নতুন দিল্লী
দিল্লীত আম আদমী পাৰ্টিয়ে বৃহৎ বিপৰ্যয়ৰ সন্মুখীন হৈছে। ১৫ গৰাকী কাউন্সিলাৰে শনিবাৰে দলটোৰ পৰা পদত্যাগ কৰি সুকীয়া দল গঠনৰ কথা ঘোষণা কৰিছে। বিদ্ৰোহী নেতাসকলৰ ভিতৰত আছে এমচিডিত আপৰ সদনৰ নেতা মুকেশ গোৱেল। নতুন গঠন কৰা দলটো হেমচন্দ গোৱেলে নেতৃত্ব দিব।
শনিবাৰে কাউন্সিলাৰসকলে গোৱেলৰ নেতৃত্বত ইন্দ্ৰপ্ৰস্থ বিকাশ পাৰ্টি নামৰ নতুন দলৰ কথা ঘোষণা কৰে। চলিত বৰ্ষৰ ফেব্ৰুৱাৰী মাহত অনুষ্ঠিত হোৱা দিল্লী বিধানসভা নিৰ্বাচনত গোৱেলে আদৰ্শ নগৰৰ পৰা আপৰ টিকটত প্ৰতিদ্বন্দ্বিতা কৰিছিল যদিও পৰাস্ত হৈছিল।
যোৱা পৌৰসভা নিৰ্বাচনৰ পূৰ্বে এই নেতাসকলে কংগ্ৰেছ এৰি আম আদমী পাৰ্টিত যোগদান কৰিছিল। ২৫ বছৰ ধৰি পৌৰসভাৰ কাউন্সিলাৰ হিচাপে কাৰ্যনিৰ্বাহ কৰা গোৱেলে ২০২১ চনত কংগ্ৰেছৰ পৰা আপলৈ সলনি হয়।
পৌৰসভাৰ নিৰ্বাচনত বিজেপিয়ে জয়লাভ কৰি দিল্লী পৌৰ নিগমৰ নিয়ন্ত্ৰণ পুনৰ দখল কৰাৰ কিছুদিন পিছতে এই ঘটনা সংঘটিত হৈছে। আম আদমী পাৰ্টিয়ে নিৰ্বাচন বৰ্জন কৰিছিল।
চলিত বৰ্ষৰ আৰম্ভণিতে বিধানসভা নিৰ্বাচনত বিজেপিয়ে আপক পৰাস্ত কৰাৰ পিছতে দিল্লীত দলটোৰ এয়া আন এক মোক্ষম আঘাত। তেতিয়াৰ পৰাই আপত আভ্যন্তৰীণ সংঘাতৰ সৃষ্টি আৰম্ভ হৈছিল।
দলটোৰ অসন্তুষ্টি ৰোধ কৰিবলৈ মাৰ্চ মাহত আপে সাংগঠনিক জোকাৰণিৰ সৃষ্টি কৰিছিল আৰু প্ৰাক্তন মন্ত্ৰী সৌৰভ ভৰদ্বাজক নিজৰ দিল্লী গোটৰ নতুন সভাপতি হিচাপে নিযুক্তি দিছিল। দুবছৰৰ পাছত নিৰ্বাচন অনুষ্ঠিত হ'বলগীয়া পঞ্জাৱৰ দায়িত্ব দিয়া হৈছিল প্ৰাক্তন উপ-মুখ্যমন্ত্ৰী মনীষ ছিছ’দিয়াক।
গোপাল ৰায়ক গুজৰাটৰ আপৰ প্ৰভাৰী হিচাপে নিযুক্তি দিয়াৰ বিপৰীতে আপৰ ৰাষ্ট্ৰীয় সাধাৰণ সম্পাদক সন্দীপ পাঠকক ছত্তীশগড়ৰ বিশেষ প্ৰভাৰী হিচাপে দায়িত্ব দিয়া হৈছে।
