপূৰ্ণ পদক্ষেপ বাস্তৱ ৰূপ লাভ কৰিছে। লক্ষণীয়ভাৱে, কেন্দ্ৰীয় চৰকাৰৰ সৈতে আলোচনাত মিলিত হোৱা লাডাখৰ প্ৰতিনিধিসকলৰ দাবীসমূহৰ ভিতৰতো উচ্চ ন্যায়ালয়ৰ স্থায়ী বিচাৰপীঠ স্থাপনৰ বিষয়টো অন্তৰ্ভুক্ত নাছিল।
কুন্দ্ৰাৰ মন্তব্য অনুসৰি, এই পদক্ষেপ কেন্দ্ৰীয় চৰকাৰৰ নিজাববীয়া উদ্যোগত গ্ৰহণ কৰা হৈছে। তেওঁ কয়, “লাডাখৰ দুৰ্গম ভৌগোলিক পৰিৱেশ আৰু ইয়াৰ জনসাধাৰণে সন্মুখীন হোৱা সমস্যাসমূহ কেন্দ্ৰীয় চৰকাৰে ভালদৰেই উপলব্ধি কৰিছে। সেইবাবেই জনসাধাৰণে নিজৰ বাসস্থানৰ ওচৰতে ন্যায় লাভ কৰাৰ সুবিধা নিশ্চিত কৰাটো চৰকাৰে বিশেষ গুৰুত্বসহকাৰে বিবেচনা কৰিছে।”
উল্লেখযোগ্য যে, লাডাখ কেন্দ্ৰীয়শাসিত অঞ্চলত জম্মু-কাশ্মীৰ আৰু লাডাখ উচ্চ ন্যায়ালয়ৰ স্থায়ী বিচাৰপীঠ স্থাপনৰ পথ মুকলি কৰা বিধিগত ব্যৱস্থাটো যোৱা ৫ ছেপ্টেম্বৰৰ পৰা কাৰ্যকৰী হৈছিল।
ইয়াৰ পূৰ্বে ২৭ আগষ্টত ভাৰতৰ ৰাষ্ট্ৰপতিয়ে এই সম্পৰ্কীয় বিনিয়ম জাৰি কৰিছিল। বিনিয়মটোত উল্লেখ কৰা অনুসৰি, চৰকাৰী ৰাজপত্ৰত অধিসূচনা প্ৰকাশ কৰি প্ৰশাসকে নিৰ্ধাৰণ কৰা তাৰিখৰ পৰা ইয়াৰ বিধানসমূহ কাৰ্যকৰী হোৱাৰ কথা আছিল।
সেই অনুসৰি লাডাখৰ উপ-ৰাজ্যপাল বিনয় কুমাৰ ছাক্সেনাই ৫ ছেপ্টেম্বৰ তাৰিখটো বিনিয়মখন কাৰ্যকৰী হোৱাৰ দিন হিচাপে নিৰ্ধাৰণ কৰে।
উপ-ৰাজ্যপাল ছাক্সেনাই এই পদক্ষেপক লাডাখৰ ন্যায়িক ব্যৱস্থাৰ ইতিহাসত এক ঐতিহাসিক সিদ্ধান্ত হিচাপে অভিহিত কৰিছে। তেওঁৰ মতে, ইয়াৰ জৰিয়তে অঞ্চলটোৰ জনসাধাৰণৰ বাবে ন্যায় লাভৰ প্ৰক্ৰিয়া অধিক সহজ আৰু সুলভ হৈ পৰিব।
লাডাখৰ ন্যায়িক ব্যৱস্থা অধিক শক্তিশালী কৰাৰ ক্ষেত্ৰত গ্ৰহণ কৰা এই পদক্ষেপৰ বাবে উপ-ৰাজ্যপালগৰাকীয়ে ৰাষ্ট্ৰপতি দ্ৰৌপদী মুৰ্মু, প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ প্ৰতি কৃতজ্ঞতা প্ৰকাশ কৰিছে।
লেহত উচ্চ ন্যায়ালয়ৰ স্থায়ী বিচাৰপীঠ স্থাপনৰ ফলত বিশেষকৈ লাডাখৰ দুৰ্গম আৰু দূৰৱৰ্তী অঞ্চলসমূহৰ বাসিন্দাসকলে ন্যায়িক সেৱা লাভৰ ক্ষেত্ৰত দীৰ্ঘদিন ধৰি সন্মুখীন হৈ অহা সমস্যাসমূহৰ পৰা সকাহ পাব বুলি আশা কৰা হৈছে। এই পদক্ষেপে অঞ্চলটোৰ ন্যায়িক আন্তঃগাঁথনি শক্তিশালী কৰাৰ লগতে সাধাৰণ জনতাৰ বাবে ন্যায়প্ৰাপ্তিৰ পথ অধিক সুগম কৰি তুলিব।
.webp "নৱৰাত্ৰি উপলক্ষে দেৱী শৈলপুত্ৰীক প্ৰণাম জনাই দেশবাসীক শুভেচ্ছা প্ৰধানমন্ত্ৰী মোদীৰ")
.webp)
