প্ৰধানমন্ত্ৰী নৰেন্দ্ৰ মোদীৰ জাকাৰ্টা ভ্ৰমণঃ ভাৰত-ইণ্ডোনেছিয়াৰ সম্পৰ্কত এক সোণালী অধ্যায়ৰ সূচনা
আৱাজ দ্য ভইচ ব্যুৰ’ অসম
ভাৰত মহাসাগৰক প্ৰায়ে মহাদেশসমূহক পৃথক কৰা এক বিশাল জলৰাশি বুলি ভবা হয়, কিন্তু শেহতীয়াকৈ ই দুখন ঐতিহাসিক বৃহৎ ৰাষ্ট্ৰক একত্ৰিত কৰা এক গুৰুত্বপূৰ্ণ সেতু হিচাপে পুনৰ প্ৰমাণিত হৈছে। ৬-৮ জুলাইত প্ৰধানমন্ত্ৰী নৰেন্দ্ৰ মোদীৰ জাকাৰ্টা ভ্ৰমণে দুয়োখন দেশৰ দ্বিপাক্ষিক সম্পৰ্কৰ ক্ষেত্ৰত এক যুগান্তকাৰী ক্ষণৰ সূচনা কৰিলে। এই ভ্ৰমণে ২০১৮ চনৰ ‘ব্যাপক কৌশলগত অংশীদাৰিত্ব’ক এক অভূতপূৰ্ব উচ্চতালৈ লৈ গৈছে। শক্তিশালী প্ৰতিৰক্ষা চুক্তি, গুৰুত্বপূৰ্ণ অৰ্থনৈতিক বিনিয়োগ আৰু গভীৰ সাংস্কৃতিক একত্ৰীকৰণৰ এক গতিশীল মিশ্ৰণৰ জৰিয়তে ভাৰত আৰু ইণ্ডোনেছিয়াই এখন মুক্ত আৰু সমৃদ্ধিশালী ইণ্ডো-পেচিফিক গঢ়ি তোলাৰ বাবে নিজৰ অংশীদাৰী ভৱিষ্যতক দৃঢ়তাৰে একত্ৰিত কৰিছে।
ইণ্ডোনেছিয়াৰ ৰাষ্ট্ৰপতি প্ৰব’ৱো ছুবিয়াণ্টোৰ সৈতে প্ৰধানমন্ত্ৰী নৰেন্দ্ৰ মোদী
ইণ্ডোনেছিয়াৰ ৰাষ্ট্ৰপতি প্ৰব’ৱো ছুবিয়াণ্টোৰ সৈতে হোৱা দ্বিপাক্ষিক আলোচনাৰ মূল কেন্দ্ৰবিন্দু আছিল আঞ্চলিক নিৰাপত্তাৰ প্ৰতি এক দৃঢ় অংগীকাৰ। দুয়োখন দেশে তেওঁলোকৰ প্ৰতিৰক্ষা সম্পৰ্ক যথেষ্ট বৃদ্ধি কৰিবলৈ সন্মত হৈছে, য’ত কেইবাটাও গুৰুত্বপূৰ্ণ দিশ অন্তৰ্ভুক্ত আছে:
উন্নত মিছাইল ৰপ্তানিঃ ভাৰতে ইণ্ডোনেছিয়াক নিজৰ শক্তিশালী ব্ৰহ্মোছ আৰু অস্ত্ৰ এয়াৰ-টু-এয়াৰ মিছাইল যোগান ধৰিব। বিশেষকৈ 'অপাৰেচন সেন্দূৰ'ৰ সময়ত অস্ত্ৰ মিছাইলৰ শেহতীয়া সফলতাৰ পিছতেই এই চুক্তিখন স্বাক্ষৰিত হৈছে।
বন্দৰ উন্নয়নঃ এক বৃহৎ ভূ-ৰাজনৈতিক পদক্ষেপ হিচাপে দুয়োখন দেশে কৌশলগতভাৱে গুৰুত্বপূৰ্ণ ছাবাং বন্দৰ যুটীয়াভাৱে নিৰ্মাণ কৰিব। মালাক্কা প্ৰণালীৰ সমীপত অৱস্থিত এই বন্দৰটো ভাৰতৰ গ্ৰেট নিকোবৰ বন্দৰ প্ৰকল্পৰ পৰা মাত্ৰ ১০০ মাইল দূৰত অৱস্থিত।
ইণ্ডোনেছিয়াৰ সংসদত প্ৰধানমন্ত্ৰী নৰেন্দ্ৰ মোদী
