গুৱাহাটী
অসম বিধানসভাই বৃহস্পতিবাৰে বহুবিবাহ নিষিদ্ধকৰণ বিধেয়ক গৃহীত কৰে। বহুবিবাহক অপৰাধ হিচাপে গণ্য কৰি এই বিধেয়কৰ অধীনত কিছুমান ব্যতিক্ৰম বাদ দি ১০ বছৰ পৰ্যন্ত কাৰাদণ্ড হ’ব পাৰে।
ইয়াৰ পৰা অনুসূচিত জনজাতি (SC) লোক আৰু ষষ্ঠ অনুসূচীৰ অন্তৰ্গত অঞ্চলসমূহক আইনখনৰ পৰিসৰৰ বাহিৰত ৰখা হৈছে।
মুখ্যমন্ত্রী হিমন্ত বিশ্ব শর্মাই কয় যে অহা বছৰ বিধানসভা নির্বাচনৰ পাছত পুনৰ মুখ্যমন্ত্রী হ’লে অসমত ইউনিফৰ্ম চিভিল কোড (UCC) কার্যকৰী কৰা হ’ব৷
অসম বহুবিবাহ নিষিদ্ধকৰণ বিধেয়ক ২০২৫ গৃহীত হোৱাৰ সময়ত গৃহ আৰু ৰাজনৈতিক বিভাগৰ দায়িত্বও থকা মুখ্যমন্ত্ৰীগৰাকীয়ে কয় যে এই আইনখন “ধৰ্ম নিৰ্বিশেষে আৰু কিছু লোকৰ ধাৰণা দৰে ইয়াক ইছলাম (মুসলমান)ৰ বিৰুদ্ধে অনা হোৱা নাই”।
তেওঁ লগতে কয় যে, "হিন্দুসকল বহুবিবাহৰ পৰা মুক্ত নহয়। সেয়াও আমাৰ দায়িত্ব। এই বিধেয়কখনে হিন্দু, মুছলমান, খ্ৰীষ্টান আৰু আন সকলো সমাজৰ লোকক সামৰি ল’ব।"
বিধেয়কখন সৰ্বসন্মতিক্ৰমে মহিলা সবলীকৰণৰ বাবে গৃহীত হৈছে বুলি সদনৰ পৰা বাৰ্তা প্ৰেৰণৰ বাবে বিৰোধী দলৰ সকলো সদস্যকে নিজ নিজ সংশোধনী প্ৰত্যাহাৰ কৰিবলৈ মুখ্যমন্ত্ৰীয়ে অনুৰোধ জনোৱাৰ পিছতো এ আই ইউ ডি এফ আৰু চি পি আই (এম)-এ সংশোধনীৰ পৰামৰ্শ আগবঢ়াই আৰু ই মৌখিক ভোটত পৰাস্ত হয়।
চি পি আই (এম)ৰ বিধায়ক মনোৰঞ্জন তালুকদাৰে বিধেয়কখন বিধানসভাৰ নিৰ্বাচিত সমিতিলৈ প্ৰেৰণ কৰি দফাসমূহৰ সন্দৰ্ভত বিতং আলোচনাৰ বাবে দাবী জনায়।
ইউ চি চিৰ বিষয় সন্দৰ্ভত শৰ্মাই কয় যে অহা বছৰ বিধানসভা নিৰ্বাচনৰ পিছত পুনৰ মুখ্যমন্ত্ৰী হ’লে অসমত ইয়াক কাৰ্যকৰী কৰা হ’ব।
বিধানসভা নিৰ্বাচন ২০২৬ চনৰ মাৰ্চ-এপ্ৰিল মাহত অসমত হোৱাৰ সম্ভাৱনা আছে।
"মুখ্যমন্ত্ৰী হিচাপে ঘূৰি আহিলে নতুন চৰকাৰৰ প্ৰথম অধিৱেশনত ইউচিচিৰ বিধেয়ক উত্থাপন হ’ব আৰু কাৰ্যকৰী হ’ব বুলি সদনক আশ্বাস দিছো।"
তেওঁ কয় যে বহুবিবাহ নিষেধাজ্ঞা ইউ চি চি ৰূপায়ণৰ দিশত এক দিশ।
মুখ্যমন্ত্ৰীয়ে লগতে কয় যে, "ফেব্ৰুৱাৰী শেষৰ ফালে অধিবেশনৰ সময়ত প্ৰতাৰণামূলক বিবাহৰ বিৰুদ্ধে এখন বিধেয়ক আনিম। গতিকে, আমি লাভ জেহাদৰ বিষয়ে যি কথা কৈছো, আমি সেইটো কৰিম।"
