গুৱাহাটীলৈ আহি ভাড়াঘৰ-হোষ্টেল বিচৰাৰ বিড়ম্বনা দূৰ কৰিলে ৪ জন প্ৰতিভাৱান শিক্ষাৰ্থীয়ে

Story by Ariful Islam | Posted by Munni Begum • 1 Months ago

এপ্লিকেচনটোৰ চাৰিওগৰাকী প্ৰস্তুতকৰ্তা

আৰিফুল ইছলাম / গুৱাহাটী

পঢ়িবলৈ বা কামৰ সন্ধানত ৰাজ্যৰ ভিন্ন প্ৰান্তৰ পৰা গুৱাহাটী মহানগৰীলৈ অহা ছাত্ৰ-ছাত্ৰী বা অন্য লোকৰ বাবে থাকিবলৈ হোষ্টেল বা ভাড়াঘৰ বিচৰাটো এক জটিল আৰু বিড়ম্বনাৰ কাম হৈ পৰে। পচন্দৰ ভাড়াঘৰ এটা অথবা হোষ্টেল এখনৰ সন্ধানত বহু ব্যক্তি মানসিক চাপৰো সন্মুখীন হ'বলগীয়া হয়।

কিয়নো ভাড়াঘৰ বা পেয়িং গেষ্ট দেখুৱাই দিয়াৰ বাবদ দালালসমূহক নূন্যতম ৫০০ টকা দিব লাগে। আৰু ৰূমটো ঠিক কৰি দিলে এমাহৰ ৫০% ভাড়াৰ মূল্য দালালজনক দিব লাগে। অচিনাকি চহৰখনত নতুনকৈ অহা এজন ব্যক্তিক এইসমূহ কামে অস্বস্তিত পেলায়। শেহতীয়াকৈ এই সমস্যাসমূহৰ সমাধান উলিয়াই ৪ গৰাকী ছাত্ৰই এক সুন্দৰ পদক্ষেপ গ্ৰহণ কৰিছে।

গুৱাহাটী বিশ্ববিদ্যালয় আৰু অসম ইঞ্জিনিয়াৰিং কলেজৰ ৪জন ছাত্ৰই মিলি প্ৰস্তুত কৰিছে 'ৰূমী' (Roomie) নামৰ এটা বিশেষ মোবাইল এপ্লিকেচন। গুৱাহাটীত পঢ়িবলৈ অহা ছাত্ৰ-ছাত্ৰী তথা কামৰ সন্ধানত অহা ব্যক্তিসকলৰ ভাড়াঘৰ বিচৰাত একেবাৰে সহজ হোৱাৰ উদ্দেশ্যে এই এপ্লিকেচনটো প্ৰস্তত কৰা হৈছে।

গুৱাহাটী বিশ্ববিদ্যালয়ৰ আইন মহাবিদ্যালয়ৰ ছাত্ৰ ৰয়েল পাৰভেজ, আছাম ইঞ্জিনিয়াৰিং কলেজৰ ছাত্ৰ কৃষ্ণভ দাস, আছিক আনোৱাৰ আৰু প্ৰয়াস পৱন শৰ্মা বৰাই এই 'ৰূমী' এপ্লিকেচনটো প্ৰস্তুত কৰি উলিয়াইছে। 'ৰূমী' হৈছে সকলোৱে সহজভাৱে ব্যৱহাৰ কৰিব পৰা এটা মোবাইল এপ, যিয়ে ব্যৱহাৰকাৰীক কোনো দালাল বা মধ্যভোগী নোহোৱাকৈ ভাড়াঘৰ আৰু পিজি (পেয়িং গেষ্ট) বাসস্থান বিচাৰি উলিওৱাত সহায় কৰে।

এপটোৰ ডিজাইন

আৱাজ দ্য ভইচ'ৰ সৈতে হোৱা এক সাক্ষাৎকাৰত এপ্লিকেচনটোৰ মুখ্য কাৰ্যবাহী বিষয়া ৰয়েল পাৰভেজে কয়; "আমি প্ৰথমবাৰ গুৱাহাটী আহোতে বহুত সমস্যাৰ সন্মুখীন হৈছিলোঁ। ভাড়াঘৰ বা পিজিৰ ক্ষেত্ৰত যথেষ্ট হতাশ হৈছিলোঁ। নিজৰ পছন্দৰ পিজি এটাত থাকিবলৈ বহু ঠাইত বিচাৰিব লগা হৈছিল। তাৰ পিছত মই বিশ্ববিদ্যালয়ৰ হোষ্টেল পালোঁ। হোষ্টেল পোৱাৰ পিছত আমি চাৰিওজনে বহি এদিন আলোচনা কৰিলোঁ যে এই সমস্যাটোৰ সমাধান উলিয়াব পাৰি নেকি। আমি হোষ্টেল বা পিজি খুলিবটো নোৱাৰো, কিন্তু হোষ্টেল বা পিজিৰ সন্ধান কৰি থকা ছাত্ৰ-ছাত্ৰীসকলৰ এই কাম সহজ আৰু সুলভ কৰি দিব পাৰো।"