সন্ত্রাসবাদৰ বিৰুদ্ধে ঐক্যবদ্ধ স্থিতিঃ উগ্ৰবাদৰ বিৰুদ্ধে এক উমৈহতীয়া দৃষ্টিভংগী দৃঢ় কৰি, প্ৰধানমন্ত্ৰী মোদীয়ে পহেলগাম সন্ত্ৰাসবাদী আক্ৰমণৰ সময়ত ইণ্ডোনেছিয়াই আগবঢ়োৱা দৃঢ় সমৰ্থনৰ বাবে ধন্যবাদ জ্ঞাপন কৰে। লগতে, চোৰাংচোৱা তথ্য আদান-প্ৰদান আৰু কট্টৰবাদ নিৰ্মূলৰ বাবে তেওঁলোকৰ ‘যুটীয়া কৰ্মগোট’ৰ জৰিয়তে ক্ৰমাগত সহযোগিতাৰ ওপৰত গুৰুত্ব আৰোপ কৰে।
আনহাতে, গোলকীয় যোগান শৃংখলাৰ ব্যাঘাতৰ পৰা নিজৰ অৰ্থনীতিক সুৰক্ষিত কৰিবলৈ ভাৰত আৰু ইণ্ডোনেছিয়াই প্ৰায় একুৰি চুক্তিত স্বাক্ষৰ কৰে। এইসমূহৰ ভিতৰত অন্যতম খনিজ পদাৰ্থ, ডিজিটেল অৰ্থনীতি, স্বাস্থ্যসেৱা সহযোগিতা চুক্তি।
গুৰুত্বপূৰ্ণ খনিজ পদাৰ্থঃ ভৱিষ্যতৰ যোগান শৃংখলা সুৰক্ষিত কৰিবলৈ ভাৰতে ইণ্ডোনেছিয়াৰ তীখা, নিকেল আৰু ৰেয়াৰ আৰ্থ পাৰ্মানেণ্ট মেগনেটৰ উৎপাদন খণ্ডত বৃহৎ পৰিমাণৰ বিনিয়োগ কৰিব।
ডিজিটেল অৰ্থনীতিঃ বিত্তীয় সংযোগৰ ক্ষেত্ৰত এক নতুন দিশ মুকলি কৰি, ভাৰতৰ ইউনিফাইড পেমেণ্টছ ইণ্টাৰফেচ ইণ্ডোনেছিয়াৰ পেমেণ্ট ব্যৱস্থাৰ সৈতে সংযুক্ত কৰা হ’ব। তদুপৰি, ভাৰতৰ ONDC-ৰ আৰ্হিত ইণ্ডোনেছিয়া অ'পেন নেটৱৰ্ক (ION)ৰ শুভাৰম্ভণিয়ে ডিজিটেল বাণিজ্যৰ ক্ষেত্ৰত এক বৈপ্লৱিক পৰিৱৰ্তন আনিব বুলি আশা কৰা হৈছে।
স্বাস্থ্যসেৱা সহযোগিতাঃ চিকিৎসা সামগ্ৰীৰ নিয়ন্ত্ৰণ আৰু ইণ্ডোনেছিয়াৰ নাগৰিকসকলক উন্নত মানদণ্ডৰ অথচ সুলভ মূল্যৰ ভাৰতীয় ঔষধ লাভ কৰাৰ সুবিধা প্ৰদানৰ বাবে গুৰুত্বপূৰ্ণ চুক্তিত স্বাক্ষৰ কৰা হৈছে। 'স্বাস্থ্য কৰ্মী সহযোগিতাৰ ৰূপায়ণ চুক্তি'য়ে ইণ্ডোনেছিয়াৰ চিকিৎসা পেছাদাৰীসকলৰ দক্ষতা বৃদ্ধিত সহায় কৰিব।
প্ৰকৃত অংশীদাৰিত্ব যে মানুহৰ মাজৰ পাৰস্পৰিক সম্পৰ্কৰ ওপৰত নিৰ্ভৰশীল, সেই কথা স্বীকাৰ কৰি এই সন্মিলনত শিক্ষা আৰু সাংস্কৃতিক কূটনীতিৰ ক্ষেত্ৰতো ঐতিহাসিক মাইলৰ খুঁটি স্থাপন কৰা হয়। শৈক্ষিক ব্যৱধান দূৰ কৰাৰ লক্ষ্যৰে ভাৰতৰ মৰ্য্যাদাপূৰ্ণ ইণ্ডিয়ান ইনষ্টিটিউট অফ মেনেজমেণ্ট (IIM) বাংগালুৰুৱে পূব জাভাৰ সিংহাছাৰী বিশেষ অৰ্থনৈতিক মণ্ডলত নিজৰ এটা বহিঃৰাষ্ট্ৰীয় কেম্পাছ স্থাপন কৰিব। ইণ্ডোনেছিয়াৰ সংসদত ভাষণ দি প্ৰধানমন্ত্ৰী মোদীয়ে ৰামায়ণ আৰু মহাভাৰতৰ মহাকাব্যৰ পৰা