মহম্মদ আক্ৰাম, নতুন দিল্লী
প্ৰতি বছৰে কেন্দ্ৰীয় লোকসেৱা আয়োগৰ পৰীক্ষাত লাখ লাখ যুৱক-যুৱতী অৱতীৰ্ণ হয় যদিও কঠিন পৰিস্থিতি, সীমিত সা-সুবিধা আৰু কঠোৰ পৰিশ্ৰমৰ মাজেৰে মাথো দুই এজনেহে সফলতাৰে উত্তীৰ্ণ হ'বলৈ সক্ষম হয়। তেনে এক প্ৰেৰণাদায়ক নাম হ’ল ড০ ৱাছিম উৰ ৰহমান।
তেওঁ ২০২৪ চনৰ ইউ পি এছ চি অসামৰিক সেৱা পৰীক্ষাত সফলতা লাভ কৰাই নহয়, দেশৰ ভিতৰতে ২৮১ সংখ্যক স্থান দখল কৰিও প্ৰমাণ কৰিছে যে নিষ্ঠা, অনুশাসন আৰু অহৰহ প্ৰচেষ্টাৰে কোনো লক্ষ্য অসম্ভৱ নহয়।
বিহাৰৰ মুজাফ্ফৰপুৰ জিলাৰ কাটৰা ব্লকৰ বাসিন্দা ড০ ৱাছিম উৰ ৰহমানে এটা শিক্ষিত আৰু মধ্যবিত্তীয় মুছলমান পৰিয়ালত জন্মগ্ৰহণ কৰিছিল। পিতৃ হাজী ছাউদ আজম ৰহমানীয়ে ব্লক কৃষি বিষয়া পদৰ পৰা অৱসৰ গ্ৰহণ কৰাৰ বিপৰীতে মাতৃ জাহান আৰা খাতুনে চৰকাৰী বিদ্যালয়ৰ প্ৰধান শিক্ষক হিচাপে কাম কৰি আছে।
পৰিয়ালটোত আৰম্ভণিৰে পৰাই শিক্ষাৰ পৰিৱেশ আছিল, আৰু আৰম্ভণিৰে পৰাই ৱাছিমে কঠোৰ পৰিশ্ৰম আৰু ডাঙৰ লক্ষ্যৰে আগবাঢ়িবলৈ অনুপ্ৰাণিত হৈছিল। ৱাছিমে মুজাফ্ফৰপুৰৰ হাজৰা আলী একাডেমীত প্ৰাথমিক শিক্ষা গ্ৰহণ কৰাৰ পিছত কিছুদিন ডি এ ভি স্কুলত অধ্যয়ন কৰে। তেওঁৰ স্কুলীয়া শিক্ষাৰ এটা ডাঙৰ অংশ আলিগড় মুছলিম ইউনিভাৰ্চিটি (এএমইউ)ৰ সৈতে জড়িত এখন বিদ্যালয়ৰ পৰা হৈছিল, য’ৰ পৰা তেওঁ ২০১৪ চনত দ্বাদশ শ্ৰেণীৰ পৰীক্ষাত ৯১% নম্বৰ লাভ কৰি উত্তীৰ্ণ হৈছিল।
ডাঃ ৱাছিমে আৱাজ দ্য ভইচৰ সৈতে কথা পাতি থকাৰ এক মূহুৰ্ত
ইয়াৰ পিছত তেওঁ চিকিৎসা ক্ষেত্ৰখনৰ প্ৰতি আগ্ৰহী হৈ পৰে। তেওঁ বৰ্দ্ধমান মহাবীৰ চিকিৎসা মহাবিদ্যালয় (ভিএমএমচি) আৰু নতুন দিল্লীৰ চফদাৰজং হাস্পতালৰ পৰা এমবিবিএছ অধ্যয়ন কৰে। চিকিৎসক হোৱাৰ পিছত তেওঁ ৰোগীক সেৱা আগবঢ়োৱাক সৰ্বোচ্চ অগ্ৰাধিকাৰ দিছিল আৰু ইয়াৰ সমান্তৰালকৈ তেওঁ ইউ পি এছ চিৰ কঠিন পৰীক্ষাৰ বাবেও প্ৰস্তুতি চলাইছিল।
ড° ৱাছিমৰ সফলতাৰ আটাইতকৈ উল্লেখযোগ্য দিশটো হ’ল তেওঁ কোনো পৰম্পৰাগত কোচিং ইনষ্টিটিউটৰ সহায় নোলোৱাকৈ ইউ পি এছ চিৰ বাবে প্ৰস্তুতি চলাইছিল। যদিও তেওঁ নৃতত্ত্বক ঐচ্ছিক বিষয় হিচাপে বাছি লৈ অনলাইন কোচিং পাঠ্যক্ৰম কৰিছিল, তথাপিও সমগ্ৰ প্ৰস্তুতি তেওঁ আত্ম-অধ্যয়ন আৰু ডিজিটেল সম্পদৰ জৰিয়তে কৰিছিল।
