শম্পী চক্ৰৱৰ্তী পুৰকায়স্থ
পশ্চিমবংগৰ আউছগ্ৰামৰ এখন সৰু গাঁৱৰ এটি সাধাৰণ ঘৰৰ পৰা আৰম্ভ হৈছিল কালিতা মাঝিৰ জীৱনৰ কঠিন সংগ্ৰাম। আনৰ ঘৰত বাচন ধোৱা, মজিয়া মচা আৰু ৰন্ধা-বঢ়া কৰি পৰিয়াল চলোৱা সেই মহিলাগৰাকীয়ে আজি বিধানসভাৰ মজিয়াত জনতাৰ কণ্ঠ হৈ উঠিছে। দৰিদ্ৰতা আৰু সামাজিক বাধাক অতিক্ৰম কৰি গৃহকৰ্মীৰ পৰা বিধায়কলৈ তেওঁৰ এই যাত্ৰাই এতিয়া হাজাৰ হাজাৰ মহিলাৰ বাবে নতুন আশাৰ প্ৰতীক হৈ পৰিছে।
২০২৬ চনৰ বিধান সভা নিৰ্বাচনৰ ফলাফল ঘোষণা হোৱাৰ পিছৰে পৰা ৰাজনৈতিক মহলৰ পৰা সাধাৰণ ৰাইজৰ মাজতো কালিতা মাঝিৰ বিষয়ে আলোচনা আৰম্ভ হৈছে। কাৰণ, তেওঁৰ উত্থানৰ কাহিনী কোনো গতানুগতিক ৰাজনৈতিক পৰিয়ালৰ নহয়; বৰঞ্চ সমাজৰ অতি প্ৰান্তীয় স্তৰৰ পৰা উঠি অহা এগৰাকী সংগ্ৰামী নাৰীৰ কাহিনী।
কালিতাৰ জন্ম হৈছিল পূৱ বুৰ্ডৱান জিলাৰ আউছগ্ৰামৰ এটি অতি সাধাৰণ পৰিয়ালত। সৰুৰে পৰা দৰিদ্ৰতা পৰিয়ালটোৰ অহৰহ সংগী আছিল, সেয়েহে তেওঁ বেচি পঢ়া-শুনা কৰাৰ সুযোগ নাপালে। সৰুৰে পৰাই তেওঁ মানুহৰ ঘৰত কাম আৰম্ভ কৰি পৰিয়ালটো চম্ভালিব লগা হৈছিল। এঘৰত যদি ৰাতিপুৱা কাম কৰে, তেন্তে আন এটি ঘৰত দুপৰীয়া। তেনেকৈয়ে পৰিয়ালটোৱে দিনক দিনে কঠোৰ পৰিশ্ৰম কৰি আহিবলগীয়া হৈছিল।
স্থানীয় ৰাইজৰ মতে কালিতা মাঝি কেৱল এগৰাকী গৃহকৰ্মী নাছিল; বিপদৰ সময়ত মানুহৰ কাষত থিয় দিয়াটো তেওঁৰ স্বভাৱ আছিল। গাঁৱৰ কোনো লোকৰ অসুস্থতাই হওক, কাৰোবাৰ ৰেচনৰ সমস্যাই হওক বা কোনো মহিলাৰ ওপৰত হোৱা অত্যাচাৰৰ ঘটনাই হওক, সকলো ক্ষেত্ৰতে তেওঁক আগবাঢ়ি অহা দেখা গৈছিল। এনেদৰেই তেওঁ ক্ৰমান্বয়ে ৰাজনৈতিক আৰু সামাজিক কাম-কাজৰ সৈতে জড়িত হৈ পৰিছিল।
ৰাজনীতিৰ ক্ষেত্ৰখনত কালিতা মাঝিৰ পথ একেবাৰে সহজ নাছিল। বহুতে এই প্ৰশ্ন উত্থাপন কৰিছিল যে, "আকৌ ৰাজনীতিত সোমাব নেকি গৃহকৰ্মীয়ে?" কিন্তু সেই সকলোবোৰ কটুক্তি আওকাণ কৰি কালিতাই নিজৰ কাম অব্যাহত ৰাখিছিল। দিনত ঘৰৰ কাম, আৰু বাকী সময় মানুহৰ সমস্যাৰ বাবে অভিযান, এইদৰেই তেওঁ লাহে লাহে ৰাইজৰ আস্থা লাভ কৰিবলৈ সক্ষম হৈছিল।
কালিতা মাঝি
