নতুন দিল্লী
ভাৰতৰ প'লাৰ ছেটেলাইট লঞ্চ ভেহিকল (পিএছএলভি) মিছনে সোমবাৰে উৎক্ষেপণৰ পিছত এক অস্বাভাৱিক বিজুতিৰ সন্মুখীন হয়, ইছৰোৱে পিছত নিশ্চিত কৰে যে ৰকেটৰ তৃতীয় পৰ্যায়ৰ সময়ত এক বিচ্যুতি দেখা গৈছিল।
ইছৰ'ৰ অধ্যক্ষ ড০ ভি নাৰায়ণনে কয় যে, "তথ্যসমূহ বিশ্লেষণ কৰা হৈছে আৰু মহাকাশ সংস্থাটোৰ তৰফৰ পৰা অতি শীঘ্ৰে এই অভিযানৰ সবিশেষ তথ্য জনাম।"
ইওএছ-এন১ ক লৈ পিএছএলভি-চি৬২ৰ ৬৪ সংখ্যক অভিযান শ্ৰীহৰিকোটাৰ সতীশ ধাৱান মহাকাশ কেন্দ্ৰৰ পৰা পুৱা ১০.১৮ বজাত উৎক্ষেপণ কৰা হয়। ২০২৫ চনত উৎক্ষেপণ কৰা যানখন বিফল হোৱাৰ পিছত এই অভিযানটো এক গুৰুত্বপূৰ্ণ অভিযান হিচাপে চিহ্নিত হয়।
পিএছএলভি-চি৬২ত ইওএছ-এন১ আৰু ডিআৰডিঅ'ই প্ৰস্তুত কৰা আনবিশা নামৰ এটা নিৰীক্ষণ উপগ্ৰহকে ধৰি মুঠ ১৫টা উপগ্ৰহ আছিল। ইওএছ-এন১ (EOS-N1) আৰু ১৪ টা সহযাত্ৰী উপগ্ৰহক সূৰ্য সমকালীন কক্ষপথত স্থাপন কৰাৰ পৰিকল্পনা কৰা হৈছিল, আনহাতে কেষ্ট্ৰেল প্ৰাৰম্ভিক প্ৰদৰ্শনকাৰী (KID) উপগ্ৰহটো পুনৰ প্ৰৱেশৰ বাবে নিৰ্ধাৰণ কৰা হৈছিল। এই উপগ্ৰহটোৰ জৰিয়তে ভাৰতৰ কৌশলগত স্থানসমূহৰ নিৰীক্ষণ আৰু মানচিত্ৰ প্ৰস্তুতৰ ক্ষমতা বৃদ্ধি কৰা হ'ব।
এই অভিযানে ভাৰতৰ ব্যক্তিগত মহাকাশ খণ্ডৰ বাবেও এক ঐতিহাসিক পদক্ষেপ হিচাপে চিহ্নিত হৈছে। প্ৰথমবাৰৰ বাবে, হায়দৰাবাদস্থিত ধ্ৰুৱ স্পেচ নামৰ এটা ব্যক্তিগত ভাৰতীয় কোম্পানীয়ে পিএছএলভি মিছনত সাতটা উপগ্ৰহ প্ৰদান কৰিছে।
