আছা খোছা
প্ৰায় এটা দশক পূৰ্বে, ভৰা গাল আৰু উজ্জ্বল হাঁহিৰে এগৰাকী ১৬ বছৰীয়া কাশ্মীৰী ছোৱালী সমগ্ৰ দেশৰ মৰমৰ পাত্ৰী হৈ পৰিছিল। সেই ছোৱালীজনী আছিল জাইৰা ৱাছিম। আমিৰ খানৰ দংগল ছবিত গীতা ফোগাটৰ চৰিত্ৰত অভিনয় কৰি জাইৰাই ব্যাপক প্ৰশংসা লাভ কৰিছিল। ছবিখনে ভাৰতৰ লগতে বিদেশতো বিপুল সফলতা লাভ কৰিছিল আৰু জাইৰাই শ্ৰেষ্ঠ সহ-অভিনেত্ৰীৰ ৰাষ্ট্ৰীয় চলচ্চিত্ৰ বঁটাও লাভ কৰিছিল।
ইয়াৰ এবছৰ পিছত, ২০১৭ চনত তেওঁ 'Secret Superstar' ছবিত ইনছিয়া মালিকৰ চৰিত্ৰত অভিনয় কৰিছিল। ছবিখনত তেওঁ এগৰাকী মুছলমান কিশোৰীৰ চৰিত্ৰত অভিনয় কৰিছিল, যিগৰাকীৰ গায়িকা হোৱাৰ সপোন আছিল। কিন্তু তেওঁৰ হিংস্ৰ স্বভাৱৰ পিতৃয়ে সেই সপোনৰ বিৰোধিতা কৰিছিল। আমিৰ খানৰ প্ৰযোজনাত নিৰ্মিত ছবিখনে সমালোচকৰ প্ৰশংসা লাভ কৰাৰ লগতে বিশেষকৈ চীনত ব্যাপক সফলতা লাভ কৰিছিল।
জাইৰা ৱাছিমে ৰাষ্ট্ৰপতি ৰামনাথ কোবিন্দৰ পৰা ৰাষ্ট্ৰীয় বঁটা গ্ৰহণ কৰাৰ এক মুহুৰ্ত
পৃথিৱীৰ বাবে জাইৰাই যেন নিজৰ সপোনৰ জীৱন লাভ কৰিছিল। কিন্তু কেৰিয়াৰৰ শীৰ্ষত থকা মাত্ৰ ১৮ বছৰ বয়সতে তেওঁ অভিনয় জগতৰ পৰা আঁতৰি যোৱাৰ সিদ্ধান্ত ঘোষণা কৰে। তেওঁৰ মতে, অভিনয়ৰ কেৰিয়াৰ তেওঁৰ ধৰ্মীয় বিশ্বাসৰ সৈতে সংঘাতপূৰ্ণ হৈ পৰিছিল। তেওঁ কৈছিল যে, তেওঁৰ কেৰিয়াৰে ইছলামৰ সৈতে থকা সম্পৰ্কত প্ৰভাৱ পেলাইছিল।
তেওঁৰ এই সিদ্ধান্তই বহু লোকক আচৰিত কৰি তুলিছিল। কোনোবাই খ্যাতিৰ শীৰ্ষত ধৰ্মীয় বিশ্বাসক স্থান দিয়াৰ বাবে তেওঁক প্ৰশংসা কৰিছিল, আনহাতে আন একাংশই কাশ্মীৰৰ যুৱতীসকলে সন্মুখীন হোৱা সামাজিক আৰু ধৰ্মীয় চাপৰ বিষয়টোও উত্থাপন কৰিছিল। তেতিয়াৰ জম্মু-কাশ্মীৰৰ মুখ্যমন্ত্ৰী মেহবুবা মুফতিক সাক্ষাৎ কৰাৰ পিছত জাইৰাই তীব্ৰ অনলাইন সমালোচনাৰ সন্মুখীন হৈছিল। আনকি তেওঁক মৃত্যুৰ ভাবুকিও দিয়া হৈছিল। মেহবুবা মুফতিয়ে জাইৰাক এগৰাকী আদৰ্শ হিচাপে অভিহিত কৰিছিল।
পিছত জাইৰাই ৰাজহুৱাভাৱে নিজৰ হতাশাৰ সৈতে যুঁজাৰ কথাও প্ৰকাশ কৰিছিল। অৱশেষত মানুহে তেওঁৰ ৰাজহুৱা জীৱনৰ পৰা আঁতৰি থকাৰ সিদ্ধান্তক যথেষ্ট সন্মান জনাইছিল আৰু তেওঁ বিচৰা ব্যক্তিগত গোপনীয়তাও তেওঁক প্ৰদান কৰিছিল। যোৱা বছৰ তেওঁ বিবাহৰ কথা জনাবলৈ কিছু সময়ৰ বাবে পুনৰ ৰাজহুৱা পৰিসৰলৈ আহিছিল। সামাজিক মাধ্যমত দিয়া এক পোষ্টত তেওঁ লিখিছিল, “কুবুল হাই x3”। কিন্তু তেওঁ স্বামীৰ পৰিচয় আৰু দুয়োৰে মুখ ৰাজহুৱা কৰাৰ পৰা আঁতৰি আছিল আৰু তাৰ পিছত পুনৰ নিজৰ ব্যক্তিগত জীৱনলৈ ঘূৰি গৈছিল।
