আজমেৰ
আজমেৰ শ্বৰীফ দৰগাহৰ আধ্যাত্মিক মুৰব্বী তথা দেৱান চৈয়দ জৈনুল আবেদিন আলী খানে ভাৰতীয় জনতা পাৰ্টিয়ে সংবিধান সলনি কৰিব বিচৰা বুলি বিৰোধী দলৰ অভিযোগক প্ৰতিহত কৰিছে। শনিবাৰে তেওঁ কয় যে ভুৱা ভ্ৰমৰ সৃষ্টি হৈছে আৰু সংশোধন কৰাটো বেলেগ আৰু ইয়াক সংবিধান সলনি কৰাৰ সৈতে জড়িত কৰিব নোৱাৰি।
১৯৫০ চনত সংবিধান ৰচনা কৰা হৈছিল। তাৰ পিছত সংসদত কিমান সংশোধনী কৰা হৈছে? জাতি আৰু জনসাধাৰণৰ স্বাৰ্থত সংশোধনীৰ প্ৰয়োজন হ’লে সেয়া কৰা হ’ব। এটা ভ্ৰমৰ সৃষ্টি হৈছে। ১৯৭৫ চনত ইন্দিৰা গান্ধীয়ে জাৰি কৰা জৰুৰীকালীন অৱস্থা সংশোধন নাছিল নেকি? সংশোধন কৰাটো সংবিধান সলনি কৰাৰ লগত জড়িত হ’ব নোৱাৰে বুলিও তেওঁ কয়।
তদুপৰি ভাৰতীয় জনতা পাৰ্টি নেতৃত্বাধীন কেন্দ্ৰীয় চৰকাৰক প্ৰশংসা কৰি চৈয়দ জৈনুলে কয় যে যোৱা ১০ বছৰত দেশখনে অগ্ৰগতি লাভ কৰিছে আৰু বিশ্বত যি স্থান লাভ কৰিছে সেয়া বৰ্তমান চৰকাৰৰ অৱদান।
আজমেৰ শ্বৰীফ দৰগাহৰ আধ্যাত্মিক মুৰব্বীগৰাকীয়ে কয়, "যোৱা ১০ বছৰত দেশখনে অগ্ৰগতি লাভ কৰিছে। দেশখনে বিশ্বত যি স্থিতি অৰ্জন কৰিছে সেয়া বৰ্তমান চৰকাৰৰ অৱদান। জনসাধাৰণেও চাব লাগে কোনে আমাৰ দেশক প্ৰগতিৰ দিশত লৈ গৈছে আৰু তাৰ পিছত ইয়াৰ ভিত্তিত নিজৰ ভোট ব্যৱহাৰ কৰিব লাগে।"
নিৰ্বাচনত ৰাম মন্দিৰ এটা ইছ্যু হ’ব নেকি বুলি সোধাত চৈয়দ জৈনুল আবেদিনে কয় যে ৰাম মন্দিৰ ইছ্যু হ’ব পাৰে, কিন্তু ইয়াক নিৰ্বাচনৰ সৈতে জড়িত কৰিব নোৱাৰি।
উচ্চতম ন্যায়ালয়ৰ সিদ্ধান্তৰ পিছতহে ৰাম মন্দিৰ নিৰ্মাণ কৰা হৈছিল। ইয়াৰ ক্ৰেডিট লোৱাৰ কোনো লাভ নাই। জনসাধাৰণে এই কথাটো বুজি পায়। যেতিয়া উচ্চতম ন্যায়ালয়ে নিজৰ সিদ্ধান্ত দিছে তেতিয়া ইয়াক লৈ আঘাত পোৱাৰ কোনো লাভ নাই বুলিও তেওঁ কয়।
লগতে নাগৰিকত্ব সংশোধনী আইন সন্দৰ্ভত ভাষণ দি তেওঁ কয়, "যেতিয়া আমাৰ দেশ দুভাগত বিভক্ত হৈছিল, তেতিয়া মানুহে গৈ পৃথিৱীৰ বিভিন্ন ঠাইত বসতি স্থাপন কৰিছিল। এতিয়া যেতিয়া তেওঁলোক ঘূৰি আহিব লাগিব, তেতিয়া তেওঁলোক ক'লৈ যাব? এই আইনখন কেৱল তেওঁলোকক নাগৰিকত্ব দিবলৈহে অনা হৈছে।"