নতুন দিল্লী
ভাৰতীয় মুছলমানসকলৰ ওপৰত নিজৰ স্পষ্ট চিন্তা প্ৰকাশ কৰি প্ৰধানমন্ত্ৰী নৰেন্দ্ৰ মোদীয়ে নিজৰ সন্তানৰ ভৱিষ্যতৰ স্বাৰ্থত মোদী আৰু বিজেপিৰ বিৰোধিতাকে ধৰি বিভিন্ন বিষয়ত তেওঁলোকৰ স্থিতি আত্মনিৰীক্ষণ কৰিবলৈ আহ্বান জনাইছে।
"প্ৰথমবাৰৰ বাবে মই মুছলমান সমাজক আত্মনিৰীক্ষণ কৰিবলৈ কৈছো। কোনে ক্ষমতাত থাকিব আৰু কোন সিংহাসনৰ পৰা বঞ্চিত হ'ব, সেইটো আপুনি সিদ্ধান্ত ল'ব বুলি ভাবি থাকিলে আপোনাৰ সন্তানৰ ভৱিষ্যত নষ্ট হ'ব।" টাইমছ নাও টেলিভিছন চেনেলৰ সৈতে হোৱা এক সাক্ষাতকাৰত প্ৰধানমন্ত্ৰীয়ে এই কথা কয়।
তেওঁ কয় যে উপসাগৰীয় দেশসমূহত তেওঁ আৰু সকলো ভাৰতীয়ই বহুত সন্মান পায়। কিন্তু আমাৰ দেশত একাংশ লোকে তেওঁৰ বিৰোধিতা কৰে। সমগ্ৰ বিশ্বতে মুছলমানসকলৰ বিকাশ ঘটিছে বুলি তেওঁ উল্লেখ কৰে। ‘ছৌদি আৰৱ চৰকাৰে যোগ (Yoga)ক তেওঁলোকৰ পাঠ্যক্ৰমৰ অংশ হিচাপে অন্তৰ্ভুক্ত কৰিছে। যেতিয়া মই এই দেশবোৰ ভ্ৰমণ কৰি থাকোঁ, তেতিয়া দেশৰ ধনী আৰু ডাঙৰ ডাঙৰ মানুহবোৰে মোক যোগৰ বিষয়ে সুধি থাকে। বহুতে কয় যে তেওঁৰ পত্নীয়ে যোগ শিকিবলৈ এমাহৰ বাবে ভাৰতলৈ যায়, আন কোনোৱে মোক সুধিছে যোগ শিকাৰ আনুষ্ঠানিক পদ্ধতি কি।”-প্ৰধানমন্ত্ৰীয়ে কয়। তেওঁ কয় যে ভাৰতত যোগাসনকো মুছলমান বিৰোধী বুলি কোৱাটো দুৰ্ভাগ্যজনক।
মোদীয়ে কয়, ‘প্ৰথমবাৰৰ বাবে, মই মুছলমানসকলক বিশেষকৈ শিক্ষিতসকলক কৈছো যে মোৰ বিৰুদ্ধে চলি থকা ধাৰণাবোৰৰ বিষয়ে আত্মনিৰীক্ষণ কৰক। ১৯ শতিকাৰ পৰাই গুজৰাটত সাম্প্ৰদায়িক দাঙ্গাৰ দীৰ্ঘদিনীয়া ইতিহাস আছে। আৰু ইয়াৰ সকলোবোৰ নথিভুক্ত কৰা হৈছে৷ ২০০২ চনৰ পৰা এটাও দাঙ্গা হোৱা নাই। আজি গুজৰাটত মুছলমানে বিজেপিক ভোট দিব বিচাৰিছে। দেশখন এতিয়া আগবাঢ়িছে। যদি আপোনালোকৰ সম্প্ৰদায়ে নিজকে বঞ্চিত অনুভৱ কৰিছে, তেন্তে ভাবি চাওক ইয়াৰ প্ৰকৃত কাৰণ কি?”
কংগ্ৰেছৰ শাসন ব্যৱস্থাত চৰকাৰী আঁচনিৰ সুবিধা মুছলমান সমাজে কিয় লাভ কৰা নাছিল, সেই কথা তেওঁলোকে ভাবিব লাগিব। “কংগ্ৰেছৰ শাসনৰ সময়ত আপোনালোকে কিয় ভুগিবলগীয়া হৈছিল, সেইটো আপোনালোকে চিন্তা কৰা উচিত। ভাৰতৰ কোনো এটা সম্প্ৰদায় পিছ পৰি থকাতো মই নিবিচাৰো।”-প্ৰধানমন্ত্ৰীয়ে কয়। তেওঁ কয় যে মুছলমানসকলে বিজেপিক অন্ধভাৱে বিৰোধিতা নকৰি বিজেপিৰ সৈতে মত বিনিময় কৰি ইয়াৰ কাম-কাজ আৰু মতাদৰ্শ অধ্যয়ন কৰিব লাগিব।
