৫০ তকৈও অধিক অসমীয়া সাহিত্যৰ সৈতে জড়িত গ্ৰন্থ অনুবাদ কৰা শক্তিময় দাসক "ধন্য নৰ-তনু-ভাল" উপন্যাসখন বঙালী ভাষাত অনুবাদ কৰোতে বহু সময়ৰ প্ৰয়োজন হৈছিল। অসম সাহিত্যসভাৰ প্ৰতি কৃতজ্ঞতা প্ৰকাশ কৰি দাসে কয়, "ধন্য নৰ-তনু-ভাল'ৰ বঙালী অনুবাদ খন গুৱাহাটীৰ লগতে কলকতা আৰু দিল্লীত উন্মোচন কৰা উচিত। কিয়নো কলকতা আৰু দিল্লীত এই উপন্যাসখন উন্মোচন কৰিলে ভাৰতৰ বিভিন্ন প্ৰান্তৰ লোকেও এই উপন্যাসখনৰ প্ৰতি আকৰ্ষিত হোৱাৰ থল আছে। কলকতাত অৱস্থিত জাতীয় সাহিত্য প্ৰকাশন ট্ৰাষ্টেও (জাতীয় সাহিত্য প্ৰকাশন ট্ৰাষ্টৰ প্ৰতিষ্ঠাপক সম্পাদক) এই গ্ৰন্থখনৰ বহুল প্ৰচাৰৰ বাবে পদক্ষেপ গ্ৰহণ কৰিব।" 

অসম সাহিত্য সভাৰ প্ৰাক্তন মুখপাত্ৰ তথা বৰ্তমানৰ কাৰ্যকৰি সদস্য পংকজ কুমাৰ দত্তই আৱাজ-দ্যা ভইচক জনোৱা মতে শক্তিময় দাসৰ অসমীয়া সাহিত্যৰ প্ৰতি থকা আগ্ৰহ আৰু দ্বায়িত্ববোধ সচাঁকৈয়ে এক উৎকৃষ্ট নিদৰ্শন। শক্তিময় দাসে ৰসৰাজ লক্ষ্মীনাথ বেজবৰুৱাৰ জন্মৰ সঠিক তাৰিখ আৰু বাৰ বিচাৰি উলিয়াইছিল। তেওঁ ইতিমধ্যে ৰসৰাজ লক্ষ্মীনাথ বেজবৰুৱাৰ 'বুঢ়ী আইৰ সাধু' গল্প পুথিখন বঙালী ভাষাত অনুবাদ কৰি উলিয়াইছে। 

জীৱনে-মৰণে চিৰদিন অসমীয়া জনৰ লেখনিতে নিহিত হৈ আছে অসম আৰু অসমীয়া সমাজখন। এই বৰেণ্য সাহিত্যিকগৰাকীৰ লেখনিত প্রতিফলিত হৈছে মানুহৰ প্ৰতি থকা গভীৰ মমত্ববোধ। ধৰ্মৰ বান্ধোনে এই গৰাকী লেখকক যেন বান্ধি ৰাখিব পৰা নাছিল। তেখেতে আজান ফকীৰৰ জিকিৰসমূহ যেনেদৰে সংগ্ৰহ কৰিছিল, তেনেদৰে মহাপুৰুষ শংকৰদেৱৰ জীৱনভিত্তিক প্ৰথমখন উপন্যাস “ধন্য নৰ-তনু-ভাল” লেখি অসমীয়া সাহিত্যৰ ভড়াঁল সমৃদ্ধ কৰিছিল। মছজিদ আৰু নামঘৰ দুয়োঠাইতে তেখেতে একেই আসনেই লাভ কৰিছিল।