"তেতিয়া আমি চাৰিওজনে আলোচনা কৰিলোঁ যদি আমি পিজি বা হোষ্টেলৰ মালিকসকলক মোবাইলৰ এপ এটাত সাঙুৰি ল'ব পাৰো আৰু ছাত্ৰ-ছাত্ৰীসকলে যদি এপটোত পোনপটীয়াকৈ মালিকৰ লগত যোগাযোগ কৰি ভাড়াঘৰ ল'ব পাৰে, তেতিয়া বহুত সুবিধা হ'ব আৰু দালালবোৰে মাজতে টকা খাব নোৱাৰিব", পাৰভেজে কয়।

উল্লেখযোগ্য যে, 'ৰূমী' এপটো চলিত বৰ্ষৰ ২৪ মে'ত মুকলি কৰা হৈছিল। বৰ্ত্তমানলৈ এপটোত ১২২ গৰাকী মালিকে নিজৰ ভাড়াঘৰৰ পঞ্জীয়ন কৰিছে আৰু ৩৭০০ গৰাকী ছাত্ৰ-ছাত্ৰীয়ে এপটোৰ জৰিয়তে ভাড়াঘৰ লৈছে।

Roomie এপটো মুকলি কৰা অনুষ্ঠানৰ দৃশ্য

এপ্লিকেচনটোৰ মুখ্য কাৰিকৰী বিষয়া (চিটিঅ') কৃষ্ণভ দাসে কয়; "ভাড়াঘৰ বা পিজিৰ মালিকসকলে 'ৰূমী' লেণ্ডলৰ্ড এপ নামৰ অন্য এটা এপৰ জৰিয়তে পঞ্জীয়ন কৰিব লাগে। এই এপটোত মালিকসকলে নিজৰ সা-সুবিধাসমূহ দিব পাৰে। আমাৰ ৰূমী এপটোত মেপৰ জৰিয়তে ক'ত ক'ত ভাড়াঘৰ বা পিজি আছে সুন্দৰকৈ চাব পাৰে। মানুহৰ বাজেট অনুযায়ী ভাড়াঘৰ বিচৰাৰ সুবিধাও আছে। ঘৰত বহিয়েই কি কি সুবিধা লাগে সকলোবোৰ বিচাৰিব পাৰিব আমাৰ এই এপটোত।"

ৰূমী এপ্লিকেচনটোৰ চিএমঅ' আছিক আনোৱাৰে কয়; "প্ৰথম অৱস্থাত আমি গুৱাহাটীৰ পৰাই আৰম্ভ কৰিব বিচাৰিছোঁ। গুৱাহাটীৰ পিছত আমি অন্য ঠাইলৈ ইয়াক প্ৰসাৰিত কৰিম। য'ত ছাত্ৰ-ছাত্ৰীৰ সংখ্যা বেছি, সেই ঠাইবোৰলৈ আমি ইয়াক লৈ যাম। যিসকলে ভাড়াঘৰ বিচাৰে তেওঁলোকৰ বাবে এই এপটো সম্পূৰ্ণ বিনামূলীয়া। মালিকসকলে এক বছৰৰ পঞ্জীয়ন কৰাৰ বাবদ দিব লাগিব মাত্ৰ ১০০ টকা। আমাৰ এপটোৰ আটাইতকৈ ডাঙৰ কথাটো হ'ল ভাড়াঘৰ বিচাৰি থকা মানুহে পোনপটীয়াকৈ মালিকৰ লগত কথা পাতিব পাৰিব। আমাৰ এপটোৱে দালালক দিবলগীয়া পইচাখিনি বচাই দিব।"

উল্লেখ্য যে, ৰূমী এপটো প্ৰথম পৰ্য্যায়ত গোটেই অসমত আৰু পৰৱৰ্তী পৰ্যায়ত সমগ্ৰ দেশতে মুকলি কৰাৰ লক্ষ্য আছে প্ৰতিভাৱান যুৱক তিনিজনৰ। এপটোৰ চিএমঅ' আছিক আনোৱাৰে কয় যে, তেওঁলোকৰ লক্ষ্য হৈছে যে গুৱাহাটীলৈ নতুনকৈ অহা প্ৰতিজন মানুহে যাতে 'ৰূমী' এপটো ডাউনলোড কৰি ইয়াৰ সুবিধা আদায় কৰিব পাৰে।