তেওঁৰ বাবে কেৱল সুখ আৰু শান্তিৰেই কামনা কৰিব পাৰি। কিন্তু স্বাধীনতা দিৱসৰ এদিন পিছত এক্সত তেওঁৰ শেহতীয়া উপস্থিতিয়ে এক বিতৰ্কৰ সৃষ্টি কৰিছে।
জাইৰা ৱাছিমে তেওঁৰ বিবাহ সম্পৰ্কে সামাজিক মাধ্যমত কৰা এক পোষ্ট
জাইৰাই কাশ্মীৰত স্বাধীনতা দিৱসৰ এক অনুষ্ঠানত কণমানি ছোৱালীবোৰে নৃত্য কৰা এটা ভিডিঅ’ শ্বেয়াৰ কৰে। অনুষ্ঠানটোত জম্মু-কাশ্মীৰ ৱাকফ ব’ৰ্ডৰ অধ্যক্ষা ড° দৰখশ্বন আন্দ্ৰাবিও মঞ্চত উপস্থিত আছিল। জাইৰাই কয় যে, তেওঁ জম্মু-কাশ্মীৰ ৱাকফ ব’ৰ্ডৰ দ্বাৰা বা ব’ৰ্ডৰ বাবে আয়োজন কৰা বুলি উল্লেখ কৰা এনে উদযাপনৰ এটা ভিডিঅ’ দেখিছে। তাৰ পিছত তেওঁ প্ৰশ্ন কৰে যে, এটা ধৰ্মীয় সংস্থাই এনে এটা অনুষ্ঠানৰ সৈতে কিয় জড়িত হ’ব লাগে, য’ত ছোৱালীয়ে নৃত্য কৰি আছে?
তেওঁ প্ৰশ্ন কৰে যে, মুছলমান সমাজৰ সেৱাৰ বাবে কাম কৰা ৱাকফ ব’ৰ্ডে আদৰ্শগতভাৱে ইছলামিক মূল্যবোধ অনুসৰি কাম কৰা উচিত নহয়নে?
তেওঁ ৰাজহুৱা অনুষ্ঠানত, বিশেষকৈ ছোৱালী শিশুসকলক নৃত্য বা বিভিন্ন প্ৰদৰ্শনত অংশগ্ৰহণ কৰোৱাৰ বৃহত্তৰ প্ৰথাটোক লৈও প্ৰশ্ন উত্থাপন কৰিছে। তেওঁৰ মতে, বিদ্যালয়সমূহে শিশুসকলক চিন্তা কৰা, সৃষ্টিশীল হোৱা, শিকা, আলোচনা কৰা, কিবা এটা গঢ়ি তোলা আৰু সমাজলৈ অৱদান আগবঢ়োৱাৰ সুযোগ দিয়া উচিত। কেৱল মঞ্চত প্ৰদৰ্শন কৰিবলৈ শিশুসকলক ব্যৱহাৰ কৰাত গুৰুত্ব দিয়া উচিত নহয়। জাইৰাৰ এই পোষ্টে স্বাভাৱিকতেই তীব্ৰভাৱে বিভক্ত প্ৰতিক্ৰিয়াৰ সৃষ্টি কৰিছে।
সমালোচকসকলৰ মতে, জাইৰাই নিজৰ ব্যক্তিগত ধৰ্মীয় সিদ্ধান্তক আন মুছলমান ছোৱালীৰ বাবেও এক নিয়ম হিচাপে প্ৰতিষ্ঠা কৰিবলৈ চেষ্টা কৰিছে। তেওঁলোকে কয় যে, জাইৰাৰ ছবি কৰাৰ, কেৰিয়াৰ গঢ়াৰ আৰু পিছত সেই কেৰিয়াৰ এৰি দিয়াৰ সম্পূৰ্ণ অধিকাৰ আছিল। কিন্তু আন যুৱতীসকলৰো নিজৰ জীৱনৰ বাবে বেলেগ সিদ্ধান্ত লোৱাৰ সমান অধিকাৰ আছে।
জাইৰা ৱাছিমে বলীউডৰ সফলতাৰ পিছত মেহবুবা মুফতীক সাক্ষাৎ কৰাৰ এক মূহুৰ্ত
আন একাংশই এইঅ কথাও কৈছে যে, স্বাধীনতা দিৱসৰ সাংস্কৃতিক অনুষ্ঠানত অংশগ্ৰহণ কৰা বা নৃত্য কৰা নিজে নিজেই মুছলমান হোৱা বা কাশ্মীৰী মুছলমানৰ পৰিচয়ৰ সৈতে অসংগত নহয়।
একেদৰে, অসমৰ বিশিষ্ট অধিবক্তা তথা স্তম্ভলেখক জেবা জোয়াৰিয়াইও জাইৰা ৱাছিমক তীব্ৰ সমালোচনা কৰি তেওঁৰ এই যুক্তিক ইছলামৰ উগ্ৰবাদৰ প্ৰতিফলন আৰু মুছলমান মহিলাৰ শিক্ষা আৰু পৰিচয়ৰ আমনিদায়ক ভুল ব্যাখ্যা বুলি অভিহিত কৰিছে।
