নতুন দিল্লী
উচ্চতম ন্যায়ালয়ে যদি আইন প্ৰণয়ন কৰিব বিচাৰে, তেন্তে দেশত সংসদৰ কোনো প্ৰয়োজন নাই বুলি মন্তব্য কৰাৰ পিছত শনিবাৰে বিতৰ্কৰ সৃষ্টি কৰে বিজেপি সাংসদ নিশিকান্ত ডুবেই।
এক্সত আৰু পিছত সংবাদ সংস্থাসমূহক দিয়া মন্তব্যত ডুবেই কয় যে, "যদি উচ্চতম ন্যায়ালয়ে আইন প্ৰণয়ন কৰিবলগীয়া হয়, তেন্তে সংসদ বন্ধ কৰি দিয়া উচিত।"
শেহতীয়াকৈ প্ৰণয়ন কৰা ৱাকফ (সংশোধনী) আইন, ২০২৫ক লৈ উচ্চতম ন্যায়ালয়ত চলি থকা শুনানিৰ মাজতে তেওঁৰ এই মন্তব্য। শুনানিৰ সময়ত আদালতে ‘ব্যৱহাৰকাৰীৰ দ্বাৰা ৱাকফ’ বিধানকে ধৰি আইনখনৰ কিছুমান বিধানক লৈ প্ৰশ্ন উত্থাপন কৰিছে। ইয়াৰ পিছতে চৰকাৰে শীৰ্ষ আদালতক আশ্বাস দিছে যে ৫ মে’ত পৰৱৰ্তী শুনানি নোহোৱালৈকে ৱাকফ (সংশোধনী) আইনখনৰ কিছু অংশ কাৰ্যকৰী নকৰে।
গোড্ডাৰ চাৰিবাৰৰ সাংসদ ডুবেই শীৰ্ষ আদালতে নিজৰ ক্ষমতাৰ বাহিৰলৈ যোৱাৰ অভিযোগ উত্থাপন কৰে। সংসদজনে গৃহীত কৰা আইনসমূহ আদালতে কৰ্তন কৰি আনকি উচ্চতম ন্যায়ালয়ৰ ন্যায়াধীশ নিযুক্তি দিয়া ৰাষ্ট্ৰপতিকো নিৰ্দেশ দিছে বুলিও তেওঁ কয়। তেওঁ কয় যে সংবিধানৰ ৩৬৮ অনুচ্ছেদৰ অধীনত আইন প্ৰণয়ন সংসদৰ কাম, আৰু আদালতৰ ভূমিকা হৈছে আইনৰ ব্যাখ্যা কৰা।
"আপুনি নিযুক্তি কৰ্তৃপক্ষক কেনেকৈ নিৰ্দেশনা দিয়ে? ৰাষ্ট্ৰপতিয়ে ভাৰতৰ মুখ্য ন্যায়াধীশক নিযুক্তি দিয়ে। সংসদে এই দেশৰ আইন প্ৰণয়ন কৰে। আপুনি সেই সংসদক নিৰ্দেশ দিব পাৰে নে?" বিজেপিৰ সাংসদগৰাকীয়ে প্ৰশ্ন কৰে।
বিজেপিৰ সাংসদগৰাকীয়ে ন্যায়পালিকাৰ বিৰুদ্ধে কেইবাটাও কঠোৰ মন্তব্য কৰি উচ্চতম ন্যায়ালয় “দেশত ধৰ্মীয় বিতৰ্কৰ উচটনি দিয়াৰ বাবে দায়বদ্ধ” বুলি অভিযোগ উত্থাপন কৰে।
"উচ্চতম ন্যায়ালয়ে নিজৰ সীমাৰ বাহিৰলৈ গৈ আছে। যদি কোনোবাই সকলো কামৰ বাবে উচ্চতম ন্যায়ালয়লৈ যাবলগীয়া হয়, তেন্তে সংসদ আৰু ৰাজ্য বিধান সভা বন্ধ কৰি দিব লাগে।"- নিশিকান্ত ডুবেই কয়।
