আলহাদ যোশী
মহাৰাষ্ট্ৰৰ জালগাঁৱৰ ইৰাণ্ডোল চহৰত বিগত ৩৭ বছৰে এটা মুছলমান পৰিয়ালে এক অনন্য পৰম্পৰাক উদযাপন কৰি আহিছে। প্ৰতি বছৰে ডাঃ কে এ বহৰীৰ ঘৰত সকলো ধৰ্মীয় অনুষ্ঠানৰ সৈতে গণেশৰ মূৰ্তি স্থাপন কৰা হয়। এগৰাকী ব্যস্ত চিকিৎসক হোৱাৰ পিছতো তেওঁ নিজৰ ধৰ্মীয় বিশ্বাস আৰু পেছাৰ মাজত ভাৰসাম্য ৰক্ষা কৰি এই পৰম্পৰাক বিনা বাধাই পালন কৰি আহিছে।
গণেশ চতুৰ্থীৰ শুভ ক্ষণত চহৰখন উৎসৱমুখৰ হৈ পৰাৰ সময়তে ডাঃ কে এ বহৰীৰ ঘৰত ‘গণেশ বাপ্পা’ স্থাপনে সমাজলৈ ধৰ্মীয় সম্প্ৰীতিৰ গভীৰ বাৰ্তা প্ৰেৰণ কৰে। ডাঃ কে এ বহৰী আৰু তেওঁৰ পত্নী ডাঃ এন কে বহৰীয়ে ৫০ বছৰ ধৰি ৰোগীৰ সেৱাত নিজকে উৎসৰ্গা কৰিছে। তেওঁলোকৰ পুত্ৰ ডাঃ ফাৰহাজ বহৰী হৃদৰোগ বিশেষজ্ঞ, আৰু তেওঁৰ পত্নী ডাঃ অম্ব্ৰিন বহৰী এগৰাকী স্ত্ৰীৰোগ বিশেষজ্ঞ। ফাৰহাজ যেতিয়া কিণ্ডাৰগাৰ্টেনত পঢ়ি আছিল তেতিয়াই তেওঁলোকৰ ঘৰত গণেশ চতুৰ্থী উদযাপনৰ পৰম্পৰা আৰম্ভ হৈছিল।
সেই সময়ত ডাঃ বহৰী দম্পতীৰ পুত্ৰ ফাৰহাজৰ বয়স মাত্ৰ তিনি বছৰ আছিল। গণেশোৎসৱৰ সময়ত বন্ধু-বান্ধৱীৰ ঘৰলৈ গৈ ফাৰহাজে গণপতি বাপ্পাক ঘৰলৈ অনাৰ পৰম্পৰা দেখিবলৈ পাইছিল আৰু তেওঁৰ অন্তৰতো এই আধ্যাত্মিক হেঁপাহ গঢ় লৈ উঠিছিল। তেওঁ দেউতাকক গণেশ মূৰ্তি ঘৰলৈ আনিবলৈ অনুৰোধ কৰিছিল আৰু ডা বহৰীয়ে পুত্ৰৰ ইচ্ছা পূৰণ কৰি তেওঁলোকৰ ঘৰত এটা গণেশ মূৰ্তি স্থাপন কৰিলে।
মহাৰাষ্ট্ৰত গণেশ বিসৰ্জন অনুষ্ঠান
৩৭ বছৰ ধৰি মুছলমান পৰিয়ালটোৰ ঘৰত নিৰৱচ্ছিন্নভাৱে এই পৰম্পৰা চলি আহিছে। দশম শ্ৰেণীৰ পিছত ডাঃ ফাৰহাজে উচ্চ শিক্ষাৰ বাবে চহৰ এৰি যোৱাৰ পিছতো তেওঁৰ পিতৃ ডাঃ বহৰীয়ে গণেশৰ মূৰ্তি স্থাপনৰ পৰম্পৰা ভংগ নকৰিলে। স্কুল, কলেজ, চিকিৎসা শিক্ষাৰ সময়ছোৱাত ডাঃ ফাৰহাজে য’তেই নাথাকক কিয়, গণেশোৎসৱত অংশগ্ৰহণ কৰে আৰু ইয়াক উদযাপন কৰে।
সদায়ৰ দৰেই বহৰী পৰিয়ালে মাছৱাদ পথত থকা তেওঁলোকৰ ক্লিনিকত সুন্দৰ আলোক সজ্জাৰে গণেশৰ মূৰ্তি স্থাপন কৰে। বহৰী পৰিয়ালৰ সকলো সদস্যই নিয়মিতভাৱে পুৱা আৰু গধূলি আৰতি আৰু অন্যান্য সকলো ধৰ্মীয় অনুষ্ঠানত অংশগ্ৰহণ কৰে। পাঁচ দিনৰ মূৰত গণেশ মূৰ্তিটো তেওঁলোকে বিসৰ্জন দিয়ে।
মানুহৰ জীৱনৰ পৰা বাধা আঁতৰোৱা দেৱতা গণেশক প্ৰতি বছৰে ঘৰলৈ আদৰণি জনোৱাৰ বহৰী পৰিয়ালৰ পৰম্পৰাই সামাজিক একতা-সম্প্ৰীতিৰ এক শক্তিশালী বাৰ্তা বিয়পাইছে। গণেশ উৎসৱক আনন্দ, ঐক্য আৰু ভাতৃত্ববোধৰ উৎসৱ বুলি পৰিয়ালটোৱে ইয়াক আঁকোৱালি লৈছে। গণেশৰ পূজা কৰি আৰু বন্ধু-বান্ধৱী তথা পৰিয়ালৰ সকলো লোক একত্ৰিত হোৱাৰ ফলত উদ্ভৱ হোৱা মানসিক শান্তিৰ জৰিয়তে তেওঁলোকে অপৰিসীম আনন্দ লাভ কৰে বুলি বহৰী পৰিয়ালে প্ৰকাশ কৰে।
