ইছলামবাদ/নতুন দিল্লী
পাকিস্তানৰ প্ৰধানমন্ত্ৰী শ্বেহবাজ শ্বৰীফে বৃহস্পতিবাৰে কয় যে তেওঁ ভাৰতৰ সৈতে শান্তি আলোচনাত মিলিত হ’বলৈ সাজু আছে।
ইয়াৰ পূৰ্বে বুধবাৰে পাকিস্তানৰ প্ৰধানমন্ত্ৰীগৰাকীয়ে ভাৰতক কাশ্মীৰ বিবাদ আৰু পানী বিতৰণকে ধৰি দ্বিপাক্ষিক সমস্যাসমূহৰ সমাধানৰ বাবে এক বিস্তৃত আলোচনালৈ আমন্ত্ৰণ জনায়।
পাকিস্তানৰ প্ৰধানমন্ত্ৰীৰ শেহতীয়া মন্তব্যৰ সময়তে ইছলামবাদে কয় যে ভাৰত আৰু পাকিস্তানৰ মাজত যুদ্ধবিৰতি এতিয়া ১৮ মে’লৈ বৃদ্ধি কৰা হৈছে। উপ প্ৰধানমন্ত্ৰী ইছাক দাৰে বৃহস্পতিবাৰে কয় যে পাকিস্তান আৰু ভাৰতৰ সামৰিক অভিযানৰ সঞ্চালক প্ৰধানসকলে হটলাইনৰ জৰিয়তে যুদ্ধবিৰতিৰ বিষয়ে আলোচনা কৰিছিল আৰু ইয়াক ১৮ মে’লৈ বৃদ্ধি কৰা হৈছে।
ভাৰতীয় বিষয়াসকলে কয় যে, "২০২৫ চনৰ ১০ মে’ত দুয়োজন ডিজিএমঅ’ৰ মাজত হোৱা বুজাবুজিৰ ওপৰত আৰু অধিক আত্মবিশ্বাস গঢ়ি তোলাৰ ব্যৱস্থা অব্যাহত ৰখাৰ সিদ্ধান্ত লোৱা হৈছে যাতে সজাগতাৰ মাত্ৰা হ্ৰাস পায়।"
তীব্ৰ সীমাপাৰ ড্ৰোন আৰু মিছাইল আক্ৰমণৰ অন্তত সংঘাতৰ অন্ত পেলাবলৈ ১০ মে’ত ভাৰত আৰু পাকিস্তানে এক বুজাবুজিত উপনীত হৈছিল।
২২ এপ্ৰিলৰ পহলগাম সন্ত্ৰাসবাদী আক্ৰমণৰ প্ৰতিক্ৰিয়া স্বৰূপে ৭ মে’ৰ পুৱাতে ভাৰতে ‘অপাৰেচন সেন্দুৰ’ৰ অধীনত সন্ত্ৰাসবাদী আন্তঃগাঁথনিৰ ওপৰত নিখুঁত আক্ৰমণ চলায়। ভাৰতীয় এই কাৰ্য্যৰ পিছত ৮, ৯ আৰু ১০ মে’ত পাকিস্তানে ভাৰতীয় সামৰিক ঘাটিত আক্ৰমণৰ চেষ্টা কৰে। ভাৰতীয় বাহিনীয়ে প্ৰতিহত কৰি পাকিস্তানৰ কেইবাটাও সামৰিক ঘাটিত তীব্ৰ আক্ৰমণ চলায়।
তিনিদিনীয়া তীব্ৰ সামৰিক সংঘাতৰ অন্তত পাকিস্তানৰ ডিজিএমঅ’ই ভাৰতীয় সমকক্ষক ফোন কৰি সীমাপাৰ সকলো ধৰণৰ গুলীচালনা বন্ধ কৰিবলৈ অনুৰোধ কৰাৰ পিছত ১০ মে’ত দুয়োপক্ষ গুলীচালনা বন্ধ কৰিবলৈ সন্মত হয়।
কিন্তু কেইঘণ্টামানৰ পিছত পাকিস্তানে এই বুজাবুজি উলংঘা কৰি সীমান্তৰ গাঁওসমূহৰ ওপৰত প্ৰচণ্ড গোলাবৰ্ষণ আৰু গুলীচালনা কৰে।
