এছিয়া কাপত স্বৰ্ণ জয়েৰে ভাৰতীয় মহিলা ক্ৰিকেট দলৰ ইতিহাস; অসমৰ উমা চেত্ৰীও এই দলৰ অন্যতম সদস্য

Story by  atv | Posted by  [email protected] • 2 Months ago
জয়ৰ পিছত উল্লসিত ভাৰতীয় খেলুৱৈসকল
জয়ৰ পিছত উল্লসিত ভাৰতীয় খেলুৱৈসকল
 
হাংঝৌ (চীন)

এছিয়া কাপত সোণৰ পদক জয় কৰি ভাৰতীয় মহিলা ক্ৰিকেট দলে ইতিহাসৰ সোণালী পৃষ্ঠাত নাম সন্নিৱিষ্ট কৰিবলৈ সক্ষম হৈছে। চীনৰ হাংঝৌত সোমবাৰে অনুষ্ঠিত এছিয়া কাপ মহিলা ক্ৰিকেটৰ ফাইনেলত হৰমনপ্ৰীত কৌৰ নেতৃত্বাধীন ভাৰতে শ্ৰীলংকাক ১৯ ৰানত পৰাস্ত কৰি ইতিহাস ৰচে। উল্লেখ্য যে, এছিয়ান গেমছৰ ক্ৰিকেটত ভাৰতৰ এয়া প্ৰথমটো স্বৰ্ণ পদক। 
 
আমাৰ বাবে গৌৰৱৰ বিষয় যে, অসমৰ উদীয়মান মহিলা ক্ৰিকেটাৰ উমা চেত্ৰীও এই দলটোৰ অন্যতম সদস্য। প্ৰতিযোগিতাখনত খেলাৰ সুযোগ নাপালেও উমাৰ স্বৰ্ণ জয়ত সমগ্ৰ অসমবাসী গৌৰৱান্বিত। অৰ্জুন ভোগেশ্বৰ বৰুৱা আৰু হিমা দাসৰ পিছত এছিয়ান গেমছত স্বৰ্ণ জয় কৰা উমা অসমৰ তৃতীয়গৰাকী ক্ৰীড়াবিদ হিচাপে চিহ্নিত হৈছে।
 
ফাইনেলত ভাৰতৰ এই ঐতিহাসিক জয়ৰ মূলতে আছিল স্মৃতি মান্ধানা, জেমিমা ৰড্ৰিগুৱেজৰ আকৰ্ষণীয় বেটিং আৰু তিতাছ সাধুৰ বিধ্বংসী বলিং। মান্ধানাৰ ৪৬ আৰু ৰড্ৰিগুৱেজৰ ৪২ ৰানৰ সহায়ত ভাৰতে নিৰ্ধাৰিত ২০ অভাৰত ৭ উইকেটৰ বিনিময়ত ১১৬ ৰান সংগ্ৰহ কৰে। 

প্ৰত্যুত্তৰত শ্ৰীলংকাই ভাৰতীয় বলাৰৰ নিয়ন্ত্ৰিত বলিঙৰ সন্মুখত তিস্তিব নোৱাৰি ৮ উইকেটৰ বিনিময়ত ৯৮ ৰানহে সংগ্ৰহ কৰিবলৈ সক্ষম হয়।  পশ্চিম বংগৰ প্ৰতিভাৱান মিডিয়াম পেচাৰ তিতাছ সাধুয়ে চমকপ্ৰদ বলিঙেৰে মাত্ৰ ৬ ৰানত ৩টা উইকেট দখল কৰে। তদুপৰি, ৰাজেশ্বৰী গাইকোৱাডে ২টা, পূজা ভাষ্ট্ৰাকাৰ, দিপ্তী শৰ্মা আৰু দেৱিকা বৈদ্যই ১টাকৈ উইকেট পায়। 

উল্লেখ্য যে, ভাৰতে বাংলাদেশক পৰাস্ত কৰি এছিয়া কাপৰ ফাইনেলত স্থান সুৰক্ষিত কৰিছিল। ফাইনেলত জয়েৰে দলটোৱে সোণৰ পদকৰ অধিকাৰী হয়। এইদৰে প্ৰতিযোগিতাখনত ভাৰতৰ সোণৰ পদকৰ সংখ্যা ২টালৈ বৃদ্ধি পালে। ইয়াৰ পূৰ্বে ভাৰতৰ ১০ মিটাৰ পুৰুষৰ এয়াৰ ৰাইফল দলটোৱে এছিয়ান গেমছ ২০২৩ত দেশৰ হৈ প্ৰথমটো সোণৰ পদক অৰ্জন কৰিছিল।