মালিক আছঘৰ হাচমী / নতুন দিল্লী
কৰ্ণাটকৰ শাসকীয় বিজেপি চৰকাৰ আৰু ৰাজ্যখনৰ ৱাকফ ব’ৰ্ডে মিলি ‘হিজাব বিবাদ’ৰ সমাধান বিচাৰি উলিয়াইছে। ৰাজ্যৰ উচ্চ ন্যায়ালয়ৰ নিৰ্দেশত ৰাজ্যৰ শিক্ষানুষ্ঠানসমূহত হিজাবকে ধৰি ধৰ্মীয় প্ৰতীক থকা পোছাক পৰিধান কৰাত নিষেধাজ্ঞা আৰোপ কৰা হৈছে। বিশেষভাৱে মুছলমান সমাজে ইয়াৰ বিৰোধিতা কৰিছে।
পৰিস্থিতি এনেকুৱা যে শিক্ষানুষ্ঠানত হিজাব নিষিদ্ধ কৰাৰ বাবে বৃহৎ সংখ্যক মুছলমান কন্যা ছাত্র-ছাত্ৰীয়ে পঢ়া-শুনা এৰি ঘৰতে বহি আছে। তেওঁলোকক এই পৰিস্থিতিৰ পৰা উলিয়াই আনিবলৈ কৰ্ণাটক ব’ৰ্ড আৰু ৰাজ্যিক বিজেপি চৰকাৰে একত্ৰিতভাৱে সমাধান সূত্ৰ বিচাৰি উলিয়াইছে।
বিজেপি চৰকাৰ আৰু ৱাকফ ব’ৰ্ডে মিলি ৰাজ্যত মুছলমান ছোৱালীৰ বাবে ১০খন নতুন মহাবিদ্যালয় মুকলি কৰিব। সূত্ৰ অনুসৰি চৰকাৰে নিজৰ সিদ্ধান্ত লৈ আগবাঢ়িছে। ইয়াৰ বাবে ২.৫০ কোটি টকাৰ অনুদান আবণ্টন দিয়া হৈছে। এই মাহতে মহাবিদ্যালয়সমূহৰ আধাৰশিলা স্থাপন কৰিব মুখ্যমন্ত্ৰী বাসৱৰাজ বোমাই।
সূত্ৰই জনোৱা মতে, প্ৰথম অৱস্থাত মালনাদ আৰু উত্তৰ কৰ্ণাটক অঞ্চলত মহাবিদ্যালয়সমূহ স্থাপন কৰা হৈছে। পিছত ইয়াক সম্প্ৰসাৰণ কৰা হ’ব। কৰ্ণাটক ৱাকফ ব’ৰ্ডৰ সভানেত্ৰী মৌলানা শ্বাফী সাদীয়ে কয় যে বিশেষ মহাবিদ্যালয়ৰ প্ৰস্তাৱ ব’ৰ্ডে আগবঢ়াইছে। হিজাব পিন্ধিব নোৱাৰাৰ সময়ত বৃহৎ সংখ্যক মুছলমান ছোৱালীয়ে ঘৰতে থাকিবলৈ বাছি লোৱাৰ পিছতে এই সিদ্ধান্ত লোৱা হৈছে।
তেওঁ কয়, এই প্ৰস্তাৱ কেন্দ্ৰীয় মহিলা আৰু শিশু উন্নয়ন মন্ত্ৰী স্মৃতি ইৰাণীক দিয়া হৈছে। কৰ্ণাটকৰ মুজৰাই মন্ত্ৰী শশীকলা জোলে আৰু কালাবুৰাগীৰ সাংসদ উমেশ জাধৱৰ নেতৃত্বত ৰাজ্য চৰকাৰে এই প্ৰস্তাৱত সন্মতি প্ৰকাশ কৰিছে। মুছলমান ছোৱালীক পঢ়াবলৈ ভগ্নীৰ দৰে আগভাগ লোৱা মন্ত্ৰী শশীকলা জোলেক ধন্যবাদ জনাইছো।
ইফালে, চৰকাৰৰ এই সিদ্ধান্তৰ বিৰোধিতা কৰিছে হিন্দুবাদী সংগঠনসমূহে। হিন্দু জনজাগৰুতি সমিতিৰ নেতা মোহন গৌড়াই কয় যে যদি মুছলমান ছোৱালী মহাবিদ্যালয় নিৰ্মাণ কৰা হৈছে, তেন্তে হিন্দু শিক্ষানুষ্ঠানো নিৰ্মাণ কৰিব লাগে। তেওঁ কয় যে চৰকাৰৰ এই সিদ্ধান্ত ধৰ্মনিৰপেক্ষতা আৰু সংবিধানৰ নীতিৰ বিৰুদ্ধে। এই সিদ্ধান্ত চৰকাৰে প্ৰত্যাহাৰ নকৰিলে প্ৰতিবাদ হ’ব বুলি সকীয়াই দিয়ে গৌড়াই।
মহাবিদ্যালয় নিৰ্মাণৰ বিৰুদ্ধে ৰাজ্য চৰকাৰক প্ৰত্যাহ্বান জনাইছে শ্ৰী ৰামসেনাৰ প্ৰতিষ্ঠাপক প্ৰমোদ মুথালিকে। ৰাজ্যত এইটো অনুমতি দিয়া নহ’ব বুলি কয়।বিধানসভা নিৰ্বাচনৰ পূৰ্বে মুছলমানক তুষ্টিকৰণৰ ক্ষেত্ৰত বিজেপি জড়িত হ’ব বুলি আমি কেতিয়াও ভবা নাছিলো। এইটো এটা বিভাজনকাৰী সিদ্ধান্ত। ইয়াৰ দ্বাৰা ছাত্ৰ-ছাত্ৰীৰ মাজত বিভাজনমূলক মানসিকতা গঢ় লৈ উঠিব।
