শ্ৰীমন্ত শংকৰদেৱ কলাক্ষেত্ৰ (ইংৰাজী: Srimanta Sankaradeva Kalakshetra) বা চমুকৈ কলাক্ষেত্ৰ গুৱাহাটীৰ পাঞ্জাবাৰীত অৱস্থিত এক সাংস্কৃতিক ক্ষেত্ৰ। শঙ্কৰদেৱ কলাক্ষেত্ৰ পৰ্যটকসকলৰ এক অন্যতম আকৰ্ষণৰ কেন্দ্ৰবিন্দু। এই ভৱনৰ নাম অসমীয়া জাতিৰ পিতামহস্বৰূপ, বৈষ্ণৱ গুৰু তথা পণ্ডিত মহাপুৰুষ শ্ৰীমন্ত শংকৰদেৱৰ নামেৰে ৰখা হৈছে। অসমীয়া সংস্কৃতিৰ প্ৰতীকসমূহৰ ই এক অন্যতম কেন্দ্ৰস্থল। অসমৰ সংগীত জগতৰ অন্যতম প্ৰসিদ্ধ আৰু পুৰোধা ব্যক্তি ভূপেন হাজৰিকা দেৱৰ এক সংগ্ৰহালয়ো ইয়াত স্থাপন কৰা হৈছে।

মহাপুৰুষ শ্ৰীমন্ত শংকৰদেৱ গুৰুজনাৰ আদৰ্শ আৰু দৰ্শনৰ প্ৰতি সচেষ্ট শংকৰদেৱ কলাক্ষেত্ৰ সমগ্ৰ উত্তৰ-পূৰ্বাঞ্চলৰ কলা, সংগীত আৰু সাহিত্যৰ মুখ্য স্নায়ুকেন্দ্ৰ। বিশেষকৈ অসমৰ প্ৰাকৃতিক সৌন্দৰ্য্য আৰু জীৱনশৈলীক প্ৰাধান্য দি সংস্থাপিত এই অনুষ্ঠানতে সমূহ উত্তৰ-পূৰ্বাঞ্চলৰ সাংস্কৃতিক প্ৰতিচ্ছবিৰ উপযুক্ত মানেৰে প্ৰচাৰ, প্ৰসাৰ আৰু সংৰক্ষণ কৰাৰ কালজয়ী ব্যৱস্থা কৰি অহা সাংস্কৃতিক অনুষ্ঠানটোৱে পাৰ কৰিলে ২৫টা বসন্ত।