ডুবেই "ব্যৱহাৰকাৰীৰ দ্বাৰা ৱাকফ" বিধান সন্দৰ্ভত উচ্চতম ন্যায়ালয়ৰ স্থিতিৰ ওপৰতো প্ৰশ্ন উত্থাপন কৰে। তেওঁ কয় যে ৰাম মন্দিৰ বিষয়ৰ দৰে আন গোচৰবোৰত আদালতে তথ্য প্ৰমাণ বিচাৰিছিল যদিও এই বিষয়ত একে কাম কৰা নাই।
ৰাজনীতিবিদগৰাকীয়ে সমকামিতাক অপৰাধমুক্ত কৰাৰ দৰে উচ্চতম ন্যায়ালয়ৰ পূৰ্বৰ ৰায়দান আৰু আই টি আইনখনৰ ৬৬(এ) ধাৰা বাতিল কৰাটোও ইয়াৰ “সীমাৰ বাহিৰলৈ যোৱাৰ" উদাহৰণ হিচাপে আঙুলিয়াই দিয়ে।
শেহতীয়াকৈ উপ-ৰাষ্ট্ৰপতি জগদীপ ধানখাৰকে ধৰি ৰাজনৈতিক নেতাসকলে ন্যায়িক অতিক্ৰম বুলি কোৱা কথাটোক লৈ ন্যায়পালিকাক সমালোচনা কৰাৰ সময়তে ডুবেৰ এই মন্তব্য।
শেহতীয়াকৈ উচ্চতম ন্যায়ালয়ে ৰাষ্ট্ৰপতিগৰাকীলৈ প্ৰেৰণ কৰা বিধেয়কসমূহৰ ওপৰত কাৰ্যকৰী কৰাৰ সময়সীমা নিৰ্ধাৰণ কৰিছে। শীর্ষ ন্যায়ালয়ৰ নির্দেশ অনুযায়ী উপ-ৰাষ্ট্ৰপতি জগদীপ ধানখাৰে আদালতৰ এই সিদ্ধান্তৰ বিৰোধিতা কৰে।
ইয়াক চিন্তনীয় পৰিঘটনা বুলি অভিহিত কৰি জগদীপ ধানখাৰে কয় যে ভাৰতত কেতিয়াও এনে গণতন্ত্ৰৰ সৃষ্টি হোৱা নাছিল য’ত ন্যায়াধীশসকলে সাংসদ, কাৰ্যবাহী, আনকি “ছুপাৰ পাৰ্লিয়ামেণ্ট” হিচাপেও কাম কৰে।
“শেহতীয়া ৰায়দানৰ দ্বাৰা ৰাষ্ট্ৰপতিলৈ নিৰ্দেশ দিয়া হৈছে, আমি ক’লৈ গৈ আছো? দেশত কি হৈছে?” ৰাজ্যসভাৰ ইন্টাৰ্ণৰ এটা দলক সম্বোধন কৰি তেওঁ সুধিলে।
উচ্চতম ন্যায়ালয়ৰ সন্দৰ্ভত ডুবেৰ মন্তব্যৰ প্ৰতিক্ৰিয়া প্ৰকাশ কৰি অধিবক্তা তথা কংগ্ৰেছ নেতা ছলমান খুৰশ্বিদে কয় যে, "কোনো সাংসদে যদি উচ্চতম ন্যায়ালয় বা যিকোনো আদালতক প্ৰশ্ন কৰে তেন্তে সেয়া অতি দুখৰ বিষয়। আমাৰ আইনী ব্যৱস্থাত চূড়ান্ত কথা চৰকাৰৰ নহয়, উচ্চতম ন্যায়ালয়ৰ। যদি কোনোবাই এই কথা বুজি নাপায়, তেন্তে ই অতি দুখৰ বিষয়।"
জ্যেষ্ঠ অধিবক্তা বিকাশ সিঙে কয়, "যদি সংসদে আইন প্ৰণয়ন কৰে, তেতিয়া ৰাষ্ট্ৰপতিয়ে চূড়ান্ত অনুমোদন দিয়ে আৰু কাৰ্যকৰী কৰে। মই তেওঁক সুধিব বিচাৰো যে সংসদে আইন প্ৰণয়ন কৰে আৰু ৰাষ্ট্ৰপতিয়ে বছৰ বছৰ ধৰি ৰাখে নেকি। ধৰি লওক ৱাকফ বিধেয়ক দুয়োখন সংসদে গৃহীত হয় আৰু ৰাষ্ট্ৰপতিয়ে স্বাক্ষৰ নকৰে আৰু ৰাখি থয়, তেন্তে সেয়া বৈধ হ'বনে?"
