গুৱাহাটী
উজনি অসমত শেহতীয়াকৈ সংঘটিত হোৱা প্ৰলয়ংকাৰী বানপানীয়ে কেৱল জনজীৱনকেই ক্ষতিগ্ৰস্ত কৰা নাছিল, বৰঞ্চ অসমীয়া চলচ্চিত্ৰ জগততো ইয়াৰ বিৰূপ প্ৰভাৱ পৰিছিল। বানৰ ভয়াৱহ পৰিস্থিতিৰ প্ৰতি লক্ষ্য ৰাখি চলিত বৰ্ষত মুক্তি পাবলগীয়া বহুকেইখন অসমীয়া ছবিৰ মুক্তিৰ দিন বাতিল বা পিছুৱাই দিবলগীয়া হৈছিল। অৱশ্যে সাম্প্ৰতিক সময়ত পৰিস্থিতি লাহে লাহে স্বাভাৱিক হৈ অহাৰ লগে লগে, স্থগিত ৰখা ছবিসমূহে এতিয়া এখন এখনকৈ ৰূপালী পৰ্দাত খোজ পেলাবলৈ আৰম্ভ কৰিছে।
এই বান পৰিস্থিতিৰ বাবেই মুক্তিৰ একেবাৰে দুৱাৰদলিত উপনীত হৈয়ো দৰ্শকৰ পৰা আঁতৰি থাকিবলগীয়া হৈছিল এখন বিশেষ আৰু বহুল চৰ্চিত ছবি। সেই ছবিখনেই হৈছে বিশিষ্ট পৰিচালক হিমাংশু প্ৰসাদ দাসৰ ‘এক্স ৱাই জেড’। এখন ৰাজনৈতিক কমেডি হিচাপে নিৰ্মাণ কৰা এই ছবিখন চলিত বৰ্ষৰ ২৪ জুলাইত সমগ্ৰ ৰাজ্যজুৰি ছবিগৃহলৈ অহাৰ কথা আছিল। কিন্তু ১৯ জুলাইত অহা কালৰূপী বানৰ প্ৰতি লক্ষ্য ৰাখি নিৰ্মাতাগোষ্ঠীয়ে মুক্তিৰ মাত্ৰ দুদিন পূৰ্বে এক কঠিন সিদ্ধান্ত গ্ৰহণ কৰিবলৈ বাধ্য হয় আৰু ছবিখনৰ মুক্তি সাময়িকভাৱে স্থগিত ৰাখে।
ছবিখনৰ মুক্তি স্থগিত হোৱাৰ পিছৰে পৰা দৰ্শক তথা অনুৰাগীসকলৰ মাজত এক উৎকণ্ঠাৰ সৃষ্টি হৈছিল। "ৰাজনৈতিক প্ৰেক্ষাপটত নিৰ্মিত এই ছবিখন কেতিয়া ছবিগৃহলৈ আহিব?"— এই প্ৰশ্নই নিৰ্মাতাগোষ্ঠী আৰু কলা-কুশলীসকলক অহৰহ মুখামুখি কৰোৱাইছিল। অৱশেষত সকলো প্ৰতীক্ষা আৰু কল্পনা-জল্পনাৰ অন্ত পেলাই যোৱা ২১ অক্টোবৰ তাৰিখে পৰিচালক হিমাংশু প্ৰসাদ দাসে সামাজিক মাধ্যমৰ জৰিয়তে ছবিখনৰ নতুন মুক্তিৰ দিন আনুষ্ঠানিকভাৱে ঘোষণা কৰে। আগন্তুক ২০২৭ চনৰ ৭ মে’ তাৰিখে এই বহুপ্ৰত্যাশিত ছবিখনে ছবিগৃহত দৰ্শকৰ সন্মুখলৈ আহিব।
সামাজিক মাধ্যমৰ সেই বিশেষ পোষ্টটোত পৰিচালকগৰাকীয়ে তেওঁৰ মনৰ ভাৱ প্ৰকাশ কৰি অনুৰাগীসকলক উদ্দেশ্যি লিখিছে— "দৈনিক সন্মুখীন হোৱা এটা প্ৰশ্ন 'XYZ কেতিয়া ৰিলিজ হ'ব?' এই বছৰ ২৪ জুলাইত চিনেমাখনে মুক্তিলাভ কৰাৰ কথা আছিল। কিন্তু ১৯ জুলাইত অহা প্ৰলয়ংকাৰী বানৰ বাবে মুক্তিৰ দুদিন আগত আমি চিনেমাখনৰ মুক্তি স্থগিত ৰাখোঁ।"
তেওঁ লগতে স্পষ্ট কৰি দিয়ে যে ছবিখনৰ পৰৱৰ্তী মুক্তিৰ দিন তেতিয়াই নিৰ্ধাৰণ কৰা হৈছিল যদিও দিনটো বহুদূৰত থকাৰ বাবে লগে লগে ঘোষণা কৰা হোৱা নাছিল। কিন্তু অনুৰাগীৰ একেটা প্ৰশ্নৰ দৈনিক উত্তৰ দি দি ভাগৰ লগাৰ বাবেই অৱশেষত তাৰিখটো ৰাজহুৱা কৰাৰ সিদ্ধান্ত লয়। ছবিখনৰ মুক্তি ইমান দিন পিছুৱাই দিয়াৰ মূল কাৰণ হিচাপে তেওঁ উল্লেখ কৰে যে ইতিমধ্যে আন বহুতো অসমীয়া চিনেমাই নিজৰ মুক্তিৰ তাৰিখ নিৰ্ধাৰণ কৰি থৈছে, সেয়েহে তাৰ মাজত সংঘাত এৰাই চলিবলৈকে এই দীঘলীয়া বিৰতিৰ সিদ্ধান্ত লোৱা হৈছে।
পৰিচালক হিমাংশু প্ৰসাদ দাসে শেষত দৰ্শকক এক সুন্দৰ আশ্বাস প্ৰদান কৰি পোষ্টটোৰ সামৰণি মাৰিছে এইদৰে— "এটা কথা ঠিক, XYZ চিনেমাখনৰ মুক্তিৰ দিন পিছুৱাই গ'লেও, চিনেমাখনৰ কাহিনী আৰু প্ৰাসংগিকতা পুৰণি হৈ নাযায়। আমি আহি আছোঁ।"
পৰিচালকগৰাকীৰ এই প্ৰতিশ্ৰুতিয়ে এতিয়া দৰ্শকৰ মাজত ছবিখনক লৈ থকা আগ্ৰহ আৰু অধিক বৃদ্ধি কৰিছে। ২০২৭ চনৰ ৭ মে’ৰ সেই বিশেষ দিনটোলৈ এতিয়া সকলোৱে অধীৰ আগ্ৰহেৰে বাট চাই ৰৈছে।