২০২৬ চনৰ বিধানসভা নিৰ্বাচনত আউছগ্ৰাম সমষ্টিৰ পৰা কালিতা মাঝিক প্ৰক্ষেপ কৰা হৈছিল। যদিও ৰাজনৈতিক বিশ্লেষকৰ এটা অংশই প্ৰথমতে বিষয়টোক গুৰুত্ব দিয়া নাছিল, তথাপিও তেওঁ প্ৰচাৰৰ বাবে যোৱাৰ সময়ত সম্পূৰ্ণ বেলেগ ছবি এখনহে প্ৰতিফলিত হৈছিল। সাধাৰণ মানুহৰ লগত তেওঁৰ দীৰ্ঘদিনীয়া সম্পৰ্কই তেওঁৰ আটাইতকৈ ডাঙৰ শক্তি হৈ পৰিছিল। ঘৰে ঘৰে প্ৰচাৰ চলাওঁতে কালিতাই কোনো ডাঙৰ প্ৰতিশ্ৰুতি দিয়া নাছিল; বৰঞ্চ তেওঁ নিজৰ জীৱন, সংগ্ৰাম আৰু অঞ্চলটোৰ মানুহৰ কাষত থিয় দিয়াৰ প্ৰতিশ্ৰুতিৰ কথাহে কৈছিল।
নিৰ্বাচনৰ ফলাফল ঘোষণাৰ দিনা দেখা গ’ল কালিতা মাঝিয়ে সকলো জল্পনা-কল্পনা পিছ পেলাই জয়ী হৈছে। ফলাফল ঘোষণা হোৱাৰ পিছতে অঞ্চলটোৰ লোকে তেওঁৰ ঘৰৰ সন্মুখত সমবেত হৈছিল। বহুতে কৈছিল যে, এই জয় কেৱল এজন প্ৰাৰ্থীৰ বাবে নহয় বৰঞ্চ ই সমাজৰ পিছপৰা শ্ৰেণীৰ অগণন মহিলাৰ জয় আছিল।
কিন্তু বিজয়ৰ পাছতো কালিতাৰ জীৱনশৈলীৰ কোনো পৰিৱৰ্তন হোৱা নাছিল। সংবাদ মাধ্যমত প্ৰকাশিত বাতৰি অনুসৰি বিধায়িকা হোৱাৰ পিছদিনা ঘৰতে ৰন্ধা-বঢ়া কৰি কাপোৰ ধুই, স্বাভাৱিক জীৱন যাপন কৰি আছিল। এই সৰলতাই অধিক সংখ্যক লোকৰ হৃদয় জয় কৰিছে।
কালিতা মাঝি
কালিতা মাঝিৰ এই উত্থান কেৱল ৰাজনৈতিক ঘটনা নহয়; ই সামাজিক বাস্তৱতাৰ এক গুৰুত্বপূৰ্ণ প্ৰতিফলনও। বংগৰ গ্ৰাম্য অঞ্চলৰ বহু মহিলাই এতিয়াও দৰিদ্ৰতা, অৱহেলা, সামাজিক বাধাৰ বিৰুদ্ধে যুঁজি আছে। তেওঁলোকৰ বাবে কালিতা এতিয়া এক নতুন প্ৰতীক, সংগ্ৰামৰ মাজতো সপোন স্তব্ধ হৈ নৰয় বুলি কোৱা প্ৰতীক।
ৰাজনৈতিক মহলৰ বহুতেই বিশ্বাস কৰে যে, কালিতা মাঝিৰ এই বিজয়ে আগন্তুক দিনত বঙালী ৰাজনীতিৰ এক নতুন বাৰ্তা দিব। কাৰণ তেওঁৰ সফলতাই প্ৰমাণ কৰিছে যে, কেৱল জনপ্ৰিয় নাম বা ধনেই নহয়, মানুহৰ লগত সম্পৰ্ক আৰু দীৰ্ঘম্যাদী সামাজিক কামেও এজন ব্যক্তিক নেতৃত্বৰ পদবীলৈ লৈ যাব পাৰে।
আউছগ্ৰামৰ সাধাৰণ ৰাইজে এতিয়া তেওঁলোকৰ “কালিতা দি”ক এগৰাকী বিধায়ক হিচাপে দেখিছে। কিন্তু তেওঁলোকৰ বাবে এতিয়াও তেওঁ সেই চিনাকি মানুহজন যিয়ে আগতে দুৱাৰত টোকৰ মাৰি সোধা-পোছা কৰিছিল, “কি সমস্যা হৈছে?” আৰু হয়তো তাতেই নিহিত হৈ আছে তেওঁৰ সফলতাৰ প্ৰকৃত ৰহস্য।
.webp "কেমেৰাৰ লেন্সত মক্কাৰ খানা-এ-ক্বাবাঃ মহম্দ ছাদিক বে'ৰ ঐতিহাসিক যাত্ৰা")
