'এজন ব্ৰাহ্মণৰ দৃষ্টিত কোৰান' গ্ৰন্থ খনত মুকুট শৰ্মাই লিখিছে 'A perfect muslim can not go to the court to solve his problems and he can solve all his problems with in the boundary of The Holy Quran and Hadith' "আমি কোৰানখন ভালদৰে নপঢ়ো, নুবুজু বা পঢ়িব চেষ্টা নকৰোঁ। যদি আমি ভালদৰে কোৰান পঢ়োঁ তেন্তে আমাৰ সকলো সমস্যাৰ সমাধান কোৰান শ্বৰীফত আছে। বহুতে কোৰানত বেয়া কথা থকা বুলি কয়, কিন্তু তাৰ পৰিৱৰ্তে কোৰানত যে অজস্ৰ ভাল কথা আছে, সেই কথাবোৰ মই মোৰ গ্ৰন্থখনত লিপিবদ্ধ কৰি উলিয়াইছো", শৰ্মাই কয়।
মুকুট শৰ্মাই লিখা গ্ৰন্থ
পবিত্ৰ কোৰান শ্বৰীফত প্ৰায় ১৫০০ বছৰ আগতে বিভিন্ন আচৰিত কথা লিপিবদ্ধ কৰা হৈছে। বিজ্ঞান, দৰ্শন, চিকিৎসা শাস্ত্ৰ, ফিংগাৰ প্ৰিন্ট, সম্পত্তিৰ অধিকাৰ আদি সকলো বিষয় কোৰানত আছে। কোৰান শ্বৰীফখন চাৰিওফালৰ পৰা এখন চমৎকাৰী গ্ৰন্থ বুলি মুকুট শৰ্মাই কয়। কোৰান ভালদৰে আয়ত্ত কৰিলে কোনোধৰণৰ সংঘাত, সমাজৰ বিভাজন আদি হ'ব নোৱাৰে। কোৰান শ্বৰীফ আয়ত্ত কৰি ইয়াৰ সাৰমৰ্ম নিজৰ কিতাপত উল্লেখ কৰা বুলি মুকুট শৰ্মাই উল্লেখ কৰে।
সকলো ধৰ্মগ্ৰন্থৰ মূল একেটাই। ধৰ্মৰ উদ্দেশ্য হৈছে সমাজখনক শৃংখলাবদ্ধ কৰি ৰখা। বিভিন্ন সময়ত সৃষ্টি হোৱা বিশৃংখলতাক নাশ কৰি সমাজত সাম্যবাদ বা শান্তি প্ৰতিষ্ঠা কৰিবৰ কাৰণেই ধৰ্মৰ সৃষ্টি হৈছিল। সকলো ধৰ্মগ্ৰন্থত শান্তি, সম্প্ৰীতি আৰু ভাতৃত্ববোধেৰে সমাজখনক আগবঢ়াই নিয়াৰ কথাই উল্লেখ আছে বুলি শৰ্মাই কয়।
মুকুট শৰ্মাই কয়; "সকলোৱে নিজৰ নিজৰ ধৰ্ম পালনৰ ক্ষেত্ৰত যদি কট্টৰপন্থী বা কঠোৰ হয়, তেতিয়া সমাজত বিশৃংখলতাৰ সৃষ্টি নহয়। আমি সকলো ভালদৰে নপঢ়ো বাবেই সমাজত বিশৃংখলতাৰ সৃষ্টি হয়। জেহাদ শব্দটোক লৈও আমাৰ সমাজত যথেষ্ট ভুল বাখ্যা আছে। জেহাদ মানে 'ফি চাবিলিল্লাহ' (আল্লাহৰ পথত ত্যাগ কৰা)। জেহাদৰ অৰ্থ হৈছে বেয়াক বাদ দি ভাল আৰু ইতিবাচক চিন্তা-ধাৰাক আঁকোৱালি লোৱাৰ এক সংকল্প।"
অসম সাহিত্য সভাৰ পৰা বঁটা গ্ৰহণৰ মুহূৰ্তত
উল্লেখ্য যে, লেখক মুকুট শৰ্মাই শেহতীয়াকৈ বাঘ হাজৰিকাক লৈও এখন তত্ত্বগধুৰ গ্ৰন্থ লিখি উলিয়াইছে। তেওঁ কয় যে লাচিত বৰফুকনৰ যুদ্ধক্ষেত্ৰৰ সহযোগী বাঘ হাজৰিকাক লৈ বিভিন্নজনৰ বিভিন্ন ম'ত আছে। কিন্তু মই গৱেষণা কৰি পোৱা মতে বাঘ হাজৰিকা আছিল আৰু তেওঁৰ বংশৰ লোক এতিয়াও আছে। বাঘ হাজৰিকাৰ বংশৰ বংশনামা, পুৰুষনামা আদি সকলো আছে।
অসম সাহিত্য সভাৰ বুদুৰাম পাংগিং বঁটা বিজয়ী মুকুট শৰ্মাৰ ম'তে, সকলো কথাটো বুৰঞ্জীত লিপিবদ্ধ হৈ নাথাকে, কিছু কথা বুৰঞ্জীত লিপিবদ্ধ কৰিব ৰৈ যায়। এতিয়া পথৰুঘাটৰ ৰণৰ কথাওটো বুৰঞ্জীত লিপিবদ্ধ হোৱা নাই। সেইবুলি পথৰুঘাটৰ গৌৰৱময় ইতিহাসক আমি কেতিয়াও নুই কৰিব নোৱাৰো।
যুৱ প্ৰজন্মৰ প্ৰতি আহ্বান জনাই মুকুট শৰ্মাই কয়, আমি প্ৰথমতে অসমীয়া। জাতি, মাটি, ভেটি, কৃষ্টি সংস্কৃতিক আমি ভালদৰে জানিব লাগিব। আমাৰ অস্তিত্ব ৰক্ষাৰ কাৰণে আমি কাম কৰিব লাগিব। আমি সদায় ঐক্যবদ্ধতাৰে কাম কৰিব লাগিব। আমি যদি নিজৰ মাজতে বিভাজনৰ সৃষ্টি কৰো, তেন্তে আমি সদায় পিছুৱাই থাকিব লাগিব। আমি আগবাঢ়িব নোৱাৰিম। আমি এজন প্ৰকৃত অসমীয়া হৈ সমাজ, জাতি, দেশৰ স্বাৰ্থত কাম কৰিলে আগবাঢ়ি যাব পাৰিম।