গুৱাহাটী
গুৱাহাটী উচ্চ ন্যায়ালয়ৰ উকীল সন্থাই দেওবাৰে ভাৰতৰ মুখ্য ন্যায়াধীশৰ নতুন উচ্চ ন্যায়ালয় কমপ্লেক্সৰ আধাৰশিলা স্থাপন অনুষ্ঠান বৰ্জন কৰিবলৈ চাৰি ঘণ্টীয়া ধৰ্মঘট আৰম্ভ কৰে। উত্তৰ গুৱাহাটীৰ ৰংমহলত ন্যায়িক টাউনশ্বিপৰ অংশ হিচাপে গুৱাহাটী উচ্চ ন্যায়ালয়ৰ এটা নতুন কমপ্লেক্সৰ প্ৰস্তাৱ দিয়া হৈছে আৰু ইয়াৰ আধাৰশিলা স্থাপন কৰিব চি জে আই ন্যায়াধীশ সূৰ্য কান্তে।
গুৱাহাটী হাইকৰ্ট বাৰ এচ’চিয়েচনৰ সদস্যসকলে বৃহস্পতিবাৰ আৰু শুকুৰবাৰে গুৱাহাটী উচ্চ ন্যায়ালয়ৰ পুৰণি ভৱনৰ সন্মুখত চাৰি ঘণ্টীয়া অনশনত অংশগ্ৰহণ কৰে। এচ’চিয়েচনৰ উপ-সভাপতি সান্তনু বৰঠাকুৰে পিটিআইক জনোৱা মতে,”আমি উচ্চ ন্যায়ালয়ক বৰ্তমানৰ স্থানৰ পৰা স্থানান্তৰিত কৰাৰ সম্পূৰ্ণ বিৰোধী। আমি পুৱা ১০ বজাৰ পৰা বিয়লি ২ বজালৈ অনশন আৰম্ভ কৰিছো। আমাৰ কোনো সদস্যই আধাৰশিলা স্থাপনৰ অনুষ্ঠানত উপস্থিত নাথাকে।”
তেওঁ অভিযোগ কৰে যে, জিএইচচিবিএই(GHCBA) আদালত কমপ্লেক্সটো স্থানান্তৰিত কৰাৰ পদক্ষেপৰ আৰম্ভণিৰে পৰাই বিৰোধিতা কৰি আহিছে যদিও চৰকাৰে একপক্ষীয় সিদ্ধান্ত লৈ এতিয়া নতুন ন্যায়িক আন্তঃগাঁথনি নিৰ্মাণৰ কাম আগবঢ়াইছে।বৰঠাকুৰে কয়, “যেনেকৈ দেখা গৈছে, আজি আধাৰশিলা স্থাপন কৰা হ’ব। ইয়াৰ পিছত আমি ইয়াক আদালতত প্ৰত্যাহ্বান জনোৱাৰ কথা চিন্তা কৰিছো। অহা কেইদিনমানৰ ভিতৰত আমাৰ কাৰ্যনিৰ্বাহক সমিতিৰ বৈঠক হ’ব আৰু ভৱিষ্যতৰ ব্যৱস্থা গ্ৰহণ কৰিব।”
গুৱাহাটী মহানগৰীৰ মাজমজিয়াত থকা হাইকোৰ্ট কমপ্লেক্স বৰ্তমানৰ স্থানৰ পৰা ব্ৰহ্মপুত্ৰ নদীৰ উত্তৰ পাৰলৈ স্থানান্তৰিত কৰাৰ তীব্ৰ বিৰোধিতা কৰিছে জিএইচচিবিএই।
অসমৰ অধিবক্তা মহাধিবক্তা দেৱজিৎ শইকীয়াই শনিবাৰে উকীল সন্থাক সমালোচনা কৰি বিৰোধীৰ আঁৰত “ৰাজনৈতিক দলৰ সৈতে গোপন বুজাবুজি” আছে বুলি দাবী কৰে। উত্তৰ গুৱাহাটীৰ ৰংমহলত ১৪৮ বিঘা (প্ৰায় ৪৯ একৰ) ভূমিত সংহত ন্যায়িক আদালত কমপ্লেক্স নিৰ্মাণৰ পৰিকল্পনা কৰিছে চৰকাৰে। বিগত বৰ্ষৰ নৱেম্বৰ মাহত উত্তৰ গুৱাহাটীত ন্যায়িক টাউনশ্বিপ নির্মাণৰ বাবে প্রথম পর্যায়ত ৪৭৯ কোটি টকাৰ অনুমোদন জনাইছিল ৰাজ্যৰ কেবিনেটে৷