‘লাভ জেহাদ’ শব্দটো সোঁপন্থী সংগঠনে ব্যৱহাৰ কৰি দাবী কৰে যে মুছলমান পুৰুষে আন ধৰ্মৰ মহিলাক প্ৰলোভিত কৰি বিয়া কৰাই তেওঁলোকক ইছলাম ধৰ্ম গ্ৰহণ কৰায়।
চলিত মাহৰ আৰম্ভণিতে তেওঁ কৈছিল যে চৰকাৰে লাভ জেহাদ নিষিদ্ধ কৰিব আৰু ইয়াৰ বিৰুদ্ধে বিধেয়ক উত্থাপন কৰিব।
বিধেয়কখনত ‘বহুবিবাহ’ৰ সংজ্ঞা দিয়া হৈছে যে যেতিয়া পক্ষসমূহৰ কোনো এজনৰ ইতিমধ্যে বৈধ বিবাহ বা জীৱিত পত্নী থাকে যাৰ লগত তেওঁৰ আইনগত বিবাহ বিচ্ছেদ হোৱা নাই, বা তেওঁলোকৰ বিবাহ আইনগতভাৱে বাতিল ঘোষণা কৰা নহয়, তেতিয়া আন এজন ব্যক্তিৰ সৈতে বিবাহ বা বিবাহপাশত আবদ্ধ হোৱা কাৰ্য্য।
ইয়াত প্ৰস্তাৱ কৰা হৈছে যে বহুবিবাহৰ বাবে যোৱা যিকোনো ব্যক্তিক অপৰাধৰ বাবে দোষী সাব্যস্ত কৰি আইনত উল্লেখ কৰা অনুসৰি সাত বছৰ পৰ্যন্ত কাৰাদণ্ড আৰু জৰিমনা বিহা হ’ব।
ইয়াৰ উপৰিও কয় যে যিকোনো ব্যক্তিয়ে বৰ্তমানৰ বৈধ বিবাহ লুকুৱাই ৰাখি পৰৱৰ্তী বিবাহ সংঘটিত কৰিলে ১০ বছৰৰ কাৰাদণ্ড আৰু জৰিমনা বিহা হ’ব।
প্ৰস্তাৱিত আইনখনৰ অধীনত পুনৰাবৃত্তিকাৰী অপৰাধীক পৰৱৰ্তী প্ৰতিটো অপৰাধৰ বাবে নিৰ্ধাৰিত শাস্তিতকৈ দুগুণ শাস্তি প্ৰদান কৰা হ’ব বুলি বিধেয়কখনত প্ৰস্তাৱ কৰা হৈছে।
গাঁৱৰ মুৰব্বী, কাজী, পিতৃ-মাতৃ বা আইনী অভিভাৱকে অসৎভাৱে তথ্য লুকুৱাই ৰাখিলে বা ইচ্ছাকৃতভাৱে বহুবিবাহ পৰিচালনাত অংশগ্ৰহণ কৰিলে দুবছৰ পৰ্যন্ত কাৰাদণ্ড আৰু এক লাখ টকা পৰ্যন্ত জৰিমনা বিহা হ’ব পাৰে।
যিকোনো ব্যক্তিয়ে জানি-বুজি প্ৰস্তাৱিত আইন উলংঘা কৰি বিবাহ সম্পন্ন কৰিলে দুবছৰ পৰ্যন্ত কাৰাদণ্ড বা ১.৫০ লাখ টকা পৰ্যন্ত জৰিমনা বিহা হ’ব পাৰে।
বিধেয়কখনত আৰু প্ৰস্তাৱ কৰা হৈছে যে যিজন ব্যক্তিয়ে বহুবিবাহ বিবাহপাশত আবদ্ধ হয় আৰু আদালতে এই নতুন আইনখনৰ অধীনত দোষী সাব্যস্ত কৰে, তেওঁ ৰাজ্য চৰকাৰৰ পুঁজি বা সহায়ত কোনো ৰাজহুৱা নিয়োগ আৰু নিযুক্তিৰ অধিকাৰী হ’ব নোৱাৰিব।
তদুপৰি ব্যক্তিজন ৰাজ্য চৰকাৰৰ পুঁজিৰে বা সাহায্যপ্ৰাপ্ত কোনো আঁচনিৰ হিতাধিকাৰী হ’বনোৱাৰিব, লগতে পঞ্চায়তীৰাজ প্ৰতিষ্ঠান, নগৰীয়া স্থানীয় সংস্থা আদিৰ বাবে কোনো নিৰ্বাচনত প্ৰতিদ্বন্দ্বিতা কৰিব নোৱাৰিব।
বহুবিবাহৰ বাবে অপৰিসীম কষ্টৰ সন্মুখীন হ’বলগীয়া হোৱাৰ বাবে প্ৰস্তাৱিত আইনখনে ভুক্তভোগী মহিলাসকলক ক্ষতিপূৰণ প্ৰদান কৰিব বিচাৰিছে।
