সন্ত্ৰাসবাদীৰ সৈতে যুঁজি মাত্ৰ ৩৪ বছৰ বয়সতে শ্বহীদ হোৱা ডি এছ পি হুমায়ুন মুজাম্মিল ভাট
আৱাজ দ্য ভইচ / নতুন দিল্লী
২০২৫ চনৰ ২২ মে’ত যেতিয়া ৰাষ্ট্ৰপতি দ্ৰৌপদী মুৰ্মুৱে মৰণোত্তৰভাৱে কীৰ্তি চক্ৰ প্ৰদান কৰা বিষয়াৰ তালিকাখন পঢ়ি শুনাইছিল, তেতিয়া তাত এটা বিশেষ নাম আছিল—ডি এছ পি হুমায়ুন মুজাম্মিল ভাট। সন্ত্ৰাসবাদীৰ সৈতে যুঁজি মাত্ৰ ৩৪ বছৰ বয়সতে শ্বহীদ হোৱা এই যুৱ বিষয়াজনে কেৱল জম্মু-কাশ্মীৰকে নহয়, সমগ্ৰ দেশকে আবেগিক কৰি তুলিছিল। দেশ সেৱা আৰু ত্যাগৰ বাবে শ্বহীদ হুমায়ুন মুজাম্মিল ভাট আজিও লাখ লাখ লোকৰ হৃদয়ত জীয়াই আছে।
২০২৩ চনৰ ছেপ্টেম্বৰ মাহত দক্ষিণ কাশ্মীৰৰ অনন্তনাগ জিলাৰ কোকেৰনাগ অঞ্চলত এক বৃহৎ সন্ত্ৰাসবাদ বিৰোধী অভিযানৰ সময়ত হুমায়ুন ভাটে দুজন সাহসী সেনা বিষয়া ক্ৰমে কৰ্ণেল মনপ্ৰীত সিং আৰু মেজৰ আশীষ ধোঞ্চক (১৯ ৰাষ্ট্ৰীয় ৰাইফল)ৰ সৈতে দায়িত্ব লয়।
এই এনকাউণ্টাৰত তিনিওজন বিষয়াই শ্বহীদ হ’ল। কিন্তু তেওঁলোকৰ ত্যাগ অথলে নগ’ল। নিৰাপত্তা বাহিনীয়ে অভিযানৰ সময়ত কেইবাজনো সন্ত্ৰাসবাদীক হত্যা কৰি অঞ্চলটোক এক বৃহৎ ভাবুকিৰ পৰা ৰক্ষা কৰিলে। হুমায়ুন ভাট এনে এটা পৰিয়ালৰ পৰা আহিছিল, য’ত দেশ সেৱাৰ এক পৰম্পৰা আছে। তেওঁৰ পিতৃ গুলাম হাছান ভাটে কাশ্মীৰৰ আৰক্ষী মহাপৰিদৰ্শক (আই জি পি) হিচাপে অৱসৰ গ্ৰহণ কৰিছিল।
পুত্ৰক চূড়ান্ত বিদায় দিওঁতে তেওঁৰ মুখত গৌৰৱ আৰু অসহ্যকৰ বিষ দুয়োটা স্পষ্টকৈ দেখা গৈছিল। যেতিয়া তেওঁ পুত্ৰৰ মৃতদেহ কান্ধত তুলি লৈছিল, সেই মুহূৰ্তটোৱে সমগ্ৰ দেশৰ আত্মাক কঁপাই তুলিছিল। প্ৰাক্তন ডিজিপি শ্বেছ পল বৈদে কয়, "গুলাম হাছানে জানিছিল যে জম্মু-কাশ্মীৰ আৰক্ষী সেৱা কিমান বিপজ্জনক, তথাপিও তেওঁ নিজৰ পুত্ৰক দেশৰ সেৱা কৰিবলৈ অনুপ্ৰাণিত কৰিছিল। এয়া অসাধাৰণ।"
উল্লেখ্য যে, হুমায়ুনৰ বিয়া হোৱা মাত্ৰ এবছৰ হৈছিল। মৃত্যুৰ সময়ত তেওঁ পত্নী ফাতিমা, এমাহৰ কন্যা, পিতৃ-মাতৃ আৰু এগৰাকী ভগ্নীক এৰি থৈ যায়।
