নতুন দিল্লী
কৰ্ণেল ছফিয়া কুৰেশ্বী লৈ কৰা অপমানজনক মন্তব্যৰ বাবে উচ্চতম ন্যায়ালয়ে মধ্যপ্ৰদেশৰ মন্ত্ৰী বিজয় শ্বাহক তীব্ৰ সমালোচনা কৰিছে। শ্বাহৰ ক্ষমাপ্ৰাৰ্থনাক আন্তৰিকতাহীন বুলি অভিহিত কৰি আদালতে নাকচ কৰি গোচৰটোৰ তদন্তৰ বাবে নতুন তদন্তকাৰী দল এটাক নিৰ্দেশ দিয়ে।
এই দলটোত এগৰাকী মহিলাকে ধৰি তিনিজন আই পি এছ বিষয়া থাকিব আৰু ২৮ মে’ৰ ভিতৰত প্ৰতিবেদন দাখিল কৰিব লাগিব।আদালতে শ্বাহক তেওঁৰ এই কাৰ্যৰ পৰিণতিৰ সন্মুখীন হ’ব লাগিব বুলি সকীয়াই দি মধ্যপ্ৰদেশ চৰকাৰক জাননী জাৰি কৰি তেওঁৰ বিৰুদ্ধে ব্যৱস্থা ল’বলৈ কয়।
সন্ত্ৰাসবাদী শিবিৰৰ বিৰুদ্ধে সামৰিক অভিযান অপাৰেচন সেন্দুৰৰ কথা উল্লেখ কৰি শ্বাহে এই বিতৰ্কিত মন্তব্য কৰিছিল। অভিযোগ অনুসৰি তেওঁ কয় যে পাকিস্তানৰ লোকসকলৰ সৈতে একে সম্প্ৰদায়ৰ এগৰাকী মহিলাই “আপোনালোকক উলংগ কৰি পেলাব” আৰু কৰ্ণেল কুৰাশ্বীক “সন্ত্ৰাসবাদীৰ ভগ্নী” বুলি উল্লেখ কৰে। এই মন্তব্যৰ ফলত বিৰোধী দল, সামৰিক প্ৰবীণ সৈনিক, আনকি বিজেপিৰ একাংশ সদস্যৰ মাজত ব্যাপক সমালোচনাৰ সৃষ্টি কৰিছিল।
মধ্যপ্ৰদেশ উচ্চ ন্যায়ালয়েও শ্বাহক “তুচ্ছ ভাষা” ব্যৱহাৰ কৰাৰ বাবে তীব্ৰ সমালোচনা কৰাৰ লগতে তেওঁৰ বিৰুদ্ধে এজাহাৰ দাখিলৰ নিৰ্দেশ দিছিল। তাৰ পিছতে উচ্চতম ন্যায়ালয়ৰ এই সিদ্ধান্ত লৈছে। আদালতৰ সমালোচনাত সশস্ত্ৰ বাহিনীক সন্মান জনোৱা আৰু বিশেষকৈ ক্ষমতাৰ পদবীত থকাসকলৰ মৰ্যাদা বজাই ৰখাৰ গুৰুত্বৰ ওপৰত আলোকপাত কৰা হৈছে।
আদালতৰ এই পদক্ষেপক ৰাজহুৱা ব্যক্তিসকলক তেওঁলোকৰ কথা আৰু কামৰ বাবে জবাবদিহি কৰাৰ এক উল্লেখযোগ্য পদক্ষেপ হিচাপে দেখা গৈছে। শ্বাহৰ ক্ষমাপ্ৰাৰ্থনা নাকচ কৰি আৰু পুংখানুপুংখ তদন্তৰ নিৰ্দেশ দি আদালতে এনে আচৰণ সহ্য কৰা নহ’ব বুলি কঠোৰ বাৰ্তা প্ৰেৰণ কৰিছে।
