আৱাজ-দ্য ভইচ অসম ব্যুৰ'
মক্কাৰ পৱিত্ৰ মছজিদ আল-হাৰামলৈ গ'লে যিটো সুমধুৰ কণ্ঠই লাখ লাখ ধৰ্মপ্ৰাণ মুছলমানৰ হৃদয় চুই গৈছিল, যিটো কণ্ঠৰ আহ্বানত প্ৰতিদিনে পুৱতি নিশা টোপনি ভাঙি মক্কাবাসীয়ে আল্লাহৰ দৰবাৰলৈ ঢাপলি মেলিছিল, সেই চিনাকি কণ্ঠস্বৰ আজি চিৰদিনৰ বাবে নিস্তব্ধ হৈ পৰিল। যি কণ্ঠই হাজাৰ হাজাৰ মানুহৰ হৃদয়ত আধ্যাত্মিকতাৰ ঢৌ তুলিছিল, সেই কণ্ঠ আজি কেৱল এক স্মৃতি। মক্কাৰ গ্ৰেণ্ড মছজিদৰ প্ৰখ্যাত আৰু সকলোৰে আদৰৰ মুৱাজ্জিন শ্বেখ ইব্ৰাহিম বিন আদেল হামজা আল মাদানীয়ে সোমবাৰে পুৱতি নিশা ইহলীলা সম্বৰণ কৰে। ৫১ বছৰ বয়সত তেওঁৰ এই আকস্মিক বিয়োগে সমগ্ৰ ইছলামিক বিশ্বৰ লগতে মক্কা আৰু মদিনাৰ অগণন লোকক গভীৰ শোক সাগৰত পেলাইছে।
ছ'চিয়েল মিডিয়াত তেওঁৰ মৃত্যুৰ খবৰ বিয়পি পৰাৰ লগে লগে শোকৰ ছাঁ পৰিছে। দুয়োটা পৱিত্ৰ মছজিদৰ সৈতে জড়িত সকলোৱে তেওঁলৈ অশ্ৰুসিক্ত শ্ৰদ্ধাঞ্জলি জ্ঞাপন কৰিছে। 'ইনচাইড দ্য হাৰামাইন' নামৰ এটা পেজে তেওঁৰ জীৱনৰ অন্তিমটো আজানৰ এটা আৱেগিক ভিডিঅ' শ্বেয়াৰ কৰিছে। সোমবাৰে, ১১ ৰবিউল আউৱাল ১৪৪৮ হিজৰী তাৰিখে মছজিদ আল-হাৰামত তেওঁ দিয়া এইটোৱেই আছিল শেষ আজান। ভিডিঅ'টোত পৱিত্ৰ কাবা শ্বৰীফৰ দৃশ্যৰ লগতে মছজিদৰ লাউডস্পীকাৰত বাজি উঠা তেওঁৰ সেই হৃদয়স্পৰ্শী আজানৰ মাত শুনিলে মানুহৰ চকু চলচলীয়া হৈ পৰে।
সোমবাৰে আছৰৰ নামাজৰ পিছত গ্ৰেণ্ড মছজিদতে লাখ লাখ লোকৰ উপস্থিতিত তেওঁৰ জানাজাৰ নামাজ সম্পন্ন কৰা হয়। ইয়াৰ পিছতে তেওঁক মক্কাৰ ঐতিহাসিক আল-মুৱাল্লা কবৰস্থানত সমাধিস্থ কৰা হয়।
১৯৭৬ চনত মদিনা চহৰত জন্মগ্ৰহণ কৰা আল মাদানী ডাঙৰ-দীঘল হৈছিল এক সুন্দৰ ধৰ্মীয় আৰু আধ্যাত্মিক পৰিৱেশত। তেওঁৰ ককাদেউতাক আছিল এগৰাকী সন্মানীয় হাফিজ। ককাদেউতাকৰ এই আদৰ্শই তেওঁৰ জীৱনত গভীৰ প্ৰভাৱ পেলাইছিল, যাৰ ফলস্বৰূপে তেওঁ পৰৱৰ্তী সময়ত কোৰআন সম্পৰ্কীয় গভীৰ অধ্যয়নো কৰিছিল।