শ্ৰীনগৰত মাল্যাৰ্পণৰ সময়ত যেতিয়া ফাতিমাই কান্দি উঠিছিল, তেতিয়া তাত উপস্থিত থকা সকলোৰে চকুৰে অশ্ৰু নিগৰি আহিছিল। তেওঁৰ মৃত্যুৱে সমগ্ৰ দেশক কান্দিবলৈ বাধ্য কৰাইছিল। ২০১৮ চনত অসামৰিক সেৱাৰ পৰীক্ষাত উত্তীৰ্ণ হোৱা হুমায়ুনে আৰক্ষী সেৱাত যোগদান কৰে। ইয়াৰ পূৰ্বে তেওঁ কিছুদিন সমাজ কল্যাণ বিভাগত কাৰ্যনিৰ্বাহ কৰিছিল।
তেওঁ কেৱল এজন দায়িত্বশীল বিষয়াই নহয়, এজন সংবেদনশীল আৰু জনমুখী ব্যক্তিও আছিল। তেওঁৰ ঘনিষ্ঠ বন্ধু তথা অধিবক্তা শ্বেখ আমিৰে কয়, "হুমায়ুনে যেতিয়া অসামৰিক সেৱাৰ বাবে প্ৰস্তুতি চলাইছিল, তেতিয়া তেওঁ প্ৰায়ে নৌগামত থকা আমাৰ ঘৰলৈ আহিছিল। দেউতাকে তেওঁক আমাৰ ওচৰলৈ পথ প্ৰদৰ্শনৰ বাবে পঠিয়াইছিল। যেতিয়া তেওঁ পৰীক্ষাত উত্তীৰ্ণ হৈ আৰক্ষী সেৱাত যোগদান কৰিলে, তেতিয়া তেওঁৰ গুৰু হোৱাৰ বাবে মই গৌৰৱ অনুভৱ কৰিছিলোঁ।"
ডি এছ পি হুমায়ুন মুজাম্মিল ভাটৰ পত্নীয়ে ৰাষ্ট্ৰপতিৰ পৰা গ্ৰহণ কৰিছে স্বামীৰ 'কীৰ্তি চক্ৰ' সন্মান
বুডগাম জিলাৰ হুমহামাস্থিত তেওঁৰ বাসগৃহত হুমায়ুনৰ শেষকৃত্য সম্পন্ন কৰা হয়। হাজাৰ হাজাৰ লোকে তেওঁক কান্দোনেৰে বিদায় দিয়ে। ব্যক্তিগতভাৱে উপস্থিত আছিল ডিজিপি দিলবাগ সিং আৰু কাশ্মীৰৰ এডিজিপি বিজয় কুমাৰ। এয়া কেৱল এজন শ্বহীদ বিষয়াৰ বিদায় নাছিল – ই আছিল এজন পুত্ৰ, স্বামী, পিতৃ আৰু এজন আদৰ্শ নাগৰিকৰ শেষ বিদায়।
হুমায়ুন ভাটক মৰণোত্তৰভাৱে ভাৰতৰ দ্বিতীয় সৰ্বোচ্চ শান্তিকালীন বীৰত্ব বঁটা ‘কীৰ্তি চক্ৰ’ৰে সন্মানিত কৰা হয়। এই সন্মান কেৱল তেওঁৰ বীৰত্বৰ প্ৰতীক নহয়, দেশ সেৱাৰ সপোন দেখা সেই সকলো যুৱকৰ বাবেও এক প্ৰেৰণা। ৰাষ্ট্ৰপতি ভৱনে প্ৰকাশ কৰা এক পোষ্টত হুমায়ুন ভাটৰ মৃত্যুক “অসাধাৰণ সাহস আৰু পৰম ত্যাগ” বুলি অভিহিত কৰা হৈছে।
জম্মু-কাশ্মীৰ আৰক্ষীৰ ইতিহাসত তেওঁৰ নাম সোণালী আখৰেৰে লিখা থাকিব। হুমায়ুন মুজাম্মিল ভাট হয়তো আৰু আমাৰ মাজত নাই, কিন্তু তেওঁৰ জীৱন, তেওঁৰ সাহস আৰু তেওঁৰ ত্যাগে আগন্তুক প্ৰজন্মক অনুপ্ৰাণিত কৰি থাকিব। এজন বিষয়া, এজন পুত্ৰ, এজন স্বামী, এজন পিতৃ আৰু সৰ্বোপৰি তেওঁ এজন প্ৰকৃত দেশপ্ৰেমিক আছিল।
