নতুন দিল্লী
ভাৰতৰ প্ৰথমখন বুলেট ট্ৰেইনৰ বাবে বিভিন্ন ষ্টেচন নিৰ্মাণৰ কাম অগ্ৰগতি আগবাঢ়িছে। আমি ২০২৬ চনত এটা খণ্ডত প্ৰথমখন ৰে’ল চলাবলৈ সাজু হৈছো বুলি মঙলবাৰে কেন্দ্ৰীয় ৰে’ল আৰু আই টি মন্ত্ৰী অশ্বিনী বৈষ্ণৱে কয়।
সংবাদমাধ্যমৰ সন্মুখত কেন্দ্ৰীয় মন্ত্ৰীগৰাকীয়ে কয় যে আহমেদাবাদ-মুম্বাই পথত বুলেট ট্ৰেইনৰ কাম অতি ভালদৰে আগবাঢ়িছে।
‘ইতিমধ্যে ২৯০ কিলোমিটাৰতকৈ অধিক কাম কৰা হৈছে। আঠখন নদীৰ ওপৰত দলং নিৰ্মাণ কৰা হৈছে। ১২ টা ষ্টেচনত কাম চলি আছে।
“দুটা ডিপোত কাম চলি আছে। ২০২৬ চনত ইয়াৰ প্ৰথমটো শিতান মুকলি কৰাৰ সম্পূৰ্ণ লক্ষ্যৰে কামটো দ্ৰুত গতিত চলি আছে।’ কেন্দ্ৰীয় মন্ত্ৰীগৰাকীয়ে এইদৰে কয়।
বুলেট ট্ৰেইন এটা অতি জটিল প্ৰকল্প। ইয়াৰ কাম ২০১৭ চনৰ পৰা আৰম্ভ হৈছিল আৰু ইয়াৰ ডিজাইন সম্পূৰ্ণ হ’বলৈ প্ৰায় ডেৰ-দুবছৰ সময় লাগিছিল।
কেন্দ্ৰীয় মন্ত্ৰীগৰাকীয়ে এই কথা অৱগত কৰে যে, ‘ইয়াৰ ডিজাইন অতি জটিল কাৰণ ৰে’লখন যি গতিৰে চলাব লাগে, সেই গতিৰে যথেষ্ট কম্পন হয় আৰু ই অতি শক্তিশালী।
মাজতে ক'ভিড মহামাৰীৰ বাবে কামৰ অলপ বিপৰ্যয় ঘটিছিল।
"মহাৰাষ্ট্ৰত উদ্ধৱ থাকৰেৰ চৰকাৰে অনুমতি দিবলৈ অস্বীকাৰ কৰিছিল যাৰ বাবে প্ৰকল্পটোত পলম হৈছিল। কিন্তু এতিয়া কামটো অতি ভালদৰে আগবাঢ়িছে",-কেন্দ্ৰীয় মন্ত্ৰীগৰাকীয়ে কয়।
বুলেট ট্ৰেইন কৰিডৰত ২১ কিলোমিটাৰ দৈৰ্ঘ্যৰ সুৰংগ আছে, য’ত ৭ কিলোমিটাৰ দৈৰ্ঘ্যৰ সাগৰৰ তলৰ অংশও আছে। সুৰংগটোৰ আটাইতকৈ গভীৰ বিন্দু হৈছে ৫৬ মিটাৰ।
সুৰংগটোৰ ভিতৰত ঘণ্টাত ৩০০-৩২০ কিলোমিটাৰ বেগত চলিব পাৰিব বুলেট ট্ৰেইন।