লাচিন
পাকিস্তানৰ প্ৰধানমন্ত্ৰী শ্বেহবাজ শ্বৰীফে স্বীকাৰ কৰিছে যে ৯-১০ মে’ৰ মাজৰ নিশা ভাৰতে ৰাৱালপিণ্ডিৰ বিমানবন্দৰকে ধৰি গুৰুত্বপূৰ্ণ সামৰিক ঘাটিসমূহত ব্ৰাহ্মছ ক্ষেপণাস্ত্ৰে আক্ৰমণ কৰাৰ সময়ত তেওঁলোকৰ সেনা অজ্ঞাত আছিল।
পাকিস্তানৰ পক্ষ লোৱা কেইখনমান ৰাষ্ট্ৰৰ মাজৰ আজাৰবাইজানত অনুষ্ঠিত এক অনুষ্ঠানত ভাষণ দি শ্বৰীফে কয় যে অসীম মুনিৰ নেতৃত্বত সেনাই ১০ মে’ত পুৱাৰ নামাজৰ পিছত ভাৰত আক্ৰমণ কৰাৰ পৰিকল্পনা কৰিছিল। অৱশ্যে তাৰ আগতেই পাকিস্তানৰ বিভিন্ন প্ৰদেশত দীৰ্ঘ দূৰত্বৰ ছুপাৰছ’নিক ব্ৰাহ্মছ ক্ৰুজ মিছাইলৰ আক্ৰমণ হৈছিল বুলি প্ৰধানমন্ত্ৰীগৰাকীয়ে কয়।
শ্বৰীফে কয় যে ৰাতিপুৱাৰ আক্ৰমণৰ বিষয়ে তেওঁক অৱগত কৰিছিল মুনিৰে, যিজনক এতিয়া ফিল্ড মাৰ্শ্বাল পদবীলৈ উন্নীত কৰা হৈছে।
শ্বৰিফে তেওঁৰ সময়ত কয়, "৯-১০ মে'ৰ নিশা আমি ভাৰতীয় আগ্ৰাসনৰ প্ৰত্যুত্তৰ দিয়াৰ সিদ্ধান্ত লৈছিলো। আমাৰ সশস্ত্ৰ বাহিনীয়ে পুৱা ৪.৩০ বজাত ফজৰৰ নামাজৰ পিছত আক্ৰমণ কৰিবলৈ সাজু হৈছিল। কিন্তু সেই সময় আহি পোৱাৰ আগতেই ভাৰতে পুনৰবাৰ ব্ৰাহ্মছ ব্যৱহাৰ কৰি ৰাৱালপিণ্ডিৰ বিমানবন্দৰকে ধৰি পাকিস্তানৰ বিভিন্ন প্ৰদেশক লক্ষ্য কৰি ক্ষেপণাস্ত্ৰ আক্ৰমণ চলাইছিল," লাচিনত ভাষণ দি তেওঁ কয়।
প্ৰধানমন্ত্ৰীগৰাকীয়ে ভাৰতৰ সামৰিক আক্ৰমণৰ বিৰল স্বীকাৰোক্তি অসীম মুনিৰৰ উপস্থিতিত কৰে।
দৰাচলতে পাকিস্তানে পশ্চিম সীমান্তৰ অসামৰিক অঞ্চলত ড্ৰ’ন আৰু মিছাইল আক্ৰমণ চলোৱাৰ প্ৰতিক্ৰিয়া স্বৰূপে ভাৰতে লক্ষ্য কৰি লোৱা ১১টা সামৰিক স্থানৰ ভিতৰত ৰাৱালপিণ্ডিত থকা নুৰ খান বিমানঘাটিটোও আছিল।
ৰাৱালপিণ্ডিত পাকিস্তান সেনাৰ মুখ্য কাৰ্যালয়ৰ সমীপত অৱস্থিত এই বিমানঘাটিটোত লকহিড চি-১৩০ হাৰকিউলিছ আৰু ইলিউছিন ইল-৭৮ ৰিফুৱেলাৰৰ দৰে শীৰ্ষস্থানীয় সামৰিক বিমান আছে। উপগ্ৰহৰ চিত্ৰ বিশ্লেষণে কমেও দুখন সামৰিক পৰিবহণ বাহনৰ ক্ষতিৰ ইংগিত দিয়ে।
নুৰ খানৰ উপৰিও ভাৰতে ৰফিকী, মুৰিদ, ৰহিম ইয়াৰ খান, চুক্কুৰ আৰু চুনিয়ানত পাকিস্তানৰ সামৰিক ঘাটিত আঘাত হানে। স্কাৰডু, ভোলাৰী, জেকববাদ আৰু সৰগোধাত থকা বিমান ঘাটিসমূহো ব্যাপক ক্ষতিসাধন হয়।
সূত্ৰই জনোৱা মতে, ভাৰতে বিমানঘাটিত নিখুঁত আঘাতৰ বাবে ছু-৩০এমকেআই জেটৰ পৰা প্ৰায় ১৫টা ব্ৰাহ্মছ ক্ষেপণাস্ত্ৰ নিক্ষেপ কৰিছিল -- এই সকলোবোৰ উপগ্ৰহৰ ছবিৰ দ্বাৰা সমৰ্থিত হৈছে।
"ফায়াৰ এণ্ড ফৰগেট" ক্ষেপণাস্ত্ৰবোৰে পাকিস্তানৰ চীন-উৎপত্তি বায়ু প্ৰতিৰক্ষা প্ৰণালীক উপেক্ষা কৰি সামৰিক স্থানসমূহত আঘাত কৰে। ৰাছিয়াৰ সৈতে সহযোগিতাত নিৰ্মিত এই মিছাইলসমূহে ৩০০ কিলোমিটাৰ দূৰলৈকে লক্ষ্যত আক্ৰমণ কৰিব পাৰে।
