গুৱাহাটী
গঁড়ৰ চোৰাং চিকাৰৰ বিৰুদ্ধে অভিযান অধিক শক্তিশালী কৰাৰ উদ্দেশ্যে কাজিৰঙা ৰাষ্ট্ৰীয় উদ্যানত নিয়োজিত বিশেষ গঁড় সুৰক্ষা বাহিনী (SRPF)ক শনিবাৰে অৰ্থাৎ ৮ আগষ্টত ৰাষ্ট্ৰীয় উদ্যানখনত অনুষ্ঠিত এক বিশেষ অনুষ্ঠানত সন্মান জনোৱা হয়।
অনুষ্ঠানত অসমৰ বনমন্ত্ৰী জয়ন্ত মল্লবৰুৱা, কাজিৰঙাৰ সাংসদ কামাখ্যা প্ৰসাদ তাছা আৰু কেশৱ মহন্ত উপস্থিত থাকে। কাজিৰঙাৰ এশিঙীয়া গঁড়ৰ সুৰক্ষাত সন্মুখৰ শাৰীত থাকি দায়িত্ব পালন কৰা বাহিনীৰ সদস্যসকলৰ অৱদানক স্বীকৃতি জনোৱাৰ উদ্দেশ্যেই এই অনুষ্ঠানৰ আয়োজন কৰা হয়।
বিস্তৃত প্ৰশিক্ষণৰ পিছত ২০১৯ চনত কাজিৰঙাত ৮২জনীয়া বিশেষ গঁড় সুৰক্ষা বাহিনী বাহিনী নিয়োগ কৰা হৈছিল। ৰাষ্ট্ৰীয় উদ্যানখনত গঁড়ৰ চোৰাং চিকাৰ ৰোধৰ ব্যৱস্থা অধিক শক্তিশালী কৰাৰ লক্ষ্যৰে এই বিশেষ বাহিনী মোতায়েন কৰা হৈছিল।
এসময়ত কাজিৰঙাত গঁড়ৰ চোৰাং চিকাৰে ভয়ংকৰ ৰূপ ধাৰণ কৰিছিল। ২০১৩ আৰু ২০১৪ চনত প্ৰতিটো বছৰত চোৰাং চিকাৰীৰ হাতত ২৭টাকৈ গঁড় নিহত হৈছিল। গঁড় হত্যাৰ এই উদ্বেগজনক সংখ্যাই কৰ্তৃপক্ষক গঁড় সুৰক্ষাৰ ক্ষেত্ৰত অধিক বিশেষায়িত আৰু সমন্বিত ব্যৱস্থা গ্ৰহণ কৰিবলৈ বাধ্য কৰিছিল।
কাজিৰঙাৰ অন্যতম প্ৰতীক এশিঙীয়া গঁড়ৰ সুৰক্ষাৰ বাবে বিশেষ গঁড় সুৰক্ষা বাহিনী নিয়োগ কৰাটো এক গুৰুত্বপূৰ্ণ পদক্ষেপ হিচাপে বিবেচিত হৈছিল। ইয়াৰ পিছৰে পৰা ৰাষ্ট্ৰীয় উদ্যানখনত চোৰাং চিকাৰবিৰোধী অভিযানত গোপন তথ্য সংগ্ৰহ, সমন্বিত নজৰদাৰী আৰু নিৰ্দিষ্ট লক্ষ্যভিত্তিক অভিযানৰ ওপৰত অধিক গুৰুত্ব দিয়া হৈছে।
বিশেষ গঁড় সুৰক্ষা বাহিনীয়ে বন বিভাগ, অসম আৰক্ষী আৰু অন্যান্য আইন-শৃংখলা তথা প্ৰৱৰ্তনকাৰী সংস্থাৰ সৈতে সমন্বয় কৰি ৰাষ্ট্ৰীয় উদ্যানখনৰ স্পৰ্শকাতৰ অঞ্চলসমূহত নিয়মীয়াকৈ টহল দি আহিছে। ইয়াৰ লগতে গোপন তথ্য সংগ্ৰহ, সম্ভাব্য বিপদৰ বিষয়ে আগতীয়াকৈ তথ্য লাভ কৰা আৰু প্ৰয়োজন অনুসৰি তৎকালীন ব্যৱস্থা গ্ৰহণতো বাহিনীটোৱে গুৰুত্বপূৰ্ণ ভূমিকা পালন কৰি আহিছে।
ৰাষ্ট্ৰীয় উদ্যানখনৰ ভিতৰত সন্মুখৰ শাৰীৰ সুৰক্ষা ব্যৱস্থা অধিক শক্তিশালী কৰাতো বিশেষ গঁড় সুৰক্ষা বাহিনীৰ অৱদান উল্লেখযোগ্য। গঁড়ৰ চোৰাং চিকাৰ ৰোধৰ বাবে চলি থকা নিৰন্তৰ প্ৰচেষ্টাত বাহিনীটোৱে গুৰুত্বপূৰ্ণ ভূমিকা পালন কৰিছে।
কাজিৰঙাত গঁড়ৰ সুৰক্ষা ব্যৱস্থা অধিক শক্তিশালী কৰাৰ লগতে সংগঠিত বন্যপ্ৰাণী অপৰাধৰ বিৰুদ্ধে নিৰন্তৰ সতৰ্কতা অব্যাহত ৰখাৰ সময়তে বিশেষ গঁড় সুৰক্ষা বাহিনীৰ জোৱানসকলক জনোৱা এই সন্মানে তেওঁলোকৰ নিষ্ঠা আৰু অৱদানক বিশেষ স্বীকৃতি প্ৰদান কৰিছে।
.webp "প্ৰতিনিধিত্বমূলক ছবি")
