দীপ আহমেদে কয়, "চিকিৎসক বা অভিযন্তাৰ দৰে কলাও সমানে গুৰুত্বপূৰ্ণ। ইণ্টেৰিঅ'ৰ ডিজাইনিং, ইভেণ্ট মেনেজমেণ্ট আদি সকলোতে কলা লুকুৱাই থাকে। তেনেক্ষেত্ৰত ভাস্কৰ্য শিল্প এনে এক শিল্পকলা য'ত যুৱ প্ৰজন্মৰ বাবে অসীম সুযোগ অন্তৰ্নিহিত হৈ আছে। কিয়নো এই শিল্প কেৱল পূজামণ্ডপতে সীমিত হৈ নাথাকি, ই এক পেছাদাৰী বৃত্তিত পৰিণত হৈছে। কিন্তু অন্য ৰাজ্যৰ লগত তুলনা কৰিলে আমি দেখিব যে, তেওঁলোকৰ তুলনাত আমাৰ কিছু পৰিমানে সামগ্ৰী অভাৱ বা বাজেট সীমিত থাকে। কিন্তু আমি কম বাজেটতে ভাল কাম কৰিবলৈ চেষ্টা কৰিব লাগিব আৰু নতুন নতুন প্ৰযুক্তি ব্যৱহাৰ কৰি নতুনত্ব আনিব লাগিব। এই ক্ষেত্ৰত সকলোৰে সহযোগিতাৰ প্ৰয়োজন, কাৰণ আমি যিকোনো কাম কৰিম কৰিম বুলি ভাবিলে নহ'ব, কৰিবলৈ নব প্ৰজন্ম উলাই আহিব লাগিব। যদি কোনোৱে আমৰ পৰা এই শিল্পকলা শিকিব বিচাৰে, তেন্তে মই আৰু মোৰ দেউতাই অধীৰ আগ্ৰহেৰে তেওঁলোকক আদৰি ল'ম আৰু শিকাই যাম। যাতে এই ক্ষেত্ৰখন আগুৱাই গৈ থাকে।"
শিল্প, সৃষ্টিশীলতা আৰু ঐতিহ্য এই তিনিটা শব্দেৰে মিশ্ৰিত প্ৰতিফলন ঘটিছে গুৱাহাটী মহানগৰীৰ বিষ্ণুপুৰ বিমলানগৰ সাৰ্বজনীন দুৰ্গাপূজাৰ এইবাৰৰ মণ্ডপত। ঐতিহাসিক বেবিল'ন হেংগিং গাৰ্ডেনক বিষয়বস্তু হিচাপে লৈ গঢ়ি তোলা এই মণ্ডপত শিল্পীৰ কল্পনা আৰু কলাৰ সঠিক মিশ্ৰণ ঘটা দেখা পোৱা গৈছে।
বিষ্ণুপুৰ বিমলানগৰ সাৰ্বজনীন দুৰ্গাপূজাৰ সমিতিৰ সাংস্কৃতিক সম্পাদক বিকি ৰয়ে কয়, "আমাৰ পূজা ষষ্ঠীৰ দিনা উদ্বোধন কৰা হৈছে। প্ৰতিবছৰে আমাৰ পূজালৈ হাজাৰ হাজাৰ ভক্ত তথা দৰ্শনাৰ্থীৰ সমাগম ঘটে। প্ৰতিবাৰে আমি দৰ্শকৰ বাবে কিবা এটা বিশেষ কৰাৰ চেষ্টা কৰি আহিছো। এইবাৰো আমি প্ৰায় ৩৫ লাখ বাজেটেৰে আমাৰ পূজাখন অন্য পূজাৰ তুলনাত ব্যতিক্ৰম কৰাৰ প্ৰয়াস কৰিছিলো। কিন্তু পূৰ্বৰ তুলনাত এইবাৰৰ পুজাৰ পৰিবেশ সেমেকা। কিয়নো অলপতে আমি আমাৰ হিয়াৰ আমঠু মৰমৰ শিল্পী জুবিন দাক হেৰুৱাইছো। সেয়েহে এইবাৰ আমি আমাৰ সকলো সাংস্কৃতিক অনুষ্ঠান বতিল কৰিছো। আমি আমাৰ মহান শিল্পীগৰাকীক শ্ৰদ্ধাঞ্জলি জ্ঞাপন কৰাৰ উদ্দেশ্যে পূজাৰ মণ্ডপৰ ভিতৰতে তেওঁৰ প্ৰতিচ্ছবি ৰখাৰ ব্যৱস্থা কৰিছো আৰু তেওঁৰ গীত বজোৱাৰ ব্যৱস্থা কৰিছো।"
