নতুন দিল্লী
নৱৰাত্ৰি উৎসৱৰ সময়ত অনুষ্ঠিত হোৱা গুজৰাটৰ গৰ্বা নৃত্যক ইউনেস্ক’ই স্বীকৃতি দিয়াৰ পিছত এইবাৰ মুছলমান ধৰ্মাৱলম্বীসকলৰ হেঁপাহৰ ইফতাৰক ইউনেস্ক’ই সাংস্কৃতিক ঐতিহ্যৰ তালিকাত অন্তৰ্ভুক্ত কৰিছে। ইফতাৰ হৈছে সমগ্ৰ বিশ্বৰ মুছলমানসকলে পবিত্ৰ ৰমজান মাহত ৰোজা ভংগ কৰাৰ এক প্ৰথা।
ইফতাৰক সাংস্কৃতিক ঐতিহ্য হিচাপে ঘোষণা কৰিবলৈ ইৰাণ, তুৰস্ক, আজাৰবাইজান আৰু উজবেকিস্তানে যৌথভাৱে ৰাষ্ট্ৰসংঘৰ শৈক্ষিক, বৈজ্ঞানিক আৰু সাংস্কৃতিক সংস্থা(ইউনেস্ক’)ৰ সন্মুখত দাবী উত্থাপন কৰিছিল।
ইউনেস্ক’ৰ মতে ইফতাৰৰ সময়ত মুছলমানসকলে ৰমজান মাহত দিনজোৰা উপবাসৰ অন্তত সূৰ্যাস্তৰ সময়ত খাদ্য গ্ৰহণ কৰাৰ এক পৰম্পৰা। ৰাষ্ট্ৰসংঘৰ শৈক্ষিক, বৈজ্ঞানিক আৰু সাংস্কৃতিক সংস্থাই ইফতাৰক অন্তৰ্ভুক্ত কৰা তালিকাখনক Living heritage list বুলিও কোৱা হয়।
ইফতাৰত সকলো বয়সৰ, সকলো লিংগৰ আৰু সকলো পটভূমিৰ লোকে দিনজোৰা ৰোজী ভংগ কৰি খাদ্য গ্ৰহণ কৰে। মুছলমান দেশসমূহত ৰমজানৰ সময়ত নামাজ, সংগীত, কাহিনী কোৱা, খেলা-ধূলা, পৰম্পৰাগত আৰু স্থানীয় খাদ্য প্ৰস্তুত আৰু পৰিবেশন আদি কাৰ্যসূচীৰ আয়োজন কৰা হয়। পিছলৈ ই প্ৰায়ে সভা বা সমূহীয়া আহাৰ গ্ৰহণৰ ৰূপ লয়।
ইউনেস্ক’ই কয়, "ইফতাৰে পাৰিবাৰিক আৰু সম্প্ৰদায়ৰ বন্ধন শক্তিশালী কৰে। দান-বৰঙণি, সংহতি, আৰু সামাজিক আদান-প্ৰদানৰ প্ৰসাৰ ঘটায়। ইফতাৰৰ অনুষ্ঠান আৰু ৰীতি-নীতিৰ সময়ত পৰিয়ালসমূহৰ মাজত সাধাৰণতে কথা-বতৰাৰ জৰিয়তে জ্ঞান আৰু বুদ্ধিৰ প্ৰসাৰ ঘটে।"
ইফতাৰত শিশু আৰু যুৱক-যুৱতীসকলক প্ৰায়ে পৰম্পৰাগত খাদ্যৰ উপাদানসমূহ প্ৰস্তুত কৰাৰ দায়িত্ব দিয়া হয়। এই প্ৰক্ৰিয়াৰ সময়ত অভিভাৱকসকলে ৰোজাৰ উপকাৰিতা আৰু ইফতাৰৰ সামাজিক মূল্যবোধ আৰু কাৰ্য্যৰ বিষয়েও জ্ঞান প্ৰচাৰ কৰে।
ইউনেস্ক’ই জনোৱা মতে, ৰমজান মাহত সূৰ্যাস্তৰ সময়ত মুছলমানসকলে সকলো ধৰ্মীয় আৰু আনুষ্ঠানিক অনুষ্ঠান সম্পূৰ্ণ হোৱাৰ পিছত ইফতাৰ পালন কৰে। ইয়াৰ বাবেই যুগ যুগ ধৰি চলি অহা সম্প্ৰদায়ৰ পৰম্পৰাটোক অস্পষ্ট সাংস্কৃতিক ঐতিহ্যৰ সুৰক্ষাৰ বাবে আন্তঃচৰকাৰী সমিতিয়ে স্বীকৃতি দিছে। ইউনেস্ক'ৰ বৈঠক সোমবাৰে বটছৱানাত অনুষ্ঠিত হয়। বহু মুছলমান দেশত চাহৰ লগত খেজুৰ খাই ইফতাৰ ভংগ কৰাৰ প্ৰথা আছে। কিন্তু দেশৰ ওপৰত নিৰ্ভৰ কৰি খাদ্য আৰু ৰেচিপি বহু পৰিমাণে ভিন্ন হয়।