মাত্ৰ ১৫ বছৰ বয়সতে তেওঁ মদিনাৰ এটা চুবুৰীয়া মছজিদত প্ৰথমবাৰৰ বাবে মুৱাজ্জিন হিচাপে সেৱা আগবঢ়াবলৈ আৰম্ভ কৰিছিল। কলেজীয়া শিক্ষা চলি থকাৰ সময়ত তেওঁ নিজৰ পঢ়া-শুনাৰ সমান্তৰালকৈ আন তিনিজন চুবুৰীয়াৰ সৈতে পাল পাতি এই পৱিত্ৰ দায়িত্ব পালন কৰিছিল। পিছলৈ মদিনাৰ বাহিৰত শিক্ষকতা কৰিবলগীয়া হোৱাত তেওঁ কিছুদিনৰ বাবে আজান দিয়াৰ পৰা বিৰত আছিল। কিন্তু আজানৰ প্ৰতি থকা অপাৰ অনুৰাগে তেওঁক ঘূৰাই আনে, আৰু ১৪২৮ হিজৰীত (২০০৭-০৮ চন) তেওঁ পুনৰ মছজিদ আল-মাদ্দাহত মুৱাজ্জিনৰ দায়িত্বভাৰ গ্ৰহণ কৰে। তেওঁৰ একাগ্ৰতা আৰু সুমধুৰ কণ্ঠৰ বাবেই তেওঁ ১৪৩৯ হিজৰীত (২০১৭-১৮ চনত) মক্কাৰ গ্ৰেণ্ড মছজিদৰ মুৱাজ্জিন হিচাপে আনুষ্ঠানিকভাৱে নিযুক্তি লাভ কৰে। এয়া আছিল তেওঁৰ জীৱনৰ এক অতুলনীয় প্ৰাপ্তি।
মদিনাত শৈশৱ পাৰ কৰা বাবে আল মাদানীয়ে মদিনাৰ আজানৰ পৰম্পৰাগত শৈলীটো সুন্দৰকৈ আয়ত্ত কৰিছিল। আনহাতে, সৰুতে দেউতাকৰ সৈতে সঘনাই মক্কালৈ অহা-যোৱা কৰাৰ বাবে মক্কাৰ স্থানীয় আজানৰ শৈলীও তেওঁৰ কণ্ঠত মিলি গৈছিল।
আজান দি থকা মুহূৰ্তত শ্বেখ ইব্ৰাহিম আল মাদানী
গ্ৰেণ্ড মছজিদত সেৱা আগবঢ়োৱা ২৪ গৰাকী প্ৰধান মুৱাজ্জিনৰ ভিতৰত তেওঁ আছিল অন্যতম জনপ্ৰিয়। তেওঁলোকে প্ৰতিদিনে ছয়গৰাকীৰ এটা গোটত পাল পাতি পাঁচোৱাক্ত নামাজৰ আজান আৰু পুৱতি নিশাৰ (ফজৰৰ) প্ৰথমটো আজান দিছিল। শ্বেখ ইব্ৰাহিম বিশেষকৈ তেওঁৰ ফজৰৰ আজান আৰু তকবীৰৰ বাবে সকলোৰে মাজত পৰিচিত আছিল। ইয়াৰ উপৰিও তেওঁ তবলিগৰ দায়িত্বও পালন কৰিছিল, অৰ্থাৎ নামাজৰ সময়ত ইমামৰ তকবীৰ আৰু উঠা-বহাৰ মাতটো মছজিদৰ লাউডস্পীকাৰৰ জৰিয়তে পিছফালৰ অগণন নামাজীসকলৰ সুবিধাৰ বাবে ডাঙৰকৈ দোহাৰিছিল।
'আশ্বৰাকাত' নামৰ এটা পডকাষ্টৰ এক পুৰণি সাক্ষাৎকাৰত আল মাদানীয়ে গ্ৰেণ্ড মছজিদত দিয়া তেওঁৰ প্ৰথমটো আজানৰ এক আৱেগিক মুহূৰ্তৰ কথা বৰ্ণনা কৰিছিল। তেওঁ কৈছিল যে, জীৱনত প্ৰথমবাৰৰ বাবে যেতিয়া তেওঁ গ্ৰেণ্ড মছজিদৰ মাইকত আজান দিছিল আৰু নিজৰ কণ্ঠস্বৰ শুনি মানুহে পৱিত্ৰ কাবা শ্বৰীফৰ চাৰিওফালে তাৱাফ কৰি থকা দেখিছিল, তেতিয়া তেওঁ আৱেগিক হৈ কান্দি পেলাইছিল।
সেই পৱিত্ৰ মুহূৰ্তটো সুঁৱৰি তেওঁ কৈছিল, "ইমান এখন পৱিত্ৰ স্থানত মোৰ কণ্ঠস্বৰ অনুৰণিত হ'বলৈ মইনো কোন? এয়া কেৱল আল্লাহৰেই অসীম অনুগ্ৰহ।" সেই সাক্ষাৎকাৰতে তেওঁ মক্কা আৰু মদিনাত আজান দিয়াৰ ধৰণৰ মাজত থকা পাৰ্থক্যসমূহো সাধাৰণ মানুহে বুজিব পৰাকৈ সুন্দৰকৈ বুজাই দিছিল।
আজি তেওঁ আমাৰ মাজত নাই যদিও, মছজিদ আল-হাৰামৰ বতাহত তেওঁৰ সেই সুমধুৰ কণ্ঠৰ অনুৰণন চিৰদিনৰ বাবে ৰৈ যাব।
