নতুন দিল্লী
মাৰ্চ মাহত সুৰা নীতিৰ অভিযোগত গ্ৰেপ্তাৰ হোৱা দিল্লীৰ মুখ্যমন্ত্ৰী অৰবিন্দ কেজৰিৱালৰ জামিনৰ বিৰোধিতা কৰিছে বলবৎকাৰী সঞ্চালকালয়ে। উচ্চতম ন্যায়ালয়ত চলি থকা শুনানিৰ সময়ত কেন্দ্ৰীয় সংস্থাটো (ED)ৰ হৈ হাজিৰ হৈ অতিৰিক্ত ছলিচিটৰ জেনেৰেল এছ ভি ৰাজুৱে যুক্তি আগবঢ়ায় যে আপৰ নেতাগৰাকীক মুকলি কৰি দিলে এক বেয়া আদৰ্শ দাঙি ধৰা হ’ব।
"তেওঁক জামিন দি আপোনালোকে কি উদাহৰণ দাঙি ধৰিব? আন মানুহৰ গুৰুত্ব কম নেকি ? কেৱল মুখ্যমন্ত্ৰী হোৱাৰ বাবেই তেওঁ জামিন লাভ কৰাটো উচিত নহয়। আমি ৰাজনীতিবিদৰ বাবে পৃথক আইন প্ৰস্তুত কৰিছো নেকি ? নিৰ্বাচনৰ প্ৰচাৰ অধিক গুৰুত্বপূৰ্ণ নেকি ?" ইডিৰ অধিবক্তাই ন্যায়ালয়ত এইদৰে যুক্তি দিয়ে।
ইয়াৰ পূৰ্বে, আদালতে কৈছিল যে চলি থকা লোকসভা নিৰ্বাচনত কেজৰিৱালক নিজৰ দলৰ হৈ প্ৰচাৰ চলাবলৈ অনুমতি দিবলৈ অস্থায়ী জামিনৰ যুক্তি শুনানি গ্ৰহণ কৰা হ’ব। লোকসভাৰ ৭খন আসন থকা দিল্লীত অহা ২৫ মে’ত ভোটদান অনুষ্ঠিত হ'ব।
শুনানিৰ সময়ত আদালতে কৈছে যে অৰবিন্দ কেজৰিৱাল হৈছে দিল্লীৰ নিৰ্বাচিত মুখ্যমন্ত্ৰী।
ন্যায়াধীশ দিপাংকৰ দত্তকে ধৰি দুজন ন্যায়াধীশৰ বিচাৰপীঠৰ অংশ ন্যায়াধীশ সঞ্জীৱ খান্নাই কয় যে নিৰ্বাচন চলি আছে। এইটো এটা অসাধাৰণ পৰিস্থিতি আৰু তেওঁ অভ্যাসগত অপৰাধী নহয়। কেজৰিৱালৰ সৈতে সম্ভাৱ্য বিশেষ ব্যৱহাৰৰ বিষয়ে, আৰু নিৰ্বাচনৰ প্ৰচাৰ "অধিক গুৰুত্বপূৰ্ণ" সন্দৰ্ভত অতিৰিক্ত ছলিচিটৰ জেনেৰেল এছ ভি ৰাজুৰ চোকা প্ৰশ্নৰ উত্তৰত আদালতে কয়, "সেয়া পৃথক কথা। লোকসভা নিৰ্বাচন পাঁচ বছৰত এবাৰ অনুষ্ঠিত হয়। এনে সময়ত তেওঁক বন্দী কৰি ৰখাটো আমি সমৰ্থন নকৰো।"
ন্যায়াধীশ খান্নাই পৰ্যবেক্ষণ কৰে যে আমি নিশ্চিতভাৱে নিবিচাৰো যে অপৰাধৰ সৈতে জড়িত ৰাজনীতিবিদসকলৰ সৈতে বেলেগ ধৰণৰ ব্যৱহাৰ কৰা হওক।