তেওঁ কয়, "মই আগতে দৈনিক ৬ৰ পৰা ৭ ঘণ্টা পঢ়া-শুনা কৰিছিলোঁ। চিকিৎসালয়ত ৭-৮ ঘণ্টাৰ কৰ্তব্যৰ পিছত ই সহজ নাছিল যদিও মই মোৰ সময় ব্যৱস্থাপনা উন্নত কৰিলোঁ আৰু অধ্যয়নৰ বাবে অনলাইন কন্টেন্টক অগ্ৰাধিকাৰ দিলোঁ।"
উল্লেখ্য যে, ড° ৱাছিমে চতুৰ্থ প্ৰচেষ্টাত এই সফলতা লাভ কৰিছে। প্ৰথম তিনিটা প্ৰচেষ্টাত তেওঁ আশা কৰা ধৰণৰ সফলতা নাপালে যদিও তেওঁ হাৰ নামানিলে। তেওঁৰ মতে, "প্ৰতিটো বিফলতাই মোক শক্তিশালী কৰি তুলিছিল। মোৰ পৰিয়াল সদায় মোৰ শক্তি হৈ আহিছে। যেতিয়াই মই ভাগৰি পৰিছিলো, মা-দেউতা আৰু ভাই-ভনীৰ উৎসাহে মোক আগুৱাই লৈ গৈছিল।"
ৱাছিমৰ মতে, ইউ পি এছ চিৰ সাক্ষাৎকাৰৰ সময়ত তেওঁক নিজৰ গৃহ জিলা মুজাফ্ফৰপুৰৰ বিখ্যাত লিচুৰ বিষয়েও প্ৰশ্ন কৰা হৈছিল। তেওঁ কেৱল চিকিৎসা আৰু প্ৰশাসনিক জ্ঞানেৰেই নহয় স্থানীয় আৰ্থ-সামাজিক প্ৰেক্ষাপটৰ গভীৰ বুজাবুজিৰে সাক্ষাৎকাৰ ব’ৰ্ডক আপ্লুত কৰিছিল।
ড০ ৱাছিম উৰ ৰহমান
নিজৰ সফলতাক সমাজ আৰু জাতিৰ সেৱা বুলি ভবা ৱাছিমৰ যুৱক-যুৱতীসকলৰ বাবে এটা বাৰ্তা আছে-"সৎভাৱে কঠোৰ পৰিশ্ৰম কৰক, আপোনাৰ বয়োজ্যেষ্ঠসকলৰ পৰা পৰামৰ্শ লওক, আৰু অধ্যৱসায় আৰু ধৈৰ্য্যৰে সঠিক দিশত আগবাঢ়ি যাওক। প্ৰতিটো গন্তব্যস্থান কঠিন, কিন্তু অসম্ভৱ নহয়। চেষ্টা কৰি থাকিলে এদিন সফলতাই তোমাৰ ভৰি স্পৰ্শ কৰিব।"
তেওঁ পিতৃৰ নাম হাজী সাউদ আজম ৰহমানী (অৱসৰপ্ৰাপ্ত কৃষি বিষয়া) আৰু মাতৃৰ নাম হৈছে হাজ্জন জাহান আৰা খাতুন (চৰকাৰী বিদ্যালয়ৰ প্ৰাক্তন প্ৰধান শিক্ষক)। ৱাছিমৰ জেষ্ঠ ভাতৃয়ে মুজাফ্ফৰপুৰৰ ব্যৱসায়ী আৰু কনিষ্ঠ ভাতৃ পাটনাত আইন অধ্যয়ন কৰি আছে। দুগৰাকী ভগ্নীৰ এগৰাকী চৰকাৰী শিক্ষয়িত্ৰী আৰু আনগৰাকী গৃহিণী।
সীমিত সা-সুবিধা, পেছাদাৰী দায়িত্ব আৰু বহু বাধাৰ মাজতো কিদৰে অহৰহ প্ৰচেষ্টা আৰু প্ৰকৃত নিষ্ঠাৰ বলত যিকোনো লক্ষ্যত উপনীত হ’ব পৰা যায়, সেই বিষয়ে আজিৰ যুৱক-যুৱতীসকলৰ বাবে ড০ ৱাছিম উৰ ৰেহমানৰ কাহিনীয়ে এক প্ৰেৰণা যোগায়।
ৱাছিমে কেৱল চিকিৎসক হিচাপেই ৰোগীক সেৱা আগবঢ়োৱাই নহয়, এতিয়া প্ৰশাসক হিচাপে সামগ্ৰিকভাৱে সমাজখনক সেৱা আগবঢ়াবলৈ সাজু হৈছে।