ডুবেৰ এই বক্তব্যৰ প্ৰতিক্ৰিয়া প্ৰকাশ কৰি বিজেপিৰ সাংসদ দীনেশ শৰ্মাই কয়, "ভাৰতৰ সংবিধান অনুসৰি কোনেও লোকসভা আৰু ৰাজ্যসভাক নিৰ্দেশ দিব নোৱাৰে আৰু ৰাষ্ট্ৰপতিয়ে ইতিমধ্যে তেওঁৰ সন্মতি দিছে। কোনেও ৰাষ্ট্ৰপতিক প্ৰত্যাহ্বান জনাব নোৱাৰে, কিয়নো ৰাষ্ট্ৰপতি সৰ্বোচ্চ।"
নিশিকান্ত ডুবেৰ বিৰুদ্ধে ব্যৱস্থা গ্ৰহণৰ দাবী জনাই আপৰ মুখপাত্ৰ প্ৰিয়ংকা কক্কাৰে কয় যে, "তেওঁ এটা অতি নিকৃষ্ট মন্তব্য দিছে। মই আশা কৰোঁ যে কাইলৈ উচ্চতম ন্যায়ালয়ে বিজেপি সাংসদ নিশিকান্ত দুবেৰ বিৰুদ্ধে স্বতঃস্ফূৰ্ত অৱমাননাৰ প্ৰক্ৰিয়া আৰম্ভ কৰিব আৰু তেওঁক কাৰাগাৰলৈ প্ৰেৰণ কৰিব।"
বিজেপি ৰাজ্যসভাৰ সাংসদ তথা জ্যেষ্ঠ অধিবক্তা মানান কুমাৰ মিশ্ৰই মন্তব্য কৰে যে, "মণিপুৰ বিষয়ত উচ্চতম ন্যায়ালয়ে স্বতঃস্ফূৰ্ত অৱমাননাৰ প্ৰক্ৰিয়া আৰম্ভ কৰিছিল, কিন্তু আমি দেখিবলৈ পাইছো যে পশ্চিম বংগৰ কেইবাটাও অঞ্চল জ্বলি আছে, কিন্তু উচ্চতম ন্যায়ালয়ৰ চকু বন্ধ হৈ আছে।"
কংগ্ৰেছৰ জ্যেষ্ঠ নেতা জয়ৰাম ৰমেশে কয়, "তেওঁলোকে উচ্চতম ন্যায়ালয়ক দুৰ্বল কৰাৰ চেষ্টা কৰিছে। সাংবিধানিক কৰ্মকৰ্তা, মন্ত্ৰী, বিজেপি সাংসদসকলে উচ্চতম ন্যায়ালয়ৰ বিৰুদ্ধে মাত মাতিছে কিয়নো উচ্চতম ন্যায়ালয়ে এটা কথা কৈ আছে যে যেতিয়া আইন প্ৰণয়ন কৰা হয়, আপুনি সংবিধানৰ মৌলিক গাঁথনিৰ বিৰুদ্ধে যাব নালাগে আৰু যদি আইন সংবিধানবিৰোধী হয়, আমি ইয়াক গ্ৰহণ নকৰোঁ।"
