পাটনা
মঙলবাৰে বিহাৰত দ্বিতীয় আৰু অন্তিম পৰ্যায়ৰ ভোটগ্ৰহণত প্ৰায় ৬৯ শতাংশ ভোটদানৰ অভিলেখ গঢ়ে আৰু ইয়াৰ লগতে প্ৰায় এমাহজোৰা অনুশীলনৰ সামৰণি পৰে। ১৪ নৱেম্বৰত এই নিৰ্বাচনী ফলাফল ঘোষণা কৰা হ'ব। যিয়ে জেডিইউৰ সভাপতি তথা দীৰ্ঘদিনীয়া মুখ্যমন্ত্ৰী নীতিশ কুমাৰ আৰু প্ৰাক্তন উপ-মুখ্যমন্ত্ৰী তেজস্বী যাদৱৰ ভাগ্য নিৰ্ণয় কৰিব।
মুখ্য নিৰ্বাচনী বিষয়া বিনোদ সিং গুঞ্জিয়ালে কয় যে, ৰাজ্যখনত দ্বিতীয় আৰু অন্তিম পৰ্যায়ৰ বিধানসভা নিৰ্বাচনত সাময়িকভাৱে ৬৮.৭৯ শতাংশ ভোটাৰৰ ভোটদানৰ হাৰ ৰেকৰ্ড কৰা হৈছে। দুয়োটা পৰ্যায়তে ৰাজ্যখনত সাময়িকভাৱে ৬৬.৯০ শতাংশ ভোটাৰৰ ভোটদান পঞ্জীয়ন কৰা হৈছে, যিটো যোৱা বিধানসভা নিৰ্বাচনতকৈ ৯.৬ শতাংশ পইণ্ট বেছি। ২০২০ চনৰ বিধানসভা নিৰ্বাচনত ৰাজ্যত ভোটাৰৰ হাৰ ৫৭.২৯ শতাংশ আছিল।
উল্লেখযোগ্য যে, প্ৰথম পৰ্যায়ৰ লগতে দ্বিতীয় পৰ্যায়তো ৭০ শতাংশতকৈ বহু বেছি ভোটৰ শতাংশ হাৰ পোৱা সকলো জিলাই গংগাৰ উত্তৰত অৱস্থিত, যিটো অঞ্চল ঘন জনবসতিপূৰ্ণ আৰু য’ত পৰম্পৰাগতভাৱে এন ডি এয়ে ভাল প্ৰদৰ্শন কৰিছে। কিন্তু শীৰ্ষ তিনিখন জিলা কিছানগঞ্জ, কাটিহাৰ আৰু পূৰ্ণেয়াত মুছলমানৰ সংখ্যা বেছি আৰু আচৰিত নহয় যে যোৱা নিৰ্বাচনত সকলোৱে INDIA ব্লকক ভোট দিছিল।
দ্বিতীয় পৰ্যায়ত শাসকীয় এন ডি এৰ লগতে বিৰোধী ইণ্ডিয়া ব্লকেও উচ্চ প্ৰতিদ্বন্দিতাৰ সন্মুখীন হৈছে। প্ৰথম পৰ্যায়ত ৬ নৱেম্বৰত ১২১টা সমষ্টিৰ ৩.৭৫ কোটি নিৰ্বাচকৰ ভিতৰত ৬৫.০৯ শতাংশই ভোটদান কৰিছিল, যিটো দুয়োটা প্ৰতিদ্বন্দ্বী গোটে নিজৰ বাবে সুবিধাজনকৰ বুলি দাবী কৰিছে।
কটকটীয়া নিৰাপত্তা ব্যৱস্থাৰ মাজতে দ্বিতীয় আৰু অন্তিম পৰ্যায়ৰ বিধানসভা নিৰ্বাচনত বিহাৰৰ ১২২টা সমষ্টিৰ বাবে ভোটগ্ৰহণ আৰম্ভ হয়। এই পৰ্যায়ত নীতিশ কুমাৰ চৰকাৰৰ কেইবাজনো মন্ত্ৰীকে ধৰি ১৩০২জন প্ৰাৰ্থীৰ নিৰ্বাচনী ভাগ্যত নিৰ্ণয় কৰা হ’ব। ভোটগ্ৰহণৰ পূৰ্বে প্ৰধানমন্ত্ৰী নৰেন্দ্ৰ মোদীয়ে আৰু মুখ্যমন্ত্ৰী কুমাৰে ভোটগ্ৰহণৰ অন্তিম পৰ্যায়ত নিজৰ ফ্ৰেঞ্চাইজি প্ৰয়োগ কৰিবলৈ আৰু ভোটদানৰ নতুন অভিলেখ গঢ়িবলৈ নিৰ্বাচকসকলক আহ্বান জনায়।
প্ৰধানমন্ত্ৰী নৰেন্দ্ৰ মোদীয়ে কয়, "বিহাৰ বিধানসভা নিৰ্বাচনত আজি দ্বিতীয় আৰু অন্তিম পৰ্যায়ৰ ভোটদান। মই সকলো ভোটাৰকে উৎসাহেৰে অংশগ্ৰহণ কৰি নতুন ভোটদানৰ অভিলেখ গঢ়িবলৈ আহ্বান জনাইছো। বিশেষকৈ প্ৰথমবাৰৰ বাবে ভোটদান কৰা ৰাজ্যৰ পৰা অহা মোৰ যুৱ বন্ধুসকলক আহ্বান জনাইছো যে তেওঁলোকে কেৱল নিজেই ভোটদান কৰাই নহয়, আনকো ভোটদান কৰিবলৈ অনুপ্ৰাণিত কৰক।"
কুমাৰে কয় যে ভোটদান "কেৱল আমাৰ অধিকাৰেই নহয়, ই এক দায়িত্বও"। ছ'চিয়েল মিডিয়াত এটা পোষ্টযোগে তেওঁ কয় যে, বিহাৰ বিধানসভাৰ দ্বিতীয় পৰ্যায়ৰ নিৰ্বাচনত ভোটাধিকাৰ সাব্যস্ত কৰিবলৈ ভোটাৰক আহ্বান জনাইছো।
চূড়ান্ত পৰ্যায়ত ভোটদান হোৱা জিলাসমূহৰ ভিতৰত আছে পশ্চিম আৰু পূব চম্পাৰাণ, সীতামড়ী, মধুবনী, সুপৌল, আৰৰিয়া, আৰু কিছানগঞ্জ। দ্বিতীয় পৰ্যায়ৰ ভোটগ্ৰহণ আনুষ্ঠানিকভাৱে শেষ হোৱাৰ লগে লগে সামৰণি পৰে বিহাৰ বিধানসভা নিৰ্বাচনৰ৷ তাৰ লগে লগে টেলিভিছন চেনেলসমূহে প্ৰকাশ কৰে নিৰ্বাচনকেন্দ্ৰিক এগজিট প'ল৷ এগজিট প'লে ৰাষ্ট্ৰীয় গণতান্ত্ৰিক মিত্ৰজোঁটে(এন ডি এ) ক্ষমতাৰ বাঘজৰী পুনৰ চম্ভালিব বুলি ভৱিষ্যদ্বাণী কৰে।
