নতুন দিল্লী
ৰাষ্ট্ৰীয় স্বয়ংসেৱক সংঘৰ মুৰব্বী মোহন ভাগৱতে পুনৰ কয় যে ইছলাম ধৰ্ম আৰম্ভণিৰে পৰা ভাৰতৰ অংশ হৈ আহিছে, আৰু ই সদায় আমাৰ ইতিহাসৰ অংশ হৈ থাকিব। যিসকলে ইছলাম ধৰ্ম নাইকিয়া হ’ব বুলি ভাবে তেওঁলোক “হিন্দু চিন্তাধাৰাৰ দ্বাৰা পৰিচালিত নহয়” বুলিও মোহন ভাগৱতে উল্লেখ কৰে।
"ইছলাম ভাৰতলৈ অহা দিনৰে পৰা ইয়াতেই আছে আৰু ইয়াতে থাকিব। মই এই কথা আগতেও কৈছিলোঁ। ইছলাম নাথাকিব বুলি ভবাসকলে হিন্দু চিন্তাৰ দ্বাৰা পৰিচালিত নহয়। হিন্দু দৰ্শনে এনেদৰে চিন্তা নকৰে। দুয়োপক্ষৰ আস্থা থাকিলেহে হিন্দু-মুছলমানৰ সংঘাতৰ অন্ত পৰিব। প্ৰথমে আমি সকলোৱে এক বুলি মানি ল’ব লাগিব।"-বৃহস্পতিবাৰে নতুন দিল্লীত এক অনুষ্ঠানত এইদৰে কয় ভাগৱতে।
দিল্লীত আৰ এছ এছৰ শতবাৰ্ষিকী উদযাপনৰ তৃতীয় দিনটোত এক কাৰ্যসূচীত ভাষণ দি ভাগৱতে কয় যে ‘অনুপ্ৰৱেশ’ এটা সমস্যা যিটো দেশত বন্ধ কৰাটো প্ৰয়োজন, কিয়নো ‘বাহিৰৰ লোকে’ মুছলমানসকলৰো চাকৰি কাঢ়ি লৈছে। "অনুপ্ৰৱেশ বন্ধ কৰিব লাগিব। চৰকাৰে কিছু প্ৰচেষ্টা চলাইছে আৰু ক্ৰমান্বয়ে আগবাঢ়িছে। আমাৰ দেশত বসবাস কৰা মুছলমানসকলো দেশৰ নাগৰিক। তেওঁলোককো কৰ্মসংস্থাপনৰ প্ৰয়োজন। যদি আপুনি মুছলমানক চাকৰি দিব বিচাৰে, তেন্তে আমাৰ নিজৰ নাগৰিকক দিব। বাহিৰৰ পৰা অহা সকলক আমি কিয় দিম? তেওঁলোকৰ নিজৰ দেশেই তেওঁলোকৰ দায়িত্ব ল’ব লাগে।"-আৰ এছ এছৰ মুৰব্বীগৰাকীয়ে এই মন্তব্য আগবঢ়ায়।
উৎসৱৰ সময়ত ধৰ্মীয় সংবেদনশীলতাৰ সন্দৰ্ভত ভাগৱতে কয়, "উপবাসৰ সময়ত মানুহে নিৰামিষভোজী হৈ থকাটো পছন্দ কৰে। সেই দিনবোৰত যদি কিছুমান দৃশ্য উপস্থাপন কৰা হয়, তেন্তে আৱেগক আঘাত পাব পাৰে। এয়া মাত্ৰ দুই-তিনি দিনৰ কথা। সেই সময়ত এনেধৰণৰ প্ৰথা পৰিহাৰ কৰাটো যুক্তিসংগত। তেতিয়া কোনো আইনৰ প্ৰয়োজন নাথাকিব।"
জনসংখ্যা সন্দৰ্ভত ভাষণ দি আৰ এছ এছৰ মুৰব্বীগৰাকীয়ে কয় যে ভাৰতৰ প্ৰতিজন নাগৰিকে আদৰ্শগতভাৱে তিনিটা সন্তান জন্ম দিব লাগে। "জনসংখ্যা নিয়ন্ত্ৰিত আৰু পৰ্যাপ্ত হৈ থাকিব লাগে। এই দৃষ্টিকোণৰ পৰা তিনিটা সন্তান থাকিব লাগে -- ইয়াতকৈ বেছি নহয়। সকলোৱে এই কথা মানি লোৱা উচিত," তেওঁ উল্লেখ কৰে।
