নতুন দিল্লী
দেওবাৰে পুৱা প্ৰায় ১১:৩০ বজাত মধ্য এছিয়াৰ তাজিকিস্তানত ৪.৪ প্ৰাবল্যৰ ভূমিকম্পৰ জোকাৰণি অনুভূত হয়। অৱশ্যে, ভূমিকম্পৰ ফলত এতিয়ালৈ কোনো হতাহত বা সম্পত্তিৰ ক্ষতিৰ খবৰ পোৱা হোৱা নাই।
নেচনেল চেণ্টাৰ ফৰ চিচমোলজি (এনচিএছ)ৰ মতে, ভূমিকম্পটোৱে দেশখনত ১৭০ কিলোমিটাৰ গভীৰতাত সংঘটিত হৈছিল।
শনিবাৰে দক্ষিণ ইকুৱেডৰ আৰু উত্তৰ পেৰুত সংঘটিত এক ভয়ংকৰ ভূমিকম্পৰ কেইঘণ্টামানৰ পিছতে এই ভূমিকম্পটো সংঘটিত হয়। যাৰ ফলত কমেও ১৫ জন লোক নিহত হয় আৰু আনসকল ধ্বংসস্তূপৰ তলত আৱদ্ধ হৈ পৰে।
আমেৰিকা যুক্তৰাষ্ট্ৰৰ ভূতাত্ত্বিক জৰীপ অনুসৰি, ইকুৱেডৰৰ দ্বিতীয় বৃহত্তম চহৰ গুয়াকুইলৰ দক্ষিণে প্ৰায় ৫০ মাইল (৮০ কিলোমিটাৰ) দূৰত প্ৰশান্ত মহাসাগৰীয় উপকূলৰ ওচৰত ৬.৮ প্ৰাবল্যৰ ভূমিকম্প সংঘটিত হৈছিল।
ভূমিকম্পৰ ফলত পেৰুত এজন আৰু ইকুৱেডৰত আন ১৪ জন লোকৰ মৃত্যু হয়। স্থানীয় কৰ্তৃপক্ষই কমেও ১২৬ জন লোক আহত হোৱাৰ তথ্য প্ৰকাশ কৰিছে।
