মানুহে বিপদত পৰা লোকক দেখি দুখ কৰে, কিন্তু খুব কম মানুহেহে সহায় কৰিবলৈ আগবাঢ়ি আহে। কিন্তু এগৰাকী ছচিয়েল মিডিয়া ইনফ্লুৱেন্সাৰে তেওঁৰ বন্ধুবৰ্গৰ সৈতে মিলি কৰিছে এক মহান কাম। ছচিয়েল মিডিয়া ইনফ্লুৱেন্সাৰ খলিফা আৰু তেওঁৰ বন্ধুসকলে দক্ষিণ দিল্লীৰ এইমছ হাস্পতালৰ বাহিৰত এগৰাকী অসহায় মাতৃক তেওঁৰ কান্দি থকা শিশুটিক কোলাত লৈ থকা দেখিছিল। তেতিয়াই তেওঁলোকে সহায় কৰাৰ সিদ্ধান্ত লৈছিল।
পৰিয়ালটোক সহায় কৰাৰ এই সৰু প্ৰয়াসটোৱেই পিছলৈ এটা ডাঙৰ পুঁজি গোটোৱা অভিযানত পৰিণত হয়। এই অভিযানৰ জৰিয়তে এতিয়ালৈকে প্ৰায় ৬ কোটি টকা গোটোৱা হৈছে। শিশুটোৰ চিকিৎসাৰ বাবে প্ৰায় ৯ কোটি টকাৰ প্ৰয়োজন বুলি জানিব পৰা গৈছে। শিশুটো এছ এম এ টাইপ ১ নামৰ এক অতি বিৰল ৰোগত আক্ৰান্ত। এই ৰোগৰ ফলত লাহে লাহে শৰীৰৰ পেশীবোৰ দুৰ্বল হৈ পৰে।
এছ এম এ হৈছে এবিধ জিনীয় ৰোগ (বংশগত ৰোগ), যাৰ ফলত মানুহৰ শৰীৰৰ পেশীবোৰ লাহে লাহে অতি দুৰ্বল হৈ পৰে। এছ এম এ টাইপ ১ হৈছে এই ৰোগৰ আটাইতকৈ ভয়াৱহ ৰূপ, যিটো সাধাৰণতে কেঁচুৱা অৱস্থাতেই দেখা দিয়ে।
