নতুন দিল্লী
ছত্তিশগড়ৰ ৰায়পুৰস্থিত শ্বহীদ বীৰ নাৰায়ণ সিং আন্তঃৰাষ্ট্ৰীয় ষ্টেডিয়ামত ভাৰতীয় মহিলা ক্ৰিকেট দলে নিজৰ আধিপত্য বিস্তাৰ কৰি এক চমকপ্ৰদ বিজয় সাব্যস্ত কৰিছে। তৃতীয় তথা অন্তিমখন টি-২০ মেচত জিম্বাবুৱেক ৯২ ৰাণৰ বৃহৎ ব্যৱধানত পৰাস্ত কৰাৰ লগতে টীম ইণ্ডিয়াই তিনিখনীয়া টি-২০ শৃংখলাটোত ৩-০ ফালফলৰে ক্লিন ছুইপ কৰি এক নতুন ইতিহাস ৰচনা কৰে।
টছত জয়লাভ কৰি প্ৰথমে বেটিং কৰাৰ সিদ্ধান্ত লোৱা ভাৰতীয় দলটোৱে আৰম্ভণিৰে পৰাই আক্ৰমণাত্মক ৰূপ ধাৰণ কৰে। অধিনায়ক হৰমনপ্ৰীত কৌৰ আৰু যুৱ তাৰকা শ্বেফালী বাৰ্মাৰ বিস্ফোৰক বেটং বিক্ৰমে ষ্টেডিয়ামত উপস্থিত ক্ৰিকেট অনুৰাগীসকলক মন্ত্ৰমুগ্ধ কৰে। নিৰ্ধাৰিত ২০ অভাৰত মাত্ৰ ৭টা উইকেট হেৰুৱাই ভাৰতে ২১৬ ৰাণৰ এক বিশাল স্ক'ৰ থিয় কৰাবলৈ সক্ষম হয়। ইয়াৰ ভিতৰত হৰমনপ্ৰীত কৌৰে মাত্ৰ ৪১টা বলৰ সন্মুখীন হৈ ৯১ ৰাণৰ এক অধিনায়কোচিত দৰ্শনীয় ইনিংছ খেলে। আনহাতে, শ্বেফালী বাৰ্মায়ো মাত্ৰ ৩৭টা বলত ৬৯ ৰাণ সংগ্ৰহ কৰি দলৰ স্থিতিক আৰু অধিক শক্তিশালী কৰি তোলে।
ভাৰতে নিৰ্ধাৰণ কৰি দিয়া ২১৭ ৰাণৰ এক পৰ্বতসম লক্ষ্যৰ পিছা কৰি জিম্বাবুৱে দলে আৰম্ভণিৰে পৰাই ধাৰাবাহিকভাৱে উইকেট হেৰুৱাই এক হতাশাজনক প্ৰদৰ্শন আগবঢ়ায়। জিম্বাবুৱেৰ হৈ শ্বাৰ্নে মায়াৰ্ছে ৪৯টা বলত ৬০ ৰাণ আৰু বিলেড বিজাই ৪৪ ৰাণ সংগ্ৰহ কৰি কিছু প্ৰতিৰোধ গঢ়ি তুলিবলৈ চেষ্টা কৰিছিল যদিও সেয়া পৰ্যাপ্ত নাছিল। ভাৰতীয় বলাৰসকলৰ নিখুঁত আৰু আক্ৰমণাত্মক বলিং প্ৰদৰ্শনৰ সন্মুখত আন কোনো বেটছমেনেই তিষ্ঠিব নোৱাৰিলে। ফলস্বৰূপে, জিম্বাবুৱেই নিৰ্ধাৰিত ২০ অভাৰত ৭টা উইকেট হেৰুৱাই মাত্ৰ ১২৪ ৰাণহে সংগ্ৰহ কৰিবলৈ সক্ষম হয়। ভাৰতৰ হৈ নন্দিনী শৰ্মাই নিজৰ স্পেলৰ চাৰি অভাৰত মাত্ৰ ১৮ ৰাণ ব্যয় কৰি তিনিটাকৈ গুৰুত্বপূৰ্ণ উইকেট দখল কৰি উজলি উঠে। লগতে ক্ৰান্তি গৌড়, অৰুন্ধতী ৰেড্ডী, দীপ্তি শৰ্মা আৰু নিকি প্ৰসাদেও এটাকৈ উইকেট লৈ দলৰ জয় সুনিশ্চিত কৰে।
