আই.এন.এছ. তাৰাগিৰি
বিশাখাপত্তনম (অন্ধ্ৰ প্ৰদেশ)
ভাৰতীয় নৌসেনাই শুকুৰবাৰে বিশাখাপত্তনমত এক অনুষ্ঠানৰ জৰিয়তে অত্যাধুনিক ষ্টেলথ ফ্ৰিগেট (stealth Frigate) 'আই.এন.এছ. তাৰাগিৰি' নৌসেনাত অন্তৰ্ভুক্ত কৰিবলৈ সাজু হৈছে। এই অনুষ্ঠানত প্ৰতিৰক্ষা মন্ত্ৰী ৰাজনাথ সিং উপস্থিত থাকিব।
এই অনুষ্ঠানত ভাৰতীয় নৌসেনাৰ মুৰব্বী এডমিৰেল দিনেশ কুমাৰ ত্ৰিপাঠীয়ে আতিথ্য আগবঢ়াব।
পৰিবৰ্তিত আঞ্চলিক নিৰাপত্তাৰ পৰিৱেশ আৰু ভাৰত মহাসাগৰীয় অঞ্চলত (Indo-Pacific) ভাৰতৰ বৰ্ধিত সক্ৰিয়তাৰ বাবে দেশৰ পূব উপকূলৰ কৌশলগত আৰু সামুদ্ৰিক গুৰুত্ব ক্ৰমাগতভাৱে বৃদ্ধি পোৱাৰ সময়তে 'তাৰাগিৰি'ৰ অন্তৰ্ভুক্তি ঘটিছে। তাৰাগিৰিৰ অন্তৰ্ভুক্তিয়ে নৌসেনাৰ শক্তিশালী বহৰ বৃদ্ধি কাৰ্যসূচীৰ জৰিয়তে নিজৰ যুদ্ধৰ প্ৰস্তুতি আৰু কাৰ্যক্ষমতা শক্তিশালী কৰাৰ নিৰন্তৰ প্ৰচেষ্টাক প্ৰতিফলিত কৰিছে।
'প্ৰজেক্ট ১৭এ' (Project 17A) শ্ৰেণীৰ চতুৰ্থখন শক্তিশালী যুদ্ধজাহাজ হিচাপে তাৰাগিৰি কেৱল এখন জাহাজেই নহয়; ই হ’ল 'মেক ইন ইণ্ডিয়া' (Make in India) মনোভাৱ আৰু আমাৰ থলুৱা জাহাজ নিৰ্মাণ কেন্দ্ৰসমূহৰ উন্নত কাৰিকৰী দক্ষতাৰ এক ৬৬৭০ টন ওজনৰ মূৰ্ত প্ৰতীক।
মুম্বাইৰ মাজাগাঁও ডক শ্বিপবিল্ডাৰ্ছ লিমিটেড (MDL) এ নিৰ্মাণ কৰা এই ফ্ৰিগেটখন পূৰ্বৰ আৰ্হিসমূহৰ তুলনাত যথেষ্ট উন্নত। ইয়াৰ মসৃণ গঠন আৰু বিশেষভাৱে কম ৰাডাৰ ক্ৰছ-চেকচনে (Radar Cross-Section) ইয়াক অত্যন্ত নিশব্দে আৰু গোপনে লক্ষ্যস্থানত আক্ৰমণ কৰাৰ ক্ষমতা প্ৰদান কৰে। ৭৫ শতাংশতকৈও অধিক থলুৱা সামগ্ৰীৰে নিৰ্মিত এই জাহাজখনে দেশীয় ঔদ্যোগিক ব্যৱস্থাৰ পৰিপক্কতা প্ৰদৰ্শন কৰিছে, য’ত বৰ্তমান ২০০ তকৈও অধিক অতি ক্ষুদ্ৰ, ক্ষুদ্ৰ আৰু মজলীয়া উদ্যোগ (MSME) জৰিত হৈ আছে। ই ভাৰত চৰকাৰৰ 'আত্মনিৰ্ভৰশীল ভাৰত' আঁচনিক উৎসাহিত কৰাৰ লগতে হাজাৰ হাজাৰ ভাৰতীয়ক সংস্থাপন দিছে।
কম্বাইণ্ড ডিজেল অৰ গেছ (CODOG) চালিত ইঞ্জিনৰ দ্বাৰা পৰিচালিত তাৰাগিৰিক 'অধিক গতিবেগ আৰু অধিক সহনশীলতা'ৰ সৈতে বহুমুখী সামুদ্ৰিক কাৰ্যকলাপৰ বাবে ডিজাইন কৰা হৈছে। জাহাজখনৰ অস্ত্ৰ-শস্ত্ৰ বিশ্বমানৰ, যাৰ ভিতৰত আছে ছুপাৰছনিক স্থলৰ পৰা স্থললৈ নিক্ষেপ কৰিব পৰা মিছাইল, মধ্যম দূৰত্বৰ স্থলৰ পৰা আকাশলৈ নিক্ষেপ কৰিব পৰা মিছাইল আৰু এক বিশেষ চাবমেৰিন বিৰোধী যুদ্ধ সঁজুলি (Anti-Submarine Warfare suite)। এই সকলোবোৰ ব্যৱস্থা এক অত্যাধুনিক কমবেট মেনেজমেণ্ট চিষ্টেমৰ (Combat Management System) সৈতে সংলগ্ন কৰা হৈছে, যাতে জাহাজৰ কৰ্মীসকলে চকুৰ পচাৰতে যিকোনো ভাবুকিৰ সঠিক সঁহাৰি দিব পাৰে।
সাগৰৰ এজন দক্ষ চিকাৰী হিচাপে ইয়াৰ ভূমিকাৰ উপৰিও, তাৰাগিৰিক আধুনিক কূটনীতি আৰু মানৱীয় সংকটৰ জটিলতাৰ বাবেও প্ৰস্তুত কৰা হৈছে। ইয়াৰ নমনীয় কৰ্মপদ্ধতিয়ে ইয়াক তীব্ৰ যুদ্ধৰ পৰা আৰম্ভ কৰি মানৱীয় সাহায্য আৰু দুৰ্যোগ নিৰাময় (HADR) লৈকে সকলো কামৰ বাবে আদৰ্শ কৰি তুলিছে।
ভাৰতীয়সকলে ডিজাইন কৰা, ভাৰতীয়সকলে নিৰ্মাণ কৰা আৰু ভাৰতীয়সকলে পৰিচালনা কৰা জাহাজৰ সৈতে এখন 'বিকশিত' আৰু 'সমৃদ্ধ ভাৰত'ৰ সাগৰীয় সীমান্ত সুৰক্ষিত কৰি ভাৰতীয় নৌসেনাই এক যুদ্ধসক্ষম, একত্ৰিত, বিশ্বাসযোগ্য আৰু আত্মনিৰ্ভৰশীল শক্তি হিচাপে ক্ৰমান্বয়ে আগবাঢ়ি গৈছে। বৰ্ধিত সামুদ্ৰিক শক্তিৰ এক নিৰ্দৰ্শন আৰু দেশৰ নীলা জলসীমাৰ এজন তীখাৰ দৰে সুৰক্ষাকৰ্মী হিচাপে তাৰাগিৰি এক উজ্জ্বল ভৱিষ্যতৰ বাবে সাজু হৈছে।