"আমাৰ দেশৰ জনসংখ্যা নীতিত গড়ে ২.১ সন্তানৰ পৰামৰ্শ দিয়া হৈছে। কিন্তু যেতিয়া এজন মহিলাৰ সন্তান হয়, তেতিয়া তেওঁলোকৰ ০.১ সন্তান নাথাকে। গণিতত ২.১ৰ অৰ্থ ২, কিন্তু ২ৰ পিছত সন্তান জন্ম হোৱাৰ লগে লগে ই ৩, যাৰ বাবে ২.১ মানে ৩ বুলি আমি ধৰিব লাগিব। প্ৰতিজন নাগৰিকে চাব লাগে যে তেওঁৰ পৰিয়ালত সৰ্বাধিক তিনিটা সন্তানহে থকা উচিত।"-ভাগৱতে কয়।
কিন্তু শেহতীয়াকৈ বিশ্বৰ জনসংখ্যাৰ অৱস্থা সম্পৰ্কে ৰাষ্ট্ৰসংঘৰ প্ৰতিবেদনত ভাৰতৰ জন্মৰ হাৰ ১.৯ লৈ হ্ৰাস পোৱাৰ কথা সকীয়াই দিয়া হৈছে, যিটো ২.১ বজাই ৰখাৰ লক্ষ্যতকৈ কম। তেওঁ কয় যে হিন্দুকে ধৰি বিভিন্ন সম্প্ৰদায়ৰ মাজত জন্মৰ হাৰ হ্ৰাস পাই আহিছে। সকলোৰে বাবে জন্মৰ হাৰ কমি আহিছে। কিছুদিনৰ পৰা হিন্দুৰ জন্মৰ হাৰ কমি আহিছে। আন কিছুমানৰ ক্ষেত্ৰত এনে পৰিৱৰ্তন সংঘটিত হোৱা নাই, গতিকে ইয়াক বিশেষভাৱে দেখুওৱা হৈছে, কিন্তু তেওঁলোকৰো কমি আহিছে। প্ৰকৃতিয়ে এই কাম সঘনাই কৰে। যদি সা-সুবিধা কম আৰু জনসংখ্যা বেছি হয়, তেন্তে এনেকুৱা হয়।
প্ৰশ্নৰ উত্তৰত ভাগৱতে কয়, "ৰাম মন্দিৰ আছিল আৰ এছ এছে সমৰ্থিত একমাত্ৰ আন্দোলন। কাশী-মথুৰা পুনৰুদ্ধাৰ আন্দোলন সংঘই সমৰ্থন নকৰে, কিন্তু স্বেচ্ছাসেৱকসকলে ইয়াত অংশ ল'ব পাৰে।" তেওঁ লগতে কয় যে চহৰ আৰু পথসমূহৰ নাম আক্ৰমণকাৰীৰ নামেৰে ৰখা উচিত নহয়। "মই কেতিয়াও কোৱা নাছিলো যে মুছলমানৰ নাম থাকিব নালাগে। বীৰ আব্দুল হামিদ আৰু আব্দুল কালামৰ নামেৰে নামকৰণ কৰক, কিন্তু আক্ৰমণকাৰীৰ নাম থাকিব নালাগে।"-মোহন ভাগৱতে কয়।
ভাৰতীয় জনতা পাৰ্টিৰ সভাপতি পদৰ সিদ্ধান্ত আৰএছএছ-এ লোৱা বুলি কৰা দাবীক ভাগৱতে খাৰিজ কৰি কয় যে সেয়া একেবাৰে ভুল কথা। সেই সন্দৰ্ভত প্ৰতিক্ৰিয়া প্ৰকাশ কৰি ভাগৱতে কয় যে, আৰ এছ এছে সকলো সিদ্ধান্ত লয় বুলি কোৱাটো একেবাৰে ভুল। আমি পৰামৰ্শ দিব পাৰো, কিন্তু সিদ্ধান্ত তেওঁলোকৰ ফালৰ পৰা লোৱা হয়। আমি যদি সিদ্ধান্ত লৈছিলো, তেন্তে ইমান সময় লাগিবনে?
তেওঁ আৰু স্পষ্ট কৰি দিয়ে যে বিজেপিৰে সংঘাতৰ কোনো বিষয় নাই। আমাৰ মতৰ পাৰ্থক্য থাকিব পাৰে, কিন্তু হৃদয়ৰ পাৰ্থক্য নাই। আৰ এছ এছৰ প্ৰতি ৰাজনৈতিক দলসমূহৰ বিৰোধিতা সন্দৰ্ভত ভাগৱতে কয় যে, "প্ৰথম অৱস্থাত জয়প্ৰকাশ নাৰায়ণ আৰ এছ এছৰ বিৰোধী আছিল, কিন্তু পিছত তেওঁ আমাৰ ওচৰলৈ আহিছিল। ভাল কামৰ বাবে আমাৰ সহায় বিচৰাসকলে আমাৰ পৰা পৰ্যাপ্ত সহায় লাভ কৰে, আঁতৰত থকাসকলে নাপায়। এই ক্ষেত্ৰত আমি কি কৰিব পাৰো?"
