নতুন দিল্লী
কৈলাস মানসৰোবৰ তীৰ্থযাত্ৰালৈ যোৱা প্ৰায় ৫২ জন ভাৰতীয় তীৰ্থযাত্ৰী বৰ্তমান নেপালৰ কাঠমাণ্ডুত আবদ্ধ হৈ আছে। তেওঁলোকৰ নিৰাপদে পৰৱৰ্তী যাত্ৰা নিশ্চিত কৰিবলৈ জৰুৰী সহায়ৰ প্ৰয়োজন হোৱা বুলি জানিব পৰা গৈছে।
এই বিষয়টো শনিবাৰে ৰাষ্ট্ৰীয়তাবাদী কংগ্ৰেছ পাৰ্টি (শৰদচন্দ্ৰ পাৱাৰ গোট)ৰ সাংসদ সুপ্ৰিয়া চুলেই উত্থাপন কৰিছে। তেওঁ ভাৰতৰ বৈদেশিক পৰিক্ৰমা মন্ত্ৰালয়, নেপাল আৰু চীনস্থিত ভাৰতীয় দূতাবাসক বিষয়টো তৎকালে হস্তক্ষেপ কৰি আবদ্ধ তীৰ্থযাত্ৰীসকলক প্ৰয়োজনীয় সহায় আগবঢ়োৱাৰ আহ্বান জনায়।
সামাজিক মাধ্যম এক্সত কৰা এক পোষ্টত সুপ্ৰিয়া চুলে লিখিছে, “কৈলাস মানসৰোবৰলৈ যাত্ৰা কৰা প্ৰায় ৫২ জন ভাৰতীয় নাগৰিক বৰ্তমান কাঠমাণ্ডুত আবদ্ধ হৈ আছে আৰু তেওঁলোকক অতি সোনকালে সহায়ৰ প্ৰয়োজন হৈছে।”
তেওঁ বৈদেশিক পৰিক্ৰমা মন্ত্ৰী এছ জয়শংকৰ, কাঠমাণ্ডুস্থিত ভাৰতীয় দূতাবাস, বেইজিংস্থিত ভাৰতীয় দূতাবাস আৰু বৈদেশিক পৰিক্ৰমা মন্ত্ৰালয়ক বিষয়টোত দৃষ্টি দি তীৰ্থযাত্ৰীসকলৰ নিৰাপদ যাত্ৰা নিশ্চিত কৰিবলৈ প্ৰয়োজনীয় ব্যৱস্থা গ্ৰহণৰ অনুৰোধ জনায়।
উল্লেখযোগ্য যে, ২০ জুনত ২০২৬ চনৰ কৈলাস মানসৰোবৰ যাত্ৰাৰ প্ৰথমটো তীৰ্থযাত্ৰী দল ছিকিমৰ নাথু-লা গিৰিপথেৰে ভাৰত-চীন সীমান্ত অতিক্ৰম কৰি চীনত প্ৰৱেশ কৰিছিল।
ছিকিমৰ ৰাজ্যপাল ওম প্ৰকাশ মাথুৰে ৰাজ্যৰ পৰ্যটন মন্ত্ৰী ছেৰিং থেন্ডুপ ভূটিয়া আৰু ছিকিম টুৰিজম ডেভেলপমেণ্ট কৰ্প'ৰেচনৰ বিষয়াবৰ্গৰ উপস্থিতিত এই তীৰ্থযাত্ৰাৰ শুভাৰম্ভ কৰে।
এই উপলক্ষে ৰাজ্যপাল মাথুৰে কয়, “এই তীৰ্থযাত্ৰা পাঁচ বছৰৰ বাবে বন্ধ আছিল। যোৱা বছৰ ইয়াক পুনৰ আৰম্ভ কৰা হৈছিল আৰু সেই সময়তো প্ৰথমটো দলক বিদায় জনোৱাৰ সৌভাগ্য মোৰ হৈছিল।”
তেওঁ লগতে কয় যে, পূৰ্বে দুয়োখন দেশৰ মাজত কিছুমান ভুল বুজাবুজি আছিল যদিও পৰৱৰ্তী সময়ত সম্পৰ্ক স্বাভাৱিক কৰাৰ প্ৰয়োজনীয়তা উপলব্ধি কৰা হয়। ইয়াৰ ফলত পুনৰকৈ তীৰ্থযাত্ৰা আৰম্ভ কৰা সম্ভৱ হয়। তীৰ্থযাত্ৰাৰ বাবে উৎকৃষ্ট ব্যৱস্থা গ্ৰহণ কৰাৰ বাবে তেওঁ সংশ্লিষ্ট কৰ্তৃপক্ষ আৰু স্থানীয় প্ৰশাসনক ধন্যবাদ জনায়।
ছিকিমৰ পৰ্যটন মন্ত্ৰী টি টি ভূটিয়াই কয় যে, যোৱা বছৰৰ দৰেই এইবাৰো কমেও ১০টা তীৰ্থযাত্ৰী দল নাথু-লা গিৰিপথেৰে কৈলাস মানসৰোবৰ যাত্ৰা সম্পন্ন কৰাৰ সম্ভাৱনা আছে। এই দলসমূহ ৩০ জুনত সীমান্তলৈ উভতি অহাৰ কথা আছে। তেওঁ কয়, “পাঁচ বছৰৰ দীঘলীয়া বিৰতিৰ পিছত পুনৰ আৰম্ভ হোৱা এই তীৰ্থযাত্ৰাই ছিকিমৰ পৰ্যটন উদ্যোগলৈ নতুন গতি কঢ়িয়াই আনিছে।”
প্ৰতি বছৰে জুনৰ পৰা আগষ্ট অথবা ছেপ্টেম্বৰ মাহৰ ভিতৰত ভাৰতৰ বৈদেশিক পৰিক্ৰমা মন্ত্ৰালয়ে দুটা পথ ক্ৰমে উত্তৰাখণ্ডৰ লিপুলেখ গিৰিপথ আৰু ছিকিমৰ নাথু-লা গিৰিপথ মাৰ্গেৰে কৈলাস মানসৰোবৰ যাত্ৰা আয়োজন কৰে।
কৈলাস মানসৰোবৰ যাত্ৰা ধৰ্মীয় আৰু সাংস্কৃতিক দুয়োটা দিশৰ পৰাই অতি গুৰুত্বপূৰ্ণ। প্ৰতি বছৰে শতাধিক ভাৰতীয় ভক্তই এই তীৰ্থযাত্ৰাত অংশগ্ৰহণ কৰে। হিন্দু ধৰ্মাৱলম্বীৰ বিশ্বাস অনুসৰি কৈলাস পৰ্বত হৈছে ভগৱান শিৱৰ বাসস্থান। ইয়াৰ উপৰিও এই তীৰ্থক্ষেত্ৰ জৈন আৰু বৌদ্ধ ধৰ্মাৱলম্বীসকলৰ বাবেও সমানভাৱে পৱিত্ৰ আৰু তাৎপৰ্যপূৰ্ণ।
এই তীৰ্থযাত্ৰাত অংশগ্ৰহণ কৰিবলৈ ইচ্ছুক যোগ্য ভাৰতীয় নাগৰিকসকলৰ বৈধ ভাৰতীয় পাছপ'ৰ্ট থকাটো বাধ্যতামূলক।
