নতুন দিল্লী
আৰ্টেমিছ-২ অভিযানৰ মহাকাশচাৰীসকলে চন্দ্ৰৰ এক ঐতিহাসিক পৰিভ্ৰমণৰ অন্তত পৃথিৱী অভিমুখে তেওঁলোকৰ যাত্ৰাৰ শেষৰ কেইঘণ্টামানত প্ৰশান্ত মহাসাগৰত অৱতৰণৰ বাবে প্ৰস্তুতি চলাইছে। চন্দ্ৰৰ আনটো দিশেৰে পৰিভ্ৰমণ কৰি থকাৰ সময়ত ক্ৰুৱে পৃথিৱীৰ পৰা ২৫২,৭৫৬ মাইল (৪০৬,৭৭১ কিলোমিটাৰ) দূৰত্ব অতিক্ৰম কৰি মানৱ মহাকাশ ভ্ৰমণৰ ক্ষেত্ৰত এক নতুন অভিলেখ গঢ়ে।
নাছাই বৃহস্পতিবাৰে জনোৱা মতে, ঐতিহাসিক মহাকাশ অভিযান আৰ্টেমিছ ২-এ চন্দ্ৰ আৰু পৃথিৱীৰ মাজৰ আধাবাট অতিক্ৰম কৰিছে। মহাকাশ সংস্থাটোৰ তথ্য অনুসৰি, মহাকাশচাৰীসকলে পূব সময় অনুসৰি ১০ এপ্ৰিলত ছান ডিয়েগো উপকূলৰ প্ৰশান্ত মহাসাগৰত অৱতৰণ কৰিব।
এক্সত এক পোষ্টৰ জৰিয়তে সবিশেষ শ্বেয়াৰ কৰি নাছাই কয়, “তেওঁলোক ঘৰলৈ উভতি অহাৰ আধাবাট পাইছে । আৰ্টেমিছ ২-ৰ মহাকাশচাৰীসকলে চন্দ্ৰ আৰু পৃথিৱীৰ মাজৰ ‘অৰ্ধপথ’ অতিক্ৰম কৰিছে । তেওঁলোকে ১০ এপ্ৰিল শুকুৰবাৰে নিশা প্ৰায় ৮:০৭ বজাত ছান ডিয়েগো উপকূলৰ প্ৰশান্ত মহাসাগৰত অৱতৰণ কৰিব ।” এই অভিযানৰ সময়ত ক্ৰুৱে মহাকাশৰ পৰা সূৰ্যগ্ৰহণো প্ৰত্যক্ষ কৰে। আমেৰিকাৰ ইণ্ডো পেচিফিক কমাণ্ডৰ মতে, অৱতৰণৰ পিছত আমেৰিকাৰ নৌসেনাৰ ইউ.এছ.এছ. জন পি মূৰ্থাই (LPD 26) ক্ৰু আৰু আৰিয়ন মহাকাশযানখন উদ্ধাৰ কৰিব।
ইফালে, চিনেটৰ টেড ক্ৰুজে মহাকাশচাৰীসকলৰ এই সাফল্যক প্ৰশংসা কৰি কয় যে তেওঁলোকে এক নতুন প্ৰজন্মক অনুপ্ৰাণিত কৰিছে। আৰ্টেমিছ-২ অভিযান নাছাৰ চন্দ্ৰলৈ মানুহ পঠিওৱাৰ পৰিকল্পনা আৰু ভৱিষ্যতৰ গভীৰ মহাকাশ অন্বেষণৰ দিশত এক গুৰুত্বপূৰ্ণ পদক্ষেপ। এই ক্ৰুত নাছাৰ মহাকাশচাৰী ৰিড ওৱাইজমান, ভিক্টৰ গ্লোভাৰ আৰু ক্ৰিস্টিনা কচৰ লগতে কানাডিয়ান স্পেচ এজেন্সিৰ মহাকাশচাৰী জেৰেমি হানচেন অন্তৰ্ভুক্ত আছে। আৰ্টেমিছ-২ অভিযানে এপল’ ১৩ অভিযানৰ ২৪৮,৬৫৫ মাইলৰ পূৰ্বৰ অভিলেখ ভংগ কৰি মানুহে পৃথিৱীৰ পৰা আটাইতকৈ বেছি দূৰত্ব ভ্ৰমণ কৰাৰ অভিলেখ গঢ়িছে।
আৰ্টেমিছ ২ হৈছে নাছাৰ আৰ্টেমিছ অভিযানৰ প্ৰথমটো মানৱ পৰিচালিত পৰীক্ষামূলক উৰণ। নাছাৰ চৰকাৰী ৱেবছাইট অনুসৰি, আৰ্টেমিছ ২-ৰ পাঁচটা মুখ্য অগ্ৰাধিকাৰ আছে। ইয়াৰ ভিতৰত আছিল মহাকাশ পৰিৱেশত আৰু পৃথিৱীলৈ উভতি অহাৰ সময়ত উৰণ কৰ্মীক সুস্থ কৰি ৰখাৰ বাবে প্ৰণালী আৰু দলসমূহৰ সামৰ্থ্য; মানৱ পৰিচালিত চন্দ্ৰ অভিযানৰ বাবে অত্যাৱশ্যকীয় প্ৰণালী আৰু কাৰ্যকলাপৰ প্ৰদৰ্শন; ভৱিষ্যতৰ অভিযানৰ বাবে কাৰ্যক্ষমতা মূল্যায়ন কৰি হাৰ্ডৱেৰ আৰু তথ্য উদ্ধাৰ কৰা; জৰুৰীকালীন ব্যৱস্থাৰ ক্ষমতা প্ৰদৰ্শন আৰু উদ্ধাৰ অভিযানৰ দৰে কাৰ্যসমূহৰ বৈধতা নিৰূপণ কৰা আৰু উপ-প্ৰণালীসমূহ পৰীক্ষা কৰাৰ বাবে অতিৰিক্ত লক্ষ্যসমূহ পূৰণ কৰা।