ভাষণৰ সময়ত তেওঁ প্ৰাক্তন ৰাষ্ট্ৰপতি প্ৰণৱ মুখাৰ্জীৰ কথাও উল্লেখ কৰে। ভাগৱতে কয়, "প্ৰণৱ মুখাৰ্জীও আৰ এছ এছৰ মঞ্চলৈ আহিছিল। তেওঁৰ যি ভুল ধাৰণা আছিল পৰিষ্কাৰ হ'ল। যিকোনো মানুহৰ হৃদয় সলনি হ'ব পাৰে। ৰূপান্তৰৰ সম্ভাৱনাক উলাই কৰা উচিত নহয়। নেতৃত্ব সদায় স্বচ্ছ আৰু পৰিষ্কাৰ হ’ব লাগে। আমাৰ নেতৃত্ব স্বচ্ছ আৰু পৰিষ্কাৰ বুলি মানুহৰ বিশ্বাস থাকিব লাগিব।"
মোহন ভাগৱতে কয় যে ৰাষ্ট্ৰীয় স্বয়ংসেৱক সংঘই সংৰক্ষণক সমৰ্থন কৰি আহিছে আৰু ইয়াৰ সুবিধা লাভ কৰাসকলে ইয়াৰ আৰু প্ৰয়োজন নাই বুলি অনুভৱ নকৰালৈকে আৰু তেওঁলোকে নিজাববীয়াকৈ থিয় দিব নোৱাৰালৈকে সমৰ্থন কৰি যাব।
"সংবিধান অনুসৰি প্ৰদান কৰা সংৰক্ষণক সংঘই ইতিমধ্যে সমৰ্থন কৰে আৰু সদায় কৰি থাকিব। আৰু যেতিয়ালৈকে সংৰক্ষণৰ সুবিধা লাভ কৰাসকলে অনুভৱ নকৰে যে ইয়াৰ আৰু প্ৰয়োজন নাই, বৈষম্য সমাপ্ত হৈছে, আৰু তেওঁলোকে নিজাববীয়াকৈ থিয় দিব পাৰিব, তেতিয়ালৈকে আমি ইয়াক সমৰ্থন কৰিম।"-আৰএছএছৰ মুৰব্বীগৰাকীয়ে কয়। বালাছাহেব দেওৰাছ আৰ এছ এছৰ মুৰব্বী হৈ থকাৰ সময়ত সংঘই সংৰক্ষণৰ সপক্ষে প্ৰস্তাৱ গৃহীত কৰিছিল বুলিও তেওঁ কয়।
ভাগৱতে কয় যে আৰ এছ এছৰ স্বয়ংসেৱকসকলে পিছপৰা শ্ৰেণীৰ লোকৰ ওপৰত সংঘটিত হোৱা অত্যাচাৰৰ বিৰুদ্ধে দৃঢ়তাৰে থিয় দিছে। "য’তেই এনেবোৰ ঘটনা ঘটে, আৰ এছ এছৰ স্বেচ্ছাসেৱকসকল তালৈ যাব লাগে। তেওঁলোকে সত্য আৰু ন্যায়ৰ পক্ষত থিয় দিব লাগিব আৰু ভুক্তভোগীৰ ন্যায় নিশ্চিত কৰিব লাগিব, লগতে এনে ঘটনাই সমাজত যাতে কাজিয়াৰ সৃষ্টি নকৰে, সেয়াও দৃষ্টি দিব লাগিব। এই সকলোবোৰ আমাৰ স্বেচ্ছাসেৱকৰ পৰা আশা কৰা হৈছে।"
সংঘই কিয় এনে অত্যাচাৰৰ বিৰুদ্ধে দৃঢ়ভাৱে থিয় দিয়া যেন নালাগে সেই প্ৰশ্নৰ উত্তৰ দি তেওঁ কয়, "যদি কোনো কাৰণত এনে নহয়, তেন্তে সেয়া আমাৰ দোষ। স্থানীয় সংঘৰ কৰ্মীসকলৰ দৃষ্টিগোচৰ কৰক। ইয়াৰ যত্ন লোৱা হ’ব।"-তেওঁ লগতে কয়।
