আৰ্ছলা খান/নতুন দিল্লী
বিহাৰৰ ঔৰহী গাঁৱৰ এজন অলৌকিক শিশুৱে সমগ্ৰ দেশবাসীৰ দৃষ্টি আকৰ্ষণ কৰিছে। চিআইবি (CIB) চেনেলে শেহতীয়াকৈ প্ৰকাশ কৰা এক বিশেষ প্ৰতিবেদন অনুসৰি, এই শিশুটি বুদ্ধিমত্তা, বিজ্ঞানৰ প্ৰতি আগ্ৰহ আৰু অসাধাৰণ চিন্তাৰ বাবে জনাজাত।
গাঁৱৰ ৰাইজে তেওঁক মৰমেৰে ‘বিস্ময় বালক’ বুলি ক’বলৈ আৰম্ভ কৰিছে। আনহাতে বহু লোকে তেওঁক দেশৰ পৰৱৰ্তী আব্দুল কালাম বুলিও গণ্য কৰিছে।
শ্বাৰীম খানে লাভ কৰা বঁটাসমূহ
প্ৰতিবেদন অনুসৰি এই শিশুটিয়ে মাত্ৰ ১২ বছৰ বয়সতে গণিত, বিজ্ঞান আৰু প্ৰযুক্তিবিদ্যাৰ এনে প্ৰশ্নৰ উত্তৰ দিয়ে যে প্ৰাপ্তবয়স্ক লোকো হতবাক হৈ পৰে। গাঁওখনত সীমিত সুবিধা থকাৰ পাছতো এই শিশুটিয়ে নিজাববীয়াকৈ ইণ্টাৰনেট, ছ’লাৰ পেনেল, মোবাইল মেৰামতি আৰু কম্পিউটাৰ প্ৰগ্ৰেমিং আদি ক্ষেত্ৰত গভীৰ জ্ঞান আহৰণ কৰিছে। পুৰণি ইলেক্ট্ৰনিক সামগ্ৰীৰ পৰা তেওঁ কেনেকৈ নতুন যন্ত্ৰ তৈয়াৰ কৰে সেই বিষয়ে প্ৰতিবেদনত দেখুওৱা হৈছে। এই শিশুটিৰ নাম হৈছে শ্বাৰীম খান।
এই শিশুটিৰ আটাইতকৈ বিশেষ কথাটো হ’ল তেওঁৰ জ্ঞান কোনো ডাঙৰ স্কুল বা কোচিঙৰ পৰা অহা নাই, নিজৰ আগ্ৰহ আৰু জ্ঞানৰ পৰাহে আহিছে। ইউটিউব, পুৰণি কিতাপ আৰু ভঙা-ছিঙা সামগ্ৰীৰ সহায়ত তেওঁ যিখিনি কৰি আছে, সেয়া চহৰৰ ছাত্ৰ-ছাত্ৰীয়েও কৰিব নোৱাৰে।
বিহাৰৰ ঔৰহী গাঁৱৰ মানুহে এই শিশুটিক গাঁৱৰ উদীয়মান তাৰকা বুলি গণ্য কৰে। ব্যক্তিগত চেনেল এটাৰ লগত কথা পাতি থাকোঁতে এজন বৃদ্ধই কয়, "আমাৰ গাঁৱৰ এটা শিশুৱে এনে অলৌকিক কাম কৰিব বুলি আমি কেতিয়াও ভবা নাছিলো। এতিয়া গাঁৱৰ প্ৰতিজন অভিভাৱকে নিজৰ সন্তানক পঢ়া-শুনা কৰিবলৈ উৎসাহিত কৰিবলৈ আৰম্ভ কৰিছে।"
শ্বাৰীম খানৰ পিতৃ
আনহাতে, এটা চেনেলে নিজৰ প্ৰতিবেদনত এই শিশুটিক "মুছলিম সমাজৰ আব্দুল কালাম" বুলি অভিহিত কৰিছে। এই তুলনা এনেয়ে কৰা নাই। ভাৰতৰ প্ৰাক্তন ৰাষ্ট্ৰপতি তথা মহান বিজ্ঞানী ড° এ পি জে আব্দুল কালামে যিদৰে অতি সাধাৰণ পৰিস্থিতিৰ পৰা ওলাই আহি দেশ আৰু বিজ্ঞানক এক নতুন দিশ দিছে, ঠিক তেনেদৰে এই শিশুটিৰো সীমিত সম্পদেৰে দেশৰ দিশ সলনি কৰাৰ ক্ষমতা আছে।
বর্তমান এই শিশুটি নিজৰ পর্যায়ত শিক্ষণ আৰু সৃষ্টিৰ কামত নিয়োজিত হৈ আছে যদিও সঠিক পথ-নির্দেশনা, আর্থিক সাহায্য আৰু কাৰিকৰী সা-সুবিধা লাভ কৰিলে, তেওঁ দেশৰ বাবে এক বহুমূলীয়া সম্পদ হ’ব পাৰে৷
সংবাদ প্ৰতিষ্ঠানটোৰ প্ৰতিবেদনত এটা ডাঙৰ বাৰ্তাও দিয়া হৈছে যে ভাৰতৰ গাঁৱে-ভূঞে প্ৰতিভাৰ অভাৱ নাই। তেওঁলোকক মাথো বিচাৰি উলিয়াই লালন-পালন কৰা আৰু এখন উপযুক্ত মঞ্চ দিয়াৰ প্ৰয়োজন আছে। যদি এনে শিশুক সময়ত সঠিক দিশ দিয়া হয়, তেন্তে দেশক পৰৱৰ্তী বিজ্ঞানী, উদ্ভাৱক বা চিন্তাবিদ পোৱাত কোনেও বাধা দিব নোৱাৰে।
শ্বাৰীম খান তেওঁৰ ভগ্নীৰ সৈতে
বিহাৰৰ এই ‘বিস্ময় বালক’ কেৱল নিজৰ গাঁও বা ধৰ্মৰেই নহয় সমগ্ৰ দেশৰ বাবে এক আশাৰ ৰেঙনি হৈ পৰিছে। তেওঁ হৈছে ঘোৰ অন্ধকাৰৰ মাজত জ্বলি উঠা এক সৰু চাকি। আজি আমি প্ৰতিভাৰ সন্ধানত সমগ্ৰ দেশৰ কোচিং চেণ্টাৰবোৰলৈ লক্ষ্য কৰিলে এই ল’ৰাটোৱে আমাক মনত পেলাই দিয়ে যে প্ৰকৃত প্ৰতিভা মাটিৰ লগত সংযুক্ত হৈ থাকে আৰু ইয়াৰ বাবে মাত্ৰ এটা উৰণৰ প্ৰয়োজন।
উল্লেখ্য যে, শ্বাৰীম খানে Sk Wonder নামৰ ইউটিউব চেনেল এটাও চলাই আছে। এতিয়া আমাৰ সকলোৰে বাবে এনে শিশুক চিনাক্ত কৰি প্ৰচাৰ কৰাৰ সময় যাতে পৰৱৰ্তী আব্দুল কালাম ভাৰতৰ মাটিত পুনৰ জন্ম লাভ কৰিব পাৰে।