আৰম্ভ কৰি বৰোবুদুৰ আৰু প্ৰাম্বানানৰ দৰে বৃহৎ মন্দিৰলৈকে- দুয়োখন দেশক বান্ধি ৰখা গভীৰ সাংস্কৃতিক সম্পৰ্কক উদযাপন কৰে। আনহাতে, ৰবীন্দ্ৰনাথ ঠাকুৰৰ ইণ্ডোনেছিয়া ভ্ৰমণৰ শতবাৰ্ষিকী উপলক্ষে দুয়োখন দেশে ২০২৭ চনটোক যুটীয়াভাৱে "সাংস্কৃতিক আৰু শৈক্ষিক কূটনীতিৰ ঠাকুৰ- দেৱান্তৰা বৰ্ষ" হিচাপে উদযাপন কৰিব।
দুয়োগৰাকী নেতাই বিশ্বৰ চলিত সমস্যাসমূহৰ ওপৰতো মুকলিকৈ আলোচনা কৰে। প্ৰধানমন্ত্ৰী মোদীয়ে ৰাষ্ট্ৰসংঘৰ নিৰাপত্তা পৰিষদৰ জৰুৰী সংস্কাৰৰ পোষকতা কৰে আৰু দৃঢ়তাৰে কয় যে উদীয়মান শক্তিসমূহে ইয়াত সমান অংশগ্ৰহণৰ দাবী ৰাখে। পশ্চিম এছিয়াৰ সংকটৰ সন্দৰ্ভত ভাৰতে ‘টু-ষ্টেট ছলিউচন’ অৰ্থাৎ দ্বি-ৰাষ্ট্ৰ নীতি আৰু পেলেষ্টাইনত দীৰ্ঘম্যাদী শান্তিৰ প্ৰতি নিজৰ সমৰ্থন পুনৰবাৰ দোঁহাৰে।
প্ৰধানমন্ত্ৰী মোদীৰ সবল নেতৃত্বৰ এক শক্তিশালী নিদৰ্শনস্বৰূপে, তেওঁক 'বিণ্টাং অদিপূৰ্ণা অৱ দ্য ৰিপাব্লিক অৱ ইণ্ডোনেছিয়া' বঁটাৰে সন্মানিত কৰা হয়। ৰাষ্ট্ৰপতি প্ৰব’ৱোৱে প্ৰদান কৰা এই পদকটো হৈছে ইণ্ডোনেছিয়াৰ সৰ্বোচ্চ অসামৰিক সন্মান, যিটো দেশখনৰ একতা আৰু সমৃদ্ধিৰ প্ৰতি আগবঢ়োৱা অসাধাৰণ সেৱাৰ স্বীকৃতিস্বৰূপ। প্ৰধানমন্ত্ৰী মোদীয়ে এই বঁটা ভাৰতৰ জনসাধাৰণ আৰু দুয়োখন দেশৰ চিৰস্থায়ী বন্ধুত্বৰ নামত উছৰ্গা কৰে।
যিহেতু দুয়োখন দেশে পৰৱৰ্তী ২৫ বছৰৰ দিশে আগবাঢ়িছে, এই কূটনৈতিক বিজয় পৰম্পৰাগত ভূ-ৰাজনীতিৰ উৰ্ধত এক নতুন অধ্যায়। এয়া হৈছে দুয়োখন দেশৰ উমৈহতীয়া গণতান্ত্ৰিক মূল্যবোধ আৰু পাৰস্পৰিক বিকাশৰ এক নতুন প্ৰতিশ্ৰুতি। 'সবকা সাথ, সবকা বিকাশ' মন্ত্ৰৰে আগবঢ়া এই নৱীকৰণ কৰা মিত্ৰতাই এয়া নিশ্চিত কৰিছে যে দুয়োখন দেশক পৃথক কৰি ৰখা ১৫০ কিলোমিটাৰ সাগৰীয় ব্যৱধান কেতিয়াও এক প্ৰাচীৰ হ’ব নোৱাৰে, বৰং ই এক 'সোণালী সেতু' হিচাপে কাম কৰিব। ভাৰত আৰু ইণ্ডোনেছিয়া আজি একত্ৰিত হৈ থিয় দি সমগ্ৰ বিশ্বক প্ৰমাণ কৰি দিছে যে গণতন্ত্ৰই সঁচাকৈয়ে বিশ্বাস গঢ়িব পাৰে, নতুন সুযোগৰ সৃষ্টি কৰিব পাৰে আৰু শান্তিপূৰ্ণভাৱে মানৱতাৰ ভৱিষ্যতক এক সুন্দৰ ৰূপ দিব পাৰে।