উল্লেখ্য যে, শৃংখলাটোৰ পূৰ্বৰ মেচ দুখনতো ভাৰতৰ প্ৰদৰ্শন আছিল চকুত লগা। যোৱা ১৬ অক্টোবৰত ৰায়পুৰতে অনুষ্ঠিত হোৱা প্ৰথমখন মেচত জিম্বাবুৱেই প্ৰথমে বেটিং কৰি ২০ অভাৰত ৫ উইকেটৰ বিনিময়ত ১১৪ ৰাণ সংগ্ৰহ কৰিছিল। ইয়াৰ প্ৰত্যুত্তৰত বেটিং কৰিবলৈ নামি ভাৰতীয় দলে মাত্ৰ ১৯ ৰাণত ৪টাকৈ গুৰুত্বপূৰ্ণ উইকেট হেৰুৱাই এক গভীৰ সংকটত পৰিছিল। কিন্তু দীপ্তি শৰ্মা আৰু নিকি প্ৰসাদৰ এক দায়িত্বশীল আৰু উজ্জ্বল অংশীদাৰিত্বই দলটোক বিপদৰ পৰা উদ্ধাৰ কৰে। অৱশেষত ভাৰতে ১৫.৪ অভাৰত ৬টা উইকেট হেৰুৱাই লক্ষ্যস্থানত উপনীত হৈ ৪ উইকেটৰ এক ৰোমাঞ্চকৰ জয়লাভ কৰে।
আনহাতে, ১৮ অক্টোবৰত অনুষ্ঠিত হোৱা দ্বিতীয়খন টি-২০ মেচত ভাৰতীয় দলে আৰু অধিক আগ্ৰাসী ৰূপত অৱতীৰ্ণ হয়। প্ৰথমে বেটিং কৰা জিম্বাবুৱে দলে ভাৰতীয় বলাৰৰ সন্মুখত সেও মানি ২০ অভাৰত ৮টা উইকেট হেৰুৱাই মাত্ৰ ১০২ ৰাণহে সংগ্ৰহ কৰে। এই সহজ লক্ষ্য অনুসৰণ কৰিবলৈ আহি ভাৰতীয় অ’পেনিং যুটিয়ে বিপক্ষৰ বলাৰক কোনো সু্যোগেই নিদিলে। এটা প্ৰান্তত মাত্ৰ ২৫টা বলত ৫৫ ৰাণৰ এক বিস্ফোৰক ইনিংছ দেখা যোৱাৰ বিপৰীতে, আনটো প্ৰান্তত তাৰকা বেটাৰ স্মৃতি মান্ধনাই ২৫টা বলত অপৰাজিত ৪৭ ৰাণৰ এক সুন্দৰ ইনিংছ উপহাৰ দিয়ে। ফলত ভাৰতে মাত্ৰ ৮.৫ অভাৰতে মাত্ৰ এটা উইকেট হেৰুৱাই লক্ষ্য অৰ্জন কৰে আৰু ৯ উইকেটৰ এক দৰ্শনীয় জয় সাব্যস্ত কৰে।
সমগ্ৰ শৃংখলাটোত ভাৰতীয় মহিলা ক্ৰিকেট দলৰ এই সৰ্বাংগীন আৰু আধিপত্যশীল প্ৰদৰ্শনে বিশ্ব ক্ৰিকেটত তেওঁলোকৰ শ্ৰেষ্ঠত্ব পুনৰবাৰ প্ৰমাণ কৰিলে।
.webp "নৱৰাত্ৰি উপলক্ষে দেৱী শৈলপুত্ৰীক প্ৰণাম জনাই দেশবাসীক শুভেচ্ছা প্ৰধানমন্ত্ৰী মোদীৰ")
