শ্ৰীনগৰ
শনিবাৰে জম্মু-কাশ্মীৰৰ পুঞ্চত সন্দেহযুক্ত সন্ত্ৰাসবাদীয়ে নিৰাপত্তাৰক্ষীৰ বাহনৰ ওপৰত গুলীচালনা কৰাৰ ফলত প্ৰায় পাঁচজন বায়ুসেনাৰ জোৱান আহত হোৱাৰ খবৰ আহিছে। সুৰনকোটৰ ছানাই গাঁৱৰ পৰা গুলীচালনাৰ খবৰ পোৱাৰ লগতে সবিশেষ জানিবলৈ সেনা আৰু আৰক্ষীৰ শক্তিবৰ্ধক বাহিনীক ততাতৈয়াকৈ অঞ্চলটোলৈ প্ৰেৰণ কৰা হৈছে বুলি বিষয়াসকলে জানিবলৈ দিয়ে।
তাৰ পাছত পুঞ্চৰ মেধাট মহকুমাৰ গুৰছাই মূৰিৰ চৰকাৰী উচ্চতৰ মাধ্যমিক বিদ্যালয়ৰ সমীপত সন্দেহযুক্ত সন্ত্ৰাসবাদীসকল আৰু নিৰাপত্তাৰক্ষীৰ মাজত সংঘৰ্ষ হয়।
প্ৰতিৰক্ষাৰ এগৰাকী মুখপাত্ৰই জনোৱা মতে, গুলীচালনাৰ কাণ্ড সংঘটিত হৈছে যদিও সঠিক সবিশেষৰ বাবে অপেক্ষা কৰা হৈছে। “শ্বাহচিতাৰৰ সমীপৱৰ্তী জম্মু-কাশ্মীৰৰ পুঞ্চ জিলাত ভাৰতীয় বায়ুসেনাৰ এটা বাহনৰ কনভয়ক উগ্ৰপন্থীয়ে আক্ৰমণ কৰে। বৰ্তমান স্থানীয় সামৰিক ইউনিটসমূহে অঞ্চলটোত কৰ্ডন আৰু অনুসন্ধান অভিযান চলাই আছে। কনভয়টো নিৰাপদ কৰা হৈছে, আৰু অধিক তদন্ত চলি আছে।" - ভাৰতীয় বায়ুসেনাই এক বিবৃতিত এইদৰে কয়।
স্থানীয় ৰাষ্ট্ৰীয় ৰাইফলছ ইউনিটে অঞ্চলটোত কৰ্ডন আৰু তালাচী অভিযান আৰম্ভ কৰিছে। বাহনসমূহ শ্বাহচিতাৰৰ সমীপৱৰ্তী জেনেৰেল এলেকাৰ এয়াৰ বেছৰ ভিতৰত সুৰক্ষিত কৰি ৰখা হৈছে।
অনিশ্চিত বাতৰি অনুসৰি চৰকাৰী বিদ্যালয়খনৰ সমীপত এখন এম ই এছ আৰু ভাৰতীয় বায়ুসেনাৰ বাহনত সশস্ত্ৰ সন্ত্ৰাসবাদীয়ে গুলীচালনা কৰাৰ ফলত নিৰাপত্তা বাহিনীয়ে প্ৰতিহত কৰিবলৈ বাধ্য হয়।
অনন্তনাগ-ৰাজৌৰী-পুঞ্চ লোকসভা সমষ্টিৰ অংশ পুঞ্চ, য'ত নিৰ্বাচন আয়োগে ভোটগ্ৰহণ পুনৰ নিৰ্ধাৰণ কৰিছে। পুঞ্চত এতিয়া ২৫ মে'ত নিৰ্বাচন অনুষ্ঠিত হ'ব।
শুকুৰবাৰে জম্মু-কাশ্মীৰ আৰক্ষীয়ে দুজন ব্যক্তিৰ সন্দেহজনক চলাচলৰ তথ্য লাভ কৰি তালাচী অভিযান আৰম্ভ কৰে।
ইয়াৰ পূৰ্বে ছাম্বা জিলাৰ আন্তঃৰাষ্ট্ৰীয় সীমান্তত নিৰাপত্তা বাহিনীয়ে অনুপ্ৰৱেশৰ সম্ভাৱ্য প্ৰচেষ্টা বিফল কৰাৰ পিছতে ছাম্বা খণ্ডৰ সীমান্ত সুৰক্ষা বাহিনীৰ জোৱানসকলক হাই এলাৰ্টত ৰখা হৈছে।
বুধবাৰে পুৱতি নিশা আন্তঃৰাষ্ট্ৰীয় সীমান্তত থকা বি এছ এফৰ বেৰৰ কাষ চাপিবলৈ চেষ্টা কৰি থকা অৱস্থাত অনুপ্ৰৱেশকাৰীজনক বাহিনীয়ে গুলীয়াই হত্যা কৰে।
"২০২৪ চনৰ ১ আৰু ২ মে'ৰ মাজৰ নিশা সজাগ বিএছএফ সৈন্যই ছাম্বা সীমান্ত অঞ্চলত আইবিৰ ওপৰেৰে সন্দেহজনক গতিবিধি পৰ্যবেক্ষণ কৰে, আৰু এজন অনুপ্ৰৱেশকাৰী বিএছএফৰ বেৰৰ ফালে ওচৰ চাপি অহা দেখা গ'ল। সতৰ্ক সৈন্যই এজন অনুপ্ৰৱেশকাৰীক নিষ্ক্ৰিয় কৰি অনুপ্ৰৱেশৰ চেষ্টা বিফল কৰে,” সীমান্ত নিৰাপত্তা বাহিনীয়ে এক আনুষ্ঠানিক বিবৃতিত এইদৰে কয